Yusuf Wadon Wamon Wai Waliwet Wai, Wto Ei Ysliak Ou Wfe Met
44:1-17
44
Yusuf wbahe ou wfe na dihan, na wafle hra wasiokti bol ou wa, wto: “Nlouk adit na dlai yfe karong ei yka, nhlik gandum kayi de ytatol yidien keledai yotik, ofo ytol. Ofo nlouk oli yfe pitis yka nsalit, nhlik oli yik karong ygiet yfe wat-wat.
2 Ofo tet tfe met mabot, met perak mabot kom, nhlik mak wet wakyau wfe karong magiet madien fot pitis ei.” Ofo na dihan ou wsiok kayi mde le hra Yusuf wbahe fe ei.
3 Tali melek deri fo, wedla ei yehin yka, ykami, ofo yidien yfe keledai yein. 4 Yhok kmo latiot yehin kota yein, ofo Yusuf wbahe ou wfe na dihan ou wto: “Nsese nbakorwain wedla ei! Nen nrat, ofo nrana man ei mde le ke: ‘Mam msiok ni ybot yin nan, mahin nan nka nsiok ni yisgia yin mam mibe?’ ” 5 Met om, met hra tet tfe na wafle ou wako kla madien fot wlan ni fem! Hra nan nsiok ni yisgia yin mam mibe?”
6 Mde ou wrat ei, ofo wrana kadio kat ni ekei yin ei. 7 Ofo ei yrana man ou yto: “Hra mam mfe na kohok nen nrana man mam mde ke fe me? Nen nfe na dihan mam, mam mnok dait msiok ni masgia mde okom. 8 Mam mke fot mehin fobi Kanaan motik msalit oli pitis hra mam mhot yik karong ygiet. Mam mke misliak oli dait perak emas mrem mahin oli dait nen nfe na wafle ou wfe bol. 9 Nto nen ntatiere fe mam mikan ke misliak ni mrem, ofo ou le ma nen nska kat wkak, ha mam mke mibe deri na kawor min na kohok nen.”
10 Mde na ou wsamenie wto: “Ni hra nen nrana om mbot. Tet taisi. Mahin deri, na hra wsiok met om, ou le ma wabe kawor wan tet, ha nan nke tet thirit dait satian mre man nan.”
11 Ofo ei yikan ei ykosia kat tamli karong ei, ylak yse fobi aiti. Oko fo, ytwan hewain wat-wat. 12 Na ou wto wsmit hewain ei yfe karong wat-wat, wahenek wahin wet waflesa wfe karong kawuak de wak wakyau wfem. Mde ou wtatiere fe met om mak Benyamin ou wfe karong. 13 Yhot fo, yikan kadio kat ei yeliek, ykodihak yfe not trik ei, ylak oli karong yse keledai, ofo ysalit oli yse kota.
14 Yusuf wak sonat bol fo, Yehuda wadien wamon wai waliwet wai yloit yse bol mabri ykatawok kawuak de yti yse fobi yik ou wbariomo. 15 Ofo Yusuf wrana man ei wto: “Hra nan nsiok ni masgia man tet fe me? Hra nan nnok dait na wafle tet tsae ni lan, thot nan nsiok ni masgia man tet?”
16 Mde Yehuda wrana wto: “Ni mit ma mam mrana man mam mfe na kohok nen? Ni mit ma mam mrana mabe se nen nnok mam msliak dait ni kom? Mahin Nago wolot fe ni hra mam msiok yisgia mlak diaman yidien kamuolo, ni ekei le ma yhata kat. Bo hra ke mam mibe kawor min na kohok nen, mam kadio midien fot wet hra nai ytatiere fe met om.”
17 Mahin Yusuf wto: “Hau, tet tsiok dait satian mrem mde hra ko mdain. Tet thirit deri na hra nai ytatiere fe met om. Nan nikan man hra ekei nsalit oli kadio kat nse nono wak. Nan nbot deri.”
Yehuda Wto Wabe Kawor Wdanhok Waliwet Benyamin
44:18-34
18 Ofo Yehuda waka wataren kat wse Yusuf ofo wrana wto: “Nai fe na na kohok nen, nhnak bakoko nen nfe na dihan tet trana firi ni mre yin nen. Nen nfle mde le Firaun, mahin ntrere dait tet tala. 19 Kwan, nen nfe na dihan mam mka mik ko, ofo na kohok nen nefitwain man mam nto: “Nan nono wron sonat? Niliwet mres sonat?” 20 Ofo mam mto: “Mam mono wtrar wale. Ou wadien sonat mam miliwet wasase kat. Mam mono wkafe ou wadien wtrar wale, wsa om mririk. Wamon wadien wemem la yeigi wale. Ou wmres deri wron sonat. Wono wtik wkaso man ou.”
21 Ofo nen nbahe nto: “Nan nein nwiehla fien niliwet ou, se bo tet thot ou.” 22 Mahin mam mrana hatot man mam mfe na kohok nen mto: “Mam mto mkein kat miliwet ou wahinti kat wono, ofo wono waheit wkak.” 23 Mahin nen nrana man nfe na dihan mam nto: “Nto nan nka oli nidien dait niliwet, ofo nan nhot dait oli tet.” 24 Mam mein oli mse nfe na dihan mono ou wak, ofo mam mrana hatot man ou mabe ni hra tet tfe na kohok nen nrana ei.
25 Ofo mam mono wbahe wto: “Nan nein oli nse ale, nkain oli ni eit mre yin faf.” 26 Mde mam mto: “Mdain, mam mein slok dait. Yo, nto nhnak mam motik miliwet oko fo, mam mein wata, ha, nto ntek miliwet okou wain dait, ofo mam mhot oli dait na kohok ou.”
27 Ofo nen nfe na dihan mono ou wto: “Hra tet tsmian om mkafe deri wet lak. 28 Man ou wain wahin tet tak, ofo tet tnok deri tto: ‘Binatang yiyaka yatan kawuak wde wkak.’ Kamuolo oko fo, tet thot dait ou. 29 Nto nan notik oli man ko wahin tet tak wak ale wkak oli, ofo nan nsiok na trar sa ririk tet tkak, trwe fe tfe wet.” Ou wrana mde le eke.
30 Yo ma, mto wet ou wadien dait mam msalit oli mse nfe na dihan tono ou wak, ofo tono hra wten wkaso man wfe wet, 31 wto whot wfe wet ou waka dait, ofo wkak. Nan nfe na dihan mam bo msiok na sa ririk mono ou wkak fe ou wrwe kawuak de waigi wse Mla Sminggir. 32 Mahin nen nfe na dihan tet tkafe satian fe wet ko wan tono. Tet tto: “Tono, tet tkadoin man nen tet tsalit tadien wet ko. Wet ko waka oli wse nen nak. Wto wdain, ofo tet tkafe satian mafle man nen kawuak de tkak.”