Yusuf Waliwet Wai Wamon Wai Yein Oli Yse Mesir
43:1-34
43
Oko fo, katot wfle sonat wak fobi Kanaan.
2 Mde ei yeit ni eit man hra ykain yehin Mesir ei ydain wale, ofo yono ou wbahe ei wto: “Nan nein oli nse ale, nkain oli ni eit mre yin faf.”
3 Mahin Yehuda wrana man wono wto: “Hau, mam mein slok dait, yibe na wafle ou wtrere mam wto: ‘Nto nan nka oli nidien dait niliwet, ofo nan nhot oli dait tet tsifuon!’ 4 Tono, nen nhnak mam miliwet Benyamin, ofo mam mein mse ale, mkain oli ni eit yin faf. 5 Mahin nen nto nhnak dait wet oko, ofo mam mein dait mse ale yibe na wafle ou wrana man mam wto: ‘Nan nka fo, nidien niliwet ou waka fot. Nto nidien dait, ofo nan nhot dait tet.’ ”
6 Israel, ou le ma Yakub, wrana wto: “Taha! Nan notik ni masgia okom nan nrana mak ko fe me? Hra nan nik ale, nrana nan niliwet ko wabe?
7 Mde ei yto: “Mam mrana tahak yibe na wafle ou wefitwain skayit-yit wto: ‘Nan nono ou wron sonat? Nan niliwet mre kdie latiot?’ Ofo mam mrana hatot kadio kat ni ke yin na wafle ou. Mam mnok dait mto bo ou wbahe wto mam midien miliwet ou wain fot wse ale.”
8 Mde Yehuda wto man wono Israel wto: “Nhnak wata wet okou wadien fot mam mein, ofo mam mein kawuak le hra ke. Mto mdain fo, mam midien fot nen, wet mam mi, faf fkak kadio kat fe ni eit. 9 Tet tkadoin man nen tto bo tet tsalit oli wet oko wse nen nak. Mto mdain fo, nhlie fe wet oko wan tet, mde tet mres tkafe satian kawuak de taigi fali. 10 Faf fleli sawuan deri mok lak fsiok dait ni mrem. Kwan nen ntek dait wet oko, ofo mam mein wale mse ale mka oli mao lak fem.”
11 Yono Israel wrana man ei wto: “Mto mde ke fo, tet thnak tfe wet wadien nan nein, mahin nan nsitodo! Nsiok wati nde le ke: nhlik wat-wat ni ybot yehin fobi ko yin kya nan nfe yibe nhliemen yin na wafle ou, se wsablit mbot oli man nan. Ofo, notik komik balsam mre, hok mre, warak mre, rempah-rempah mre, wkoit sba yfuon mre, yidien fot wkoit kewi yfuon mre. 12 Notik fot pitis yihmat ei yidien fot man yifi ei. Yibe pitis yihmat man hra nan nhot yik karong ygiet ekei nsalit oli, yibe kwan firi wa ko bo nai yhlik sele ysalit oli yse karong yibri. 13 Yo, nan nidien fot niliwet okou nein nidien hra ko nse na ou wak ale. 14 Nago hra waslonti kadio kat ni whnak na wafle ou wsablit mroro, ou wbahe kat nan nidien namon Simeon hra nai yhirit sonat ale, nidien fot niliwet Benyamin, nan nsalit oli kadio nse tet tak. Mabe tet, taliaksi tto nan nik ale, bo nisak, ofo tet tde sie?”
15 Ofo ei yein tamli yotik ni tasa yibot ei yidien pitis ei, yein yidien fot yiliwet Benyamin kawuak de yhok yik Mesir, yein yse Yusuf wak.a 16 Yusuf wsmit lien fo Benyamin wadien fot ei ykro yik wbariomo ofo wbahe na dihan hra wslonti bol ou wam wto: “Nen nadien twa na dla kei yein yse bol tet ta, ofo nkerek erwas, nfosik kein ni eit. Bo tali fle tet taka, tadien na dla ke mam meit sisi ni.”
17 Na dla ou wsiok ni hra Yusuf wbahe. Ou wadien twa ei yse Yusuf wfe bol. 18 Ei yhok yik bol ou wa, mde ei yeliek ytrik dait yse bol mabri yibe ei ynok tmol yto: “Nai yotik faf fka fse bol mabri ko yibe pitis hra kaman nai ysalit oli yhlik yse karong yibri hra faf fi ei. Na wafle ou wsin wlalo wslon faf, whirit faf fibe kawor, wlouk kat fot faf ffe keledai yin ou wkain.”
19 Ei yitaren Yusuf wfe na dihan wak bol sidiefta ofo yrana ni fe ou yto, 20 “Na Kohok, nen noso wain mam mrana firi ni mre. Kwan mam mka mkain ni eit mik ko, 21 ofo mam mein oli motik ni ke mese mik fan kedi. Mde mam mtwan karong mam mfe msmit mak karong yibri pitis mam mi wat-wat, ytatol kadio kat, ybries yik karong magiet. Mde hra mam mka oli msalit oli pitis o le mke, 22 yidien fot pitis yifi hra motik mkain oli ni eit. Mam mnok dait na man sio ma hra wlak oli pitis yihmat yik karong magiet ekei.”
23 Mde na dihan ou wrana wto: “Mdain. Nan neliek amot mala! Kwan tet twien wale nan nfe pitis ei. Nan nfe Nago, Nago hra nono wfe, ou le ma watsiofo he nan nhot pitis ekei yik karong yibri.” Mde na dihan ou wain wkrit kat Simeon whok wahin wi hirit, wadien twa ou whok wse ei yik hrede ra.
24 Mde na dihan ou wadien kadio kat yloit yse Yusuf wfe bol mabri, whnak fot klam mabe ei yware yteit, whnak fot klawleis yibe keledai yeit. 25 Ei ysiok hao yfe ni tasa ei, yibe ei yoso bo tali fle fo na wafle ou waka wadien ei yeit sisi ni.
26 Tali fle fo, Yusuf waka wse bol ou wa, mde ei yorik yteit sia yse fobi, ysaesik yhnak ni tasa ei yin ou. 27 Ofo ou wefitwain wto: “Nan nde sie? Nan nono, na trar hra kwan nan nrana fe, ou wde sie? Ou wron sonat afe waigi wale?”
28 Ei yrana yto: “Nai fe nau na kohok, mam mono, nen nfe na dihan ou, wron sonat. Ou wbot kat deri.” Mde ei yorik yteit sia yse bet ysaesik oli yin ou.
29 Yusuf wsmit hewain ofo wsmit Benyamin, waliwet walolon wakyau, mde wefitwain wto: “Nan niliwet wasase hra nan nrana man tet, ou le wko?” Ofo ou wto man ou wto: “Nago watsiofo tfe wet nen!” 30 Mde Yusuf wabri mmosortek wabe whot oli waliwet walolon, ofo ou whok kat wdihar wi hra mahlok, wto nai yhot dait ou wawo. Ou wtrik wse sit ou wam wabe wawo fe waliwet ou.
31 Wdain fo, wware kat wsifuon, wkein kat wkan okom mtodo, ofo whok oli wbahe wto: “Yo ma! Nriak ni eit!”
32 Mde, nai yriak ni eit, Yusuf ou wat wat ou wa, wamon wai waliwet wai ei yeit wat ei yi, yo, na Mesir yeit wat ei yi. Yibe na sa Mesir yeit lok dait ni yidien na sa Ibrani. Ei yto na sa Ibrani ybhait, de na Mesir deri yibot, ykohok. 33 Yusuf wamon wai waliwet wai yleli yik wbariomo, mahin waflesa kawuak de wakya kat. Mde ei ysmit frit-frat man ei yidien man ei, ynok saswain ni. 34 Fe hra na dihan ei yriak ni eit yehin Yusuf wi ou wa, yhnak yin yeit, mahin ei yriak ni eit mao mahot yin Benyamin wat wewer wahin ei. Mde ei ykashok yeit ni, yoko anggur yidien ou kawuak de ykesit kat.