Yusuf Wrana Tahak Man Wamon Wai Waliwet Wai
45:1-28
45
Mde Yusuf wsablit mkoko mmosortek. Ou wtek fe oli dait ou wkasom wak na marok mbariomo. Ofo ou wbahe man ou wfe na dihan marok ei wto: “Nan kadio nhok kat nse tlein.” Ofo na mre wak oli dait ra, ou wmres wadien deri wamon wai waliwet wai. Ei ymres deri yik bol ra.a 2 Ofo Yusuf wawo kawuak de wsalo mfle. Na Mesir marok yoso kadio kat ou wawo wsalo mfle, ofo ei yrana man Firaun wadien nai yrok yik bol ou wa, ei yoso fot.3 Mde Yusuf wsalo tkoin ei yim, wrana tahak kat man waliwet wai wamon wai wto: “Yusuf tet le mke! Nto tkoin kat se tono wron sonat, afe?” Mahin waliwet wai wamon wai yrana oli dait ni mre man ou yibe yeliek, yteit yrioro yik ou wbariomo.
4 Ofo Yusuf wrana oli man ei wto: “Nan nka nitaren nse tet tak ko!” Ofo ei yka yitaren yse ou wak. Yusuf wto man ei wto: “Tamon nan, taliwet nan, Yusuf tet le mke. Kamuolo nan nsafo tet tse fobi Mesir ko. 5 Mde ke fo, neliek amot, nan nsalo frit om mala mabe kamuolo nan nsafo tet tse fobi ko, yibe Nago ou le ma hra wteye kein tet talin kein nan tse ko, mabe tsiok krek ni eit yibe nan neigi dait. 6 Katot fle wase wale der lak ko. Mahin hra ko mase oli kdie der mahot fo, nai yogo oli dait biele, fe melin fle wsamsa karmiak kat. 7 Nago le ma wteye tet talin tsiok kein krek ni eit, se bo katot fleu watsi dait nan. Nan nikan marok nron sonat kadio kat, neigi dait fe ni eit.
8 Nan dait le ma nteye tet talin ha, Nago deri ma wteye tet. Nago wsiok tet tabe na wafle hra wojin ni man Firaun. Tabe na wafle hra waslonti Firaun wfe na kadio. Tet tabe fot na wafle hra wasiokti kadio kat fobi Mesir kom. 9 Nan nein tamli nsalit oli nse tono wak, nrana hatot man ou nto: “Nfe wet Yusuf wrana mde le ko: “Nago watsiofo tet tabe na wafle waslonti fobi Mesir kadio kat. Tono, nsiolok naka nse tet tak! Nen nleli oli dait!b
10 Bo nen nase nak fobi Gosyen nataren nse tet tak, nen nadien fot nfe wet ei, nate ei, yidien fot nen nfe ni ror kadio kat, yidien fot nen nfe hrien ei. 11 Nak oko fo, tet twasi nen nadien ni eit wabe katot fle ko watsi oli der mahot sonat. Nto nen naka dait, ofo nan nikan marok niheit nkatot, nibe kawuak nai ysgia fe ni eit.” Nrana mde le ko man tono.
12 Nan kadio kat nidien fot taliwet Benyamin nhot Yusuf tet le ma trana ni. 13 Nrana hatot fe man tono ni warok hra nan nhot ke, hra nai ysaesik yhdin man tet tak ko, yibe tet tabe na wafleu. Nein tamli nwiehla fien tono waka wse ko!”
14 Mde Yusuf wkami tirik kat waliwet walolon Benyamin ofo wawo. Benyamin wkami fot wamon ou, wawo wak wamon wkbek ago. 15 Mde ou wbon wawo fe fot wamon wai. Mdain fo ei yrana sisi ni yidien ou.
16 Firaun wadien fot wfe na na kohok kadio kat yoso fo Yusuf wamon wai waliwet wai ei yka, mde ei ykashok fe fot. 17 Firaun wrana man Yusuf wto: “Nrana man namon wai naliwet wai nto: “Nsiok mde le ke: Nlak ni ror nan nfe, nein oli nse fobi Kanaan, 18 nwiehla fien nono wadien wsmian ma ei, yidien fot nan nfe wet ei kadio kat yka yse tet tak. Se bo tet thnak wi hra mabot karmiak kat mak fobi Mesir ko man nan nesem. Bo nan neit kadio kat ni ybot yik fobi kom.
19 Tet trana fot ni hra ko man nen. Nen nrana man ei nbahe ei ysiok mde le ke: Ei ywien kereta mre yehin Mesir yin ylak fien ei yfe wet yidien ysmian, yidien yono yka yehin ra yse ko. 20 Nan nfe hrien yik ra, nehinti kat deri, yibe bo nan nhok nik ale ko, ofo tet thnak ni kadio kat ybot yik fobi Mesir ko yin nan nkain.”
21 Mde Israel wfe wet ei ysiok mde le eke. Yusuf whnak kereta yin ei mde le hra Firaun wrana om. Ou whnak fot ni eit dianan yibe fan kedi. 22 Ou whnak fe mre-mre fot not trik yifi yin ei ykain fe mres-mres. Ha, man Benyamin ou whnak not trik yifi mahot yidien fot pitis warok, syikal perak wkdois 300 (na yahar teit mahot yeigi). 23 Ni hra ke le ma whnak fot yin wono: Keledai yidlai yahar yhon fe ylak ni ybot yehin Mesir yin ei, yidien fot keledai yidli yahar ylak fot gandum yidien roti yidien fot ni eit dianan mre yin wono, wabe wat yik fan kedi. 24 Ofo ou wbahe yein, wto man ei wto: “Nan nkafa nik fan kedi amot mala!”
25 Mde ei yein yehin fobi Mesir yhri kawuak de yhok oli yik yono Yakub wak fobi Kanaan. 26 Ei yrana hatot man ou yto: “Mam mono, nfe wet Yusuf wron sonat! Ou le ma wabe na wafle wa slonti fobi Mesir kadio kat!” Ei yrana tahak ni ekei yrioro fak fe yin yono Yakub, mde ou wleli satmor kat, wabri om mitian deri. 27 Ou woso kdie oli sba ni hra Yusuf wbahe ei yrana man ou, ofo wsmit fot kereta hra Yusuf whnak yka yibe ywiehla fien ou, mde wabri om msiaba oli wkashok. 28 Ofo Israel wahin wto: “Nan nrana ni ytol wa tet tfe wet Yusuf wron sonat. Tet tain thot ou sba se taigi.”