Firaun Wfe Na Dihan Lak Ei Yisamik Ni
40:1-23
40
Amuk kat wtato fo, raja Mesir wfe na dihan lak, na wafle hra wsiok anggur ykan yibe kla, wadien wanak na wafle hra woyo roti skafsiak-sak, la yikan lak ei ysiok ni masgia man raja ou. 2 Mde Firaun ou wtrere man na dihan lak ei, na wasiok kla wadien wanak na woyo roti, 3 wde wtrik fali la yikan lak ei yse bui, yik na wafle walolowain raja ou wfe bol, la yidien sisi Yusuf yik bui mabri.
Nai yaworti la yikan lak ei yese kawuak de dian kat yik bui mabri om. 5 Amuk mre oli fo, raja Mesir wfe na wasiok kla ou, wadien na wasiok roti ou, la yisamik wat-wat ni.
6 Uwade fo, Yusuf whok wse la yik, whot la yikan lak ei yleli ysamorik, ynok saswain ni hra yik ysablit ei.
8 Ofo yto: “Amuk wa ko la mam misamik ni, mahin na mre yrana hatot dait la mam mfe ni yisamik ekei yibe mit ma ei?”
Yusuf wto man la yikan lak ei wto: “Nago ou wmres deri ma wnok ni yisamik yrok ei. Yo oma, la nrana wain ni yisamik ei yin tet toso fot.”
9 Mahin fo, na wafle wasiok kla ou wrana fe ni yisamik ou wa wan Yusuf wto: “Tet tasamik thot omos anggur molo mkro mak tbariomo. 10 Omos anggur oko mma tolik, mahin omos om malelen kmo, ofo mkanwak, ofo mhada ei yhok fali ykan ei yrefe. 11 Mak tet tna ko tsiokti Firaun wfe met, mde tet tkodok anggur mkan mkla msror mse met mabri. Ofo tet tatik thnak man Firaun. O deri le mkom.”
12 Mde Yusuf wrana man ou wto: “Ni hra nasamik ou wde le ke. Mma tolik ei yibe amuk tolik. 13 Amuk tolik oli fo, raja wkosia nen nsiokti oli ni kfi hra kamuolo nsiok yin ou, nhnak oli kla man ou. 14 Mahin bo nen nhok kayi le mke, ofo nnok tmol fot tet. Nrana wanik tet ta ni ta yin Firaun ou. Nrana man ou se wkrit kat tet tahin bui kom. 15 Kamuolo nai ytain fali tet tahin fobi na sa Ibrani. Tak ko fot tet tsiok dait ni masgia mrem hra molot fe nai ytrik fali tet tse kmain mabri ko.”
16 Mde na wafle hra woyo roti whot fo wanak wfe ni wasamik ou wbot, ofo ou wrana fe ni yisamik ou wai yin Yusuf wto: “Tet tasamik tto tsiwit keranjang tolik yik tasa ago yhon yidien roti. 17 Hra mse kahlia kat ago, tlak kue yskaheit-hat yin Firaun, mahin klen yka yeit kue hra yik age. Ni deri le mkei.”
18 Mde Yusuf ou wto kein wto: “Ni hra nen nasamik o le ma flie kom: Keranjang tolik o le amuk tolik. 19 Amuk tolik oli fo, Firaun wbahe nai yka yehir nen nsafakos, mahin fo nai ylouk nkan tkoin ybadan nlo nan hro masa ago, mde klen yka yeit nkan fokot ei.”
20 Amuk tolik man oli fo, Firaun wadien sisi wfe na tmak yrok ei yeit konon ou wfem. Ou wbahe wkrit fien kat na wafle wasiok kla wadien na wafle wasiok roti la yhok kat yehin bui, yka yse na kohok marok ei ybariomo. 21 Man na wafle wasiok kla ou, Firaun wkosia ou wslonti oli ni hra kaman wsiok lokdi om. 22 Mahin wanak man wasiok roti ou, Firaun wbahe nai yehir wdiorom, ofo ybadan wkan tkoin om mkrorok kakrok mak hro mata sla ago. Ni hra Yusuf wrana yin la yikan lak ei yhok ytatol yin ei.
23 Mahin na wafle wasiok kla wsalit wnok tmol oli dait Yusuf. Ou wnok dait kamyi kat.