Yakub Wti Wse Fobi Mesir
46:1-34
46
Mde Israel wkoyo wfe na ei yidien ni ror ei, hrien ei yfe, yehinti kat Hebron, yein yhok yik Bersyeba.a Ei yhok fo, ou wlouk wfe ni ror kambing domba mre ei yka wkolok wsanfe yin Nago wto: “Nago, Nago hra tono Ishak wfe, ni ke tet tsanfe man deri nen.”2 Ou wase amuk fo, wasamik ni. Nago waka wwit ou wto: “Yakub, Yakub!”
Ofo ou wfalas wto: “Wo! Tet le mke.”
3-4 Ofo Nago wto: “Nago tet le mke, hra nono wfe Nago. Nen naliak amot. Naka, faf fein! Tet tadien sisi nen faf fsiolok fse fobi Mesir. Nak ale tet tsiok nen nabe na sa mafle kamyi kat. Basak nen naigi fo, Yusuf le ma wnati nsifuon, ofo tet tadien twa oli nan nsalit oli nse fobi ko.”
5 Mde Yakub wsidik wahin Bersyeba wain wse fobi Mesir. Israel wfe wet ei ylak yono Yakub wadien ei yfe wet ei yidien ysmian ei yse kereta yibri hra Firaun whnak ei. 6 Ei yotik fot ei yfe ni ror yidien hrien kadio kat hra ei yfe yik fobi Kanaan. Mde Yakub wadien kadio kat ou wfe na marok yti yse fobi Mesir.b 7 Ou wadien wfe wet ei, wate wai, na sa man ekei kadio kat, yti yse Mesir.
8 Israel wfe wet ei, Yakub wfe na kadio kat hra yti yse Mesir, ykedi le mke:
Wet yidla mtamre hra Lea, Yakub wsmian maolo mkafe ei, o le ma Ruben, Yakub wfe wet waflesa, Simeon, Lewi, Yehuda, Isakhar, yidien Zebulon.
9 Yo, Ruben wfe wet yidla kadio o le ma:
Henokh, Palu, Hezron yidien Karmi.
10 Ofo wet yidla hra Simeon wfe kadio o le ma:
Yemuel, Yamin, Ohad, Yakhin yidien Zohar. Ei yidien fot Saul hra na dli Kanaan om mfe wet ou.
11 Ofo Lewi. Lewi wfe wet yidla o le ma:
Gerson, Kehat, yidien Merari.
12 Ofo Yehuda. Yehuda wfe wet yidla o le ma:
Er, Onan, Syela, Peres yidien Zerah (mahin Er wadien Onan la yeigi omuok wale yik fobi Kanaan).
Peres wfe wet yidla lak o le ma:
Hezron wadien Hamul.
13 Ofo Isakhar. Isakhar wfe wet yidla le ma:
Tola, Pua, Ayub yidien Simron.
14 Ofo Zebulon. Zebulon wfe wet yidla le ma:
Sered, Elon yidien Yahleel.
15 Ei yikan kadio ke yehin Yakub wsmian maolo Lea mak. Om mkafe wet yidla mtamre ei yidien yihano Dinam yik fobi Padan-Aram. Yidla yidli yikan kadio kat 33 (na mre waigi whri wasin yahar wtlok foko tolik).
16 Mde wet yidla lak hra Yakub wsmian ma ese fat Zilpa mkafe ei, o le Gad wadien Asyer.
Gad wfe wet yidla kadio le ma:
Zifyon, Hagi, Syuni, Ezbon, Eri, Arodi yidien Areli.
17 Wet yidla hra Asyer wfe le ma:
Yimna, Yiswa, Yiswi yidien Beria.
Ei yihanom mkedi le ma Serah.
Beria wfe wet yidla lak:
Heber wadien Malkiel.
18 Ei yke yikan kadio yehin Zilpa mak. Zilpa o le ma na dihan hra kamuolo Laban whnak man wfe wet Leam. Yidlai yidli yikan kadio kat yahar teit mtamre.
19 Mde wet yidla hra Yakub wsmian maolo fat Rahel mkafe ei:
Yusuf wadien Benyamin.
20 Yusuf wak fobi Mesir wsmian Asnat. Asnat mkafe wet yidla lak: Manasye wadien Efraim. Asnat mono Potifera wabe imam, wase wak kota On.c
21 Ofo Benyamin. Benyamin wfe wet yidla o le ma:
Bela, Bekher, Asybel, Gera, Naaman, Ehi, Ros, Mupim, Hupim yidien Ared.
22 Ekei yehin Rahel mak – ei yikan yahar teit hat.
23 Mde wet yidla hra Bilha, Yakub wsmian ma ese, mkafe ei o le ma:
Dan wadien Naftali.
Dan wfe wet wadlau mres deri, o le ma:
Husim.
24 Wet yidla hra Naftali wfe o le ma:
Yahzeel, Guni, Yezer yidien Syilem.
25 Ekei yehin Yakub wsmian ma ese Bilha mak. Bilha o le ma na dihan hra kamuolo Laban whnak man wfe wet Rahel. Ei yikan kadio kat mtalak.
26 Mde yikan kadio kat hra yhok yik Mesir yidien Yakub - hra oko fo Yakub wfe wet, wate, wate kokos, yaher dait wfe wet ysmian - yikan kadio kat 66 (na tolik yeigi whri na wna mtamre). 27 Mto yaher fot wet lak man hra Yusuf wkafe yik Mesir, ofo ei yikan kadio kat 70 (na tolik yeigi whri na wna yahar).d
28 Yakub wbahe Yehuda wain wse Yusuf wak, wefitwain fan main mse Gosyen. 29 Ei yhok yik Gosyen, ofo Yusuf wlak kein wfe kereta wain wayen wono wak ana. Whot kmo kat wono wak Gosyen, mde wkamti wbahlos wtodo, ofo wawo lis kat.
30 Israel wrana man Yusuf wto: “Esre, se tet taigi tnes! Fe tsifuon ke yhot nen nron sonat!”
31 Mde Yusuf wrana man wamon wai waliwet wai, yidien wono wfe na marok om wto: “Tet tain tse Firaun wak trana man ou tto: “Tamon wai taliwet wai yidien tono hra yese yik fobi Kanaan ei, o le yka yhok wale yse tet tak. 32 Ei yibe na hra yidien sawuan kambing domba. Ei yotik kadio kat ei yfe ni ror kambing domba, sapi keledai, yidien hrien kadio kat hra ei yfe.” 33 Ofo ou wrana oli man ei wto: “Bo Firaun ou wwit nan wefitwain wto: ‘Nan nsiok sawuan ni mit ma ei?’ 34 Ofo nrana mde le ko: “Nen nfe na dihan mam mehin mwet aiti midien sawuan kambing domba, mde le kamuolo mam mate kokos ei.’ Nan nrana mde le ko, ofo bo whnak nan nese nik fobi Gosyen, fe na Mesir ykamuon na hra yidien ni ror ei yibe yisgia.”