Firaun Whnak Fobi Man Yakub Wase
47:1-12
47
Yusuf wain wrana hatot man Firaun wto: “Nai fe nau, tono wadien tamon wai taliwet wai yidien ni ror yidien yfe hrien kadio kat yka wale yehin fobi Kanaan yhok yik fobi Gosyen.” 2 Ou wlouk helwain wamon wai waliwet wai yikan mahot, watik yhok yse Firaun wak.
3 Mde Firaun wefitwain man ei wto: “Nan nke nsiok sawuan mit ma ei?”
Mde ei yto: “Nen nfe na dihan mam mibe gembala midien sawuan ni ror, mde le mate kokos ei.” 4 Ei yrana oli yto: “Nen nfe na dihan mam mke mka mese kaf kat deri mik ko fe tolo katot wfle sonat wak fobi Kanaan. Mam mfe ni ror yeit dait ni eit fe klawleis ydain wale yik ra. Mde nen nto naisi fo, mam mese mik deri fobi Gosyen.”
5 Ofo Firaun wrana man Yusuf wto: “Nono, namon wai, naliwet wai yka kmo yse nen nak. 6 Fobi katak Mesir kom faf fkdein dait, ei yka yidien faf fese. Nhnak ei yiheit yese yik fobi Gosyen, wi hra mabot karmiak kat mak fobi Mesir kom. Nto nen nnok mre yehin ei hra ynok lokdi ni, ofo nkosia kat ei yibe gembala yibe ysmit lien tet tfe ni ror.”
7 Mde Yusuf wwiehla fien wono wtrik wse Firaun wak. Whok fo, Yakub whdin whnak kohok fe Firaun. 8 Ofo Firaun wefitwain wto: “Nen nase wale der waka?”
9 Mde Yakub wrana man Firaun wto: “Tet tase wale der 130 (na mtamre yeigi whri na wna yahar). Tet tase deri der kyamre le mke, ei ysgia kat, ytol dait yidien kamuolo tate kokos wase der ei yrok. 10 Ofo Yakub whnak kohok man Firaun ofo whokti kat.
11 Mde Yusuf wsiok mde le Firaun wbahe fe om, ou whnak fobi man wono, wamon wai waliwet wai yesem, fobi hra mabot kat hra nai yto Gosyen mak kabupaten Ramses. 12 Yusuf wberiet fot ni eit ei ytol-tol homo man wono, wamon, waliwet wai, yidien ei yfe wet.
Na Sa Mesir Yibe Kawuak Kawor Yin Firaun
47:13-26
13 Mahin fo, ni eit ydain kat yik fobi Mesir madien fot fobi Kanaan yibe melin lis, tolo katot wafle. Na marok mak fobi lak ke mkaluwa kat fe katot wafle ou. 14 Yusuf wyo pitis kadio kat hra na marok mak fobi Mesir fobi Kanaan ei ykain gandum ei, ofo wain wkain twa pitis ei yin Firaun wak. 15 Kayi de na marok mak fobi Mesir fobi Kanaan yfe pitis ei ydain kadio kat. Ofo na sa Mesir ei yka yse Yusuf wak yto: “Mam mfe pitis mdain wale. Nhnak ni eit yin mam! Bo nto mam mkak wata fe ni eit mik nen nsifuon!”
16 Yusuf wsalit wto: “Mto mde ke fo, nadien twa nan nfe ni ror yin tet, se tet thnak tskaleis ni eit yin nan. 17 Mde ei yidien twa ei yfe ni ror yse Yusuf wak, ofo ou whnak ni eit yin ei. Ou wskaleis ni eit yidien ei yfe kuda yo, kambing domba yo, sapi yidien keledai yo. Ofo, Yusuf wskaleis ni eit yidien ei yfe ni ror kadio kat kayi de der wmres wfot.
18 Der mao lak fe whok oli fo, ei yka oli yse Yusuf wak yto: “Mam mrana tahak man na kohok nen, mam mgebra dait. Mam mfe pitis mdain. Mam mfe ni ror nen nkain wale. Ni mre oli dait yin mam mhnak yin na kohok nen, ha mam mkan na tkoin deri le mkom, midien deri fobi mam mfem. 19 Nto mam mkak wata mik nen nbariomo ko fe me? Nto mam mfe fobi msgia wata fe me? Nhnak gandum olo man mam se bo mam mron, mkak dait. Wa bo mam mfe bet kom mdrot, msahen. Mam mwaini man nen nfelit wata mam midien fot fobi mam mi, se bo nhnak ni eit fe mam. Se bo mam mke mibe kawor min Firaun, mam mfe fobi man fot Firaun wkain.
20 Mde Yusuf wfelit fobi kadio kat yehin na sa Mesir yin Firaun wkain. Na Mesir ysafo ei yfe fobi kadio kat, mre whok dait, mabe katot ou wsamsa. Mde ke fo, Firaun wkain kadio kat fobi Mesir. 21 Na marok mak Mesir kadio kat, mahin mata mse mata, Yusuf wsiok ei yibe kawor yin Firaun. 22 Mahin deri fobi mres hra Yusuf wfelit dait man Firaun, o le ma fobi hra Firaun wfe imam ei yfe. Na imam ei yslon kawuak pitis yidien ni eit yehin Firaun wak, mde ysafo dait fobi ei yim.
23 Yusuf wrana man na marok ei wto: “Hra ko fo tet tkain nan kadio kat nidien nan nfe fobi nin Firaun wkain. Notik gandum yolo ke, norik kein oli! 24 Basak wto wkan fo, nsat nbadiak gandum, nhlik wan karong, ofo mahin karong mahot, nan nhnak mres man Firaun, nan niheit nkain karong hat. Yo nto nan nhlik gandum wan karong na mahot yeigi (100), ofo ntrie kat karong na mre waigi (20) yka, nhnak man Firaun wkain, nan niheit nkain karong na hat yeigi (80) man. Hra yiheit yin nan nkain, mre yibe yolo yin yorik kein, mre yibe ni eit yin nan nfe na marok.
25 Ofo ei ysamenie yto: “Nai fe nau na kohok, nen nhnak hares man mam. Nen neren mam mron kadio kat. Mam mibe kawuak kawor min Firaun.”
26 Mde pajak hra Yusuf wkosia man na Mesir okom, maheit kawuak de hra ko. O le ma hra mahin gandum karong mahot om, ei ykoriet karong mres, o le ma persen 20 (na mre waigi), ofo yhnak yin Firaun wkain, yo yiheit ykain persen 80 (na hat yeigi). Mahin na imam deri yhnak dait pajak yibe ei yslon kawuak fobi ei yfem, man dait Firaun.
Yusuf Wfafti Ni Man Wono
47:27-31
27 Mde na sa Israel ei yese yik Mesir yik fobi Gosyen. Ei ykain wi yik ana mde ykafe kein wet, yate warok.
28 Yakub wase wak Mesir der 17 (yahar teit mtalak) kayi de umur der 147 (na mtalak yeigi whri na wna mtalak). 29 Kayi de wnok wto, kyamre fo waigi, ofo ou wwit wfe wet Yusuf waka wto skatoin ni wto: “Basak sba tet taigi tain tse tono tate wai yik. Nen nto naheit nmro fe tet, ofo nsiok ni hra tet tbahe yin nen. Nen nto nmro fe tet, ofo nlak nen nam mak tkabalak kenie ko, nfafti nto, basak nen nkali amot tet tak fobi Mesir ko mala!a 30 Nkafe tet tain oli tse fobi Kanaan, nkali sisi tet tak tono tate wai yik.”
Yusuf wto: “Yo ma, tono, basak tet tsiok ni hra tono nen nto ke.”
31 Mahin wono wto: “Hau, nfafti man tet se tnok.” Ofo Yusuf wfafti man wono. Ofo Yakub wsamorik wak wi ma esem, wsaesik whdin Nago.