Yakub Whnak Kohok Fe Wate Efraim Wewer Wahin Wamon Manasye
48:1-22
48
Amuk mre fo, na mre whok wrana man Yusuf wto: “Nono wkaini om mfle.” Ofo wadien wfe wet lak, Manasye wadien Efraim, yein yse Yakub wak. 2 Ofo, na mre yrana man Yakub yto: “Nfe wet Yusuf le waka ou.” Mde ou werek yowain wkan, wkein wkan om mkanas, ofo wsidik wleli wak wi hra ou wase om.3 Ou wrana man Yusuf wto: “Kamuolo Nago hra wkain kadio kat fobi katak kom wyen hata wkan man tet tak Lus, fobi Kanaan. Mde ou whnak fle fe tet wto:a 4 ‘Tet le ma tatsiofo nen nkafe wet warok ei yibe na sa marok. Tet thnak fobi Kanaan kom man nen nadien nfe wet yidien nate kokos nkain kawuak.’
5 Mde ke fo, nen nfe wet lak ei, Efraim wadien Manasye, tet taher ei ytrik yibe tet tfe wet yde le namon Ruben wadien Simeon. 6 Ha, nto nkafe oli wet mre fo, ei ytrik deri yse nen nak. Basak man ale fo, nan nsalit oli nse Kanaan, ofo ytrik yse fobi hra yamon lolon la ykain om mak fobi Kanaan. 7 Nakau, kamuolo faf fehin fobi Padan fik sonat fan mkedi, fitaren wale yibe fhok fse Efrata, ofo neme Rahel om maigi. Mde tet tkali om mak deri fan mtefit ana, fan mse kota Efrata.” (Kamuolo nai yto mabe Efrata, mahin madien hra ko mabe Betlehem.)b
8 Mde Israel whot fo Yusuf wfe wet ei ykro, ofo wefitwain wto: “Hra na man sio ma ekei?”
9 Yusuf wrana man wono wto: “Wet tet tfe hra Nago whnak yin tet tak fobi ko.”
Ofo Israel wbahe wto: “Nkein fien ei yka yik tbariomo fe bo tet thnak kohok fe ei.”
10 Hra oko fo, Israel wsifuon ei ymian wale yibe ou wtrar, mde ou whot roro wain dait ei, ei ymialas deri. Mde Yusuf wadien twa ei yik wono wbariomo, ofo ou wkami tirik wbos wkmois ei wto: “Naka tate yo!”
11 Mde Israel wrana man Yusuf wto: “Kamuolo tet tnok deri tto nen nkak wale. Hra ke Nago whnak fe thot fot oli nen nadien nfe wet ke!”
12 Ofo Yusuf ou wkein kat wfe wet ei yehin wono wteit sia olo, ofo wsaesik man wono kawuak de wsam mse fobi. 13 Mde Yusuf wslonti wfe wet wakyau Efraim wadien wna tkoin wadien twa ou wse wono wna wait, ha wslonti wfe wet waflesa Manasye ou wadien wna wait wse wono wna tkoin. 14 Mahin Israel wna tkoin om mguos dait man wet waflesa ou, ha wbakefes wlak wnam man Efraim wsa, ofo wsalit oli wbakefes wna wait wlak mse Manasye wsa.
15 Mde Yakub whnak fle fe Yusuf wto:
“Yo, Nago hra kamuolo tate Abraham wadien tono Ishak
yein sisi yidien ou,
Nago hra wde le gembala wadien sisi wkororo tet
tadien kamuolo kawuak de hra sonat ko,
16 Ou wabe Malaikat hra wkosia kat tet
tahin ni kadio hra yiyaka ei, nai yto ‘wak hlein kafir.’
Ou le ma watsiofo tate lak ei ysres,
kawuak mde tet tkedi mo,
tono Ishak wkedi mo,
tate Abraham wkedi mo,
ei yririn yik fobi katak,
fe hra basak ei yrok sanini ysamsa kat yik fobi katak ko.”
17 Yusuf whot fo wono wlak wna tkoin mak Efraim wsa, ofo wto wono wsiok sele ni. Mde ou wlouk wono wnam wkosia kat mahin Efraim wsa wlak mse Manasye wsa wa wto, 18 “Hau, tono, wet waflesa ou le wko. Nlak nen na tkoin mak ou wsa!”
19 Mahin wono waha wba kat wto: “Hau, tfe wet, tet tnok wale, tet tnok wale. O le ma basak wabe fot na sa maflem, mahin waliwet ou le ma wabe na sa mafle wewer wamon ou.” 20 Yidien hra oko Yakub whnak fle fe wate lak ei wto:
“Basak man ale fo, la nan nibe na sa lak yfle, ofo na sa Israel yhnak kohok fot man ei yfe wet yto:
‘Nago wsiok na sa nan nke nfle mde le Efraim wadien Manasye.’ ”
Mde le ke ou wkosia kat Efraim ou wfle wewer wahin wamon Manasye.c
21 Ofo Israel wrana man wfe wet Yusuf wto: “Kyamre fo tet taigi. Bo taigi wata, mahin Nago waheit wadien nan, basak wsiok nan nsalit oli nse fobi nate kokos om. 22 Tfe wet, nen nke nabe na wafle waslonti namon wai naliwet wai, ofo tet thnak man nen fobi sfa lis hra kamuolo tet tkhan tadien na sa Amori. Tet tsiok tfe tawur om madien mnian lis, tkosia kat fobi kom mahin na sa Amori. Fobi kom tet thnak man nen nkain kawuak.”