Firaun Wasamik Ni
41:1-36
41
Mase der lak yewer kat, ofo Firaun wasamik ni. Wasamik whot wto wkro wak kla Nil wtefit. 2 Mde wsmit man fo, sapi mtalak yeren yehin kla ale. Ykan ei ybot, yfle-fle, yka yeit klawleis yik kla mtefit. 3 Mahin fo wsmit oli man kla ale sapi mtalak man, ykan ei ysgia kat, yfalek ykodiot, yklik drien, ysbiele koit krierek. Ei yhok fot yehin kla ale yka ykro lok yidien sapi hra ybot ei yik kla mtefit. 4 Ofo sapi man hra ysgia ei yeit sapi mtalak man hra ybot ei. Mde Firaun wrioro wsifuon yhak.5 Ofo wsalit wsifuon ykafit oli wase, mde ou wasamik oli mao lak fem. Whot gandum molo mres, mhada mtalak man ei yhok, yfuon ybot, yrefe ybot. 6 Msalit mhada oli mtalak man ylelen, yfuon ei ykadios, ykodiot fe foron wtbat wfrio wahin tali whok.
7 Yhada man hra ykadios ykodiot ei, ytelek yhada mtalak man hra yfuon yrefe ybot ei. Ofo Firaun wsifuon yhak wnok tmol wto: “Tahana tet tasamik ni.”
8 Uwade fo wsablit madrat kat, mde ou wbahe nai ywit wuon ei yidien na hra ysae ni yik fobi Mesir ei yka kadio kat. Firaun wrana fe ni hra ou wasamik yin ei, mahin na mre wrana fe dait kat ni mre yin ou.
9 Mahin fo na wafle wasiok kla ou wrana man Firaun wto: “Nai fe na, na kohok nen, hra ke tet tnok tmol ni hra tet tfe ysgia yidien kamuolo. 10 Mde oko fo, Firaun nen ntrere man nfe na dihan mam, naworti tet tadien na wafle wasiok roti la mam mik na wafle walolowain nen ou wfe bol. 11 Mde amuk mre, tet tadien na wafle wa siok roti, la mam misamik wat-wat ni. Tet tasamik wat tet ta ni tau, ou wasamik wat ou wa ni wau. 12 Mik ana fo, mam midien sisi na dla fori mreu, na sa Ibrani hra wabe na dihan wan na sebe wafle hra walolowain nen. Mam mrana mam mfe ni yisamik ei yin ou, mde wrana hatot yin mam ni yisamik mam mfe fe mres-mres. 13 Mde kayi le eke, wrana hatot yin mam ni ei ytatol kat. Tet tsalit oli tse ni ysiok tet tam, mahin na wafle waoyo roti nai ybadan lo ou.
14 Mde Firaun wbahe nai ywit fien Yusuf, ybahe kat whok tamli wahin kmain wi aworti nai. Whok fo, wkok wata ygien, wtrik not yifi, ofo wain whok wse Firaun wak.
15 Firaun wrana man ou wto: “Tet tasamik ni, mahin na mre yrana hatot dait man tet. Mde tet toso nai yto nen noso deri ni yisamik, ofo nen nrana hatot fe.
16 Yusuf wto kein wto: “Tet mres ofo tnok dait, mahin Nago sok. Ou le ma wrana hatot fe ni ke yin Firaun nen, yein fe tet tak.
17 Ofo Firaun wrana man Yusuf wto: “Tet tasamik wde le ke. Tet tkro tak kla Nil mtefit,
18 tsmit sapi yikan mtalak ybot yfle yhok yehin kla bri ale, yeit klawleis hra yik kla mtefit. 19 Oli kdie fo, tet tsmit mse kla ale, sapi wat yikan mtalak yhok yse tlein. Ei ykan ysgia kat, ykodiot, ysbiele koit krierek, yklik ei ydrien. Tet thot dait latiot sapi ysgia yde ke yik fobi katak Mesir ko. 20 Ofo sapi man hra ysgia ei, ytelek oli sapi man hra ybot ei. 21 Ei ytelek, mahin ykan ei yfle dait, ysgia kawuak. Mde tet tsifuon yhak, tnok ni hra tasamik o le wko.”
22 “Mde tet tase oli, tet tasamik thot gandum molo mres mhada mtalak man hra yfuon yrefe ybot. 23 Tet tsmit oli fo gandum mhada mtalak man hra ysgia, ykadios, ykodiot fe foron wtbat wahin tali mhok. 24 Yhada man hra ysgia ei ytelek oli yhada man hra ybot ei. Tet trana wale ni hra tasamik ke yin wale wuon yidien na hra ysae ni, mahin na mre yrana hatot dait man tet.”
25 Mde Yusuf wrana man Firaun wto: “Ni lak hra Firaun nen nasamik ekei, yrana sisi deri ni mres. Nago wrana hatot man Firaun nen ni hra bo ou wsiok. 26 Sapi mtalak man hra ybot ei yrana fe der mtalak. Gandum ysa man hra ybot ei, yrana fe fot der mtalak ei yidien ni eit wlek-lak. Ni yisamik lak ei ysa sisi. 27 Ofo sapi mtalak man hra ysgiai yhok wales yse tlein yrana fe der mtalak man kdie hra ysgia. Gandum ysa mtalak man hra ysgiai yrana fe fot der mtalak man ysgia ekei. Ei yibe tolo katot fleu.”
28 “Tet trana krek wale man Firaun wabe Nago wrana hatot man nen mabe ni hra bo ou wsiok. 29 Nen noso krek, bo der mtalak man ale fo yidien ni eit wlek-lak kamyi kat wak fobi Mesir kadio kat. 30 Ofo der mtalak man oli fo, tolo katot fle whok. Tolo katot fle whok, mde nai ynok dait oli ni eit wban hra wadien kamuolo der mtalak man ei. Ei ynok deri mabe melin fle wsiok fobi msgia. 31 Nai yhot oli dait ni eit wban hra kamuolo wak fobi Mesir kom, mabe melin mfle kamyi kat. 32 Nen nasamik mao lak yibe Nago wto wsiok toron yidien bot ke.”
33 “Mde ke fo, Firaun nen ndihar krek na wasablit lis hra wnok roro wain ni, nkosia ou wabe na wafle waslonti fobi Mesir kadio kat. 34 Nen nebet fot na mre yibe na tmak hra yein ytowasi gandum, ylak yse hate. Nen nbahe na Mesir kadio kat yhnak yehin safok yahar ei, ysan safok fe lak, ei yiheit ykain mtadolik. 35 Der mtalak man ale fo, Firaun nen nbahe na tmak eke ytowasi fien gandum yehin biele na Mesir yik, yka ylak yik hate yik kota kadio kat, yibe ni eit krek. 36 Wabe basak katot fle whok wase der mtalak. Ofo nai yeigi dait, fobi Mesir msgia dait, mbot kawuak.”
Yusuf Wabe Na Wafle Wasiokti Fobi Mesir
41:37-57
37 Firaun wadien wfe na tmak kadio kat ykashok kamyi kat fe sin hra Yusuf wrana. 38 Mde Firaun wrana man ei wto: “Na man sio man hra faf fhot whon wadien Nago Wawuam, wnok karmiak kat ni, wde Yusuf ko?”
39 Ofo Firaun wrana man Yusuf wto: “Nago le ma wrana kadio kat ni warok ko wan nen, ofo nen nabe na sablit lis nnok roro wain kat ni newer na marok. 40 Tet tkosia nen nabe na wafle wa siokti bol tet ta mafle okom. Na marok kadio kat yoso wain ni hra nen nrana om, ofo ei ysiok fot. Tet deri le ma tfle tahin nen nak.a 41 Madien hra ko fo tet thnak nen nabe na wafle waslonti kadio kat fobi Mesir kom.” Ofo Firaun wtli kat wfe cincin cap meterai wakohok om mahin wna tofo, wdan man Yusuf wna tofo. 42 Oli fo ou whnak not trik ylis, not nai yifle yfem, man Yusuf wtrik, madien fot sabet elek wamak mak wdioro. 43 Ofo Firaun ou wbahe Yusuf wabe wakil, warin wak kereta hra ma lak fe om. Na marok ei yik Yusuf wbariomo ei ywit yto: “Newer kat! Na wafle ou waka wain!” Mde le ke Firaun wkosia Yusuf wabe na wafle waslonti fobi Mesir kadio kat.
44 Firaun wrana man Yusuf wto: “Tet le ma tabe wata raja Firaun tak ko, ha nen nto nbahe dait fo, na mre dait ykosia yna yteit yik fobi Mesir ko. Ei yoso wata nen nrana ni.” 45 Firaun wfat Yusuf wkedi wabe Zafnat-Paaneah, mde wtwayit na dli mre man Yusuf wsmian. Om mkedi mabe Asnat. Mono Potifera wabe imam wak kota hra nai yto On.
46 Yusuf wase wale der 30 (na mre waigi whri wasin na wna yahar), ofo Firaun raja Mesir wkosia ou wabe na wafle. Mde Yusuf whok wahin Firaun wak, wain hewain wkohli fobi Mesir kadio kat. 47 Der mtalak man ke fo, fobi Mesir madien ni eit wlek-lak kat. 48 Der mtalak hra ekei fo, Yusuf wtowasi gandum wlak hate fe yik kota kadio kat. Hate man ekei yibe yik wi man okom, hate man ekei yibe yik wi man okom. 49 Yusuf wtowasi gandum wlek kamyi kat mde le kinti mak ompit ale. Nai yaher gandum hra nai ytowasi kawuak de Yusuf wto: “Yik wati! Naher oli dait, yibe wlek-lak kamyi kat!”
50 Katot dait sonat, ofo Potifera, imam wak kota On, wfe wet Asnat msois wet yidla lak yin Yusuf. 51 Man hra wet waflesau, Yusuf ou wwak wkedi wabe Manasye, ou le ma salo tkoin nai yto Nok Dait Oli, wabe wto: “Nago wsiok se tet tnok oli dait ni hra kamuolo nai ysiok ysgia yin tet. Tet tnok oli dait fot tono, teme, tamon wai, taliwet wai.” 52 Man hra wawet kdie, ou wwak wkedi wabe Efraim, ou le ma nai yto Sres, wabe wto: “Nago wsiok tet tsres tak fobi hra kamuolo tet tabe kawor, nai yhirit tet.”
53 Der mtalak man hra ni eit wlek-lak yik fobi Mesir oko wewer wale, 54 oli fo der mtalak man katot fle whok. Ni ke yhok ytatol yidien ni hra Yusuf wrana krek walem. Nai yrok yik fobi katak kom ykatot fe ni eit dait. Mahin fobi kadio kat ei, fobi Mesir tiktol deri le madien sonat ni eit.b 55 Na Mesir yeit wale ni eit ei yfe yfot wale mde ykatot, ywit man Firaun yto: “Nen nhnak ni eit yin mam meit.” Ofo Firaun wto: “Nan nein nse Yusuf wak. Nan nsiok ni hra ou wrana fe man nan!”