Yusuf Wamon Wai Waliwet Wai Yein Yse Mesir
42:1-38
42
Yakub woso nai yrana fe nai ysafo gandum mak Mesir. Ofo wrana man wfe wet ei wto: “Nan nleli fe me? 2 Tet toso fobi Mesir madien gandum warok. Nan nsidik nein nse ale nkain mre yin faf feit. Ofo faf feigi dait fe ni eit.”a3 Mde Yusuf wamon wai, waliwet wai, yikan yahar le ma yein ykain gandum yse Mesir.
4 Mahin Yusuf waliwet walolon kat Benyamin, Yakub whnak dait wain wadien ei wabe waliaksi wto: “Bo wkak wak fan kedi.” 5 Oko fo, Israel wfe wet ei yloit fot yse na marok hra yein ykain gandum yik fobi Mesir, fe hra fobi Kanaan madien fot tolo katot fle ou.
6 Na hra wsafo gandum man na marok o le ma Yusuf, hra wabe na wafle waslonti fobi Mesir. Oko fo, Yusuf wamon wai waliwet wai yhok fot, ysamorik yin wteit olo kawuak de yorik ysifuon yse bet aiti. 7 Yusuf whot fo wamon wai waliwet wai, ofo wnok tmol ei, ofo wsiok wkan om mde ou wnok dait ei. Ou wde deri na wat. Mde Yusuf wtrere ei ofo wefitwain wto: “Na man sio ma nan? Nan nehin sio?”
Mde ei yrana yto: “Mam mehin fobi Kanaan. Mam mka mto mkain ni eit.”
8 Hra eke fo, Yusuf ou wmres wnok kawuak deri ei, ha ei ynok dait ou. 9 Mde ou wnok tmol oli ni hra kamuolo wasamik yin ei. Ofo Yusuf wrana wto: “Nan nke nibe nai ykelek fobi! Nan nka fe nsmit sas fobi ko nto mta mahin sio ma nai ykro fan dait!”b
10 Ei yto kein yto: “Mdain, na kohok. Nen nfe na dihan mam mke mka deri fe mkain ni eit. 11 Mam mke mono mres. Nen nfe na dihan mam mke nai ybot deri, mibe dait na kelek.”
12 Mde Yusuf wtrere kawuak wto: “Hau, tet thana wale nan nke nka fe nkelek fobi kom, nto man sio ma nai ykro fan dait.”
13 Ei yto oli man ou yto: “Na dihan mam mke mikan yahar teit lak. Mam mono mres wak fobi Kanaan. Mam miliwet kahlia kat waheit wadien mam mono, wadien man kdie ou, ou wasak wale.”
14 Mahin Yusuf wto: “Mtol wale! Ni hra trana wale. Nan nke nibe kayi na kelek! 15 Tet tsiok nan nkesi ni mde le ke. Tet tfafti kat Firaun wkedi maisti kat nan. Nto niliwet kahlia oko waka dait, ofo nan niheit kawuak nik fobi ko. Nai yaworti nan. 16 Tet tbahe na ou mres wahin nan nik wain wwiehla fien niliwet oko waka. Ofo man hra yiheit ei, tet taworti kawuak de nan niliwet ou whok waka wak sba ko. Mde le ke tet tnok nan nkesi tkoin afe, nkesi dienen deri. Nto niliwet ou waka dait, tto tkoin tfafti kat raja whalie, nan nke nibe kayi kaisin nka nkelek fobi!” 17 Ofo Yusuf waworti yikan kadio kat ekei yese amuk tolik yik bui mabri.
18 Amuk tolik fo, Yusuf wrana man ei wto: “Nsiok mde ke, ofo nan nron lis, wa tet taliak man Nago hra tet toso wain ou. 19 Nto nan nbot, ofo tet thirit dait nan kadio. Na wmres deri waheit wak bui mabri kom, man ei yhok yein, yotik gandum yein yse nono wadien neme mai yik yibe ykatot. 20 Oko fo nan niliwet wakyau notik waka wse tet tak ko, se bo tto nan nto tkoin ni, ofo nan nkak dait.” Ofo ei ysamenie fe.
21 Mde ei yrana oli man ei yto: “Faf fke fkafe satian maflem man faf filiwet, wabe kamuolo faf fhot ou wsablit mmosortek, wkader kohok man faf, mahin faf fnaba kat. Oko le ma molot fe he na ko wolo man faf fde fkakatek feu wadien waworti faf.
22 Ofo Ruben wrana man waliwet ekei wto: “Yes! Nan noso dait ni hra kamuolo tet thar kat tto: ‘Nan nsiok amot ni masgia man weka ko wala, wa basak ou wfe hen om wsidik maka mkait faf.’ Hra o le ma mhok mse nan nsifuon, se nan nhot.”c 23 Ei ynok dait wata Yusuf le wko, mahin Yusuf wnok wale ei ysalom, ni hra yrana ei. Ei ynok dait ou woso wnok krek ni hra ei yrana ekei, mabe ou wrana ni man ei wsalo Mesir, mde wbahe na wat wrana kein madien salo ei yi.
24 Yusuf woso ni hra ei yrana ekei, wahinti kat ei, ofo wawo. Mde wsalit oli wadien ei wrana ni. Ou wbahe nai ykamti Simeon waka yhiriati ou wak ei ykmuon, yikan marok yhot kadio kat.
25 Ofo Yusuf wbahe ou wfe wedla ei yhlik gandum yik ei yfe karong wat-wat yidien fot ysalit hlok ei yfe pitis yka, ykaka yse ei yfe kmodikma na mna ei yfe, ofo yhlik oli yse karong mabri. Ou wbahe fot nai yhnak ni eit dianan mabe yeit yik fan mkedi. Ofo na eke ysiok mde le Yusuf ou wbahe. 26 Ofo ylak kadio kat yfe gandum ei yik keledai, fo yein yehin oko, yto ysalit oli yse fobi Kanaan.
27 Amuk wak fan, ofo yese taban. Ofo na mre wtwan samne-mna wfe karong madien gandum, wto whnak yin keledai kadio ei yeit. Mde ou wsmit ro kat mak karong magiet ago pitis ekei, nai ysalit oli, yhlik yik karong mabri. 28 Mde wto: “Woi! Nan nhot la, pitis! Pitis tet ta o le ma nai ysalit oli yik karong mabri ke!”
Ofo yikan ei yhot kadio kat, mahin yteit yrioro, ykahiowain kat, ysmit frit-frat ei, ofo ynok saswain ni yto: “Ni mit ma mfe he Nago wsiok ni ke yin faf?”
29 Mde ei yhok oli yik yono Yakub wak fobi Kanaan, ofo ei yrana wain fe ni hra na wafle waslonti fobi Mesir wtrere sgia ei. 30 Ei yto: “Na wafle oko wrana ni mkanas yin mam. Ou wolo*** wto mam mke nai ykelek fobi. 31 Mde mam mto: ‘Hau, mam mke nai ybot deri, mam mfle tirik deri, mam mibe dait nai ykelek. 32 Mam mikan kadio kat yahar teit lak. Mam mono mres. Mam mikan ekei, mre wasak wale, wadien wakya kat waheit wadien mam mono.’ ”
33 “Na wafle ou wrana wto: ‘Mde ke fo tet tnok tto nai ybot le ma nan. Na okou wmres wak ko, waheit wadien tet, ofo nan nikan man ke notik gandum yibe nai ykatot yik bol nan ni. 34 Nan nein oli nwiehla fien niliwet wakyau oko waka, ofo tet tto nan nibe nai ykelek dait, yo nai yibot deri. Ofo tet tsalit oli namon kou wain wse nan nik. Ofo tet thnak tto: “Nan nka nsafo ni, nkain ni, nik fobi ko.’ ”
35 Ei ytwan kat gandum yehin karong ofo ysmit yik karong yibri wat-wat kmodikma yidien pitis yik yibri ra! Mde ei yidien yono yeliek karmiak kat. 36 Ofo Yakub ou wtrere man ei wto: “Hra nan nto nsiok wet tet ta ei yisak-sak fe me? Nan nolot fe kawuak de, tet tfe wet Yusuf wasak wale wadien kamuolo kat, madien ko Simeon wasak fot. Nan nto nka nwiehla fien oli Benyamin, mdain! Ni yrok hra ekei yka ysiok sgia tet!”
37 Ofo Ruben wrana wto: “Tono, nen nhnak wata Benyamin oko norsfe wan tet. Tet tkadoin man nen tto bo tet tsalit oli ou waka wse nen nak. Mto mdain fo, nen nska wata tet tfe wet yidla lak kei.”
38 Mahin Yakub whar kat wto: “Mdain, nan notik dait tfe wet Benyamin wabe wamon Yusuf wkak wale, ou wmres deri wahin wemem mak o le waheit wron. Tet tke ttrar wale, tsagien ko mririk. Mahin nan nto nidien wak ale se wkak oli, ofo nan nsiok tet trwe taigi tain tse Mla Sminggir.”