Yusuf Wak Potifar Wfe Bol
39:1-23
39
Mahin na sa Ismael yotik wale Yusuf wain wse Mesir. Wak koit fo, ei ysafo wabe kawor wan Potifar, na sa Mesir hra wabe na sebe wafle walolowain Firaun, raja Mesir ou.2 Mahin Tuhan wadien Yusuf, wde wolot fe ni hra Yusuf wsiok ei ysres kadio kat. Ofo ou waheit wase kawuak wak bol na kohok, na Mesir ou, wfem.a 3 Potifar whot Tuhan wadien Yusuf, watsiofo kawuak ni yrok hra ou wsiok ei ysres.
4 Ofo Potifar wkashok fe Yusuf, wkosia ou wabe wkomot wan ou. Ou whnak fot man Yusuf wslonti ou wfe na kadio kat. Ou wfe hrien yrok ei ou worsfe yin Yusuf wsiokti kadio kat. 5 Ou whnak fle fe Yusuf wsiokti ni ekei, mde Tuhan watsiofo na Mesir ou wfe na kadio kat, fe hra Yusuf ou. Tuhan watsiofo kawuak ni hra yik bol mabri ei yidien fot biele. 6 Yo, ni yrok ei Potifar whnak kadio kat wale yin Yusuf wslonti. Yusuf wsiokti kadio kat, ofo Potifar wbahe oli dait ni mre ha, wbahe fe deri ni eit ou wa.
Mahin Yusuf okou wabe na dla wabot, wmnel karmiak kat. 7 Kyamre kdie fo, na kohok ou wsmian msmit Yusuf mde mbahoin mkesik ou. Ofo mwaini mto: “Naka se, nen nadien tet la fese!”
8 Mahin Yusuf wrana man na kohok wsmian om wto: “Taha! Ni hra yrok yik bol ke tet le ma tsiokti kadio kat. Na Kohok wnok saswain oli dait ni hra yik bol ko mabe whnak kadio kat ni ou wfe yin tet tsiokti. 9 Na mre ou wfle dait wewer tet wak bol ko, mahin na kohok ou wmres. Ni mres deri na kohok whnak dait man tet - o le ma nen, fe na kohok wsmian nen. Ni mit ma mfe he tet tsiok ni masgiam mafle kom, matik satian tiktol main mse Nago wak?” 10 Tali man tali man fo, na dli okom mbalalan Yusuf, mahin Yusuf woso dait. Ou waha wase lok wadien om. Ou waha fot wataren wkro lok wadien om.
11 Tali mre fo Yusuf warin wtrik wse bol mabri mabe wsiok ou wfe ni hra ou wsiok lokdi ei. Na dihan mre yik dait ko.
12 Ofo na dli okom mslonti not matrik ou wfem, mkein mto: “Naka nadien tet!” Mahin Yusuf wtainti kat not trik ou wfe mak na dli om mna, wsese whok wse tlein.
13 Na dli om mhot Yusuf wtainti kat not trik mak mna, wsese whok wse tlein, 14 ofo om mwit mse na dihan yik tlein. Ei yka ofo om mto: “Nhot la, kawor na sa Ibrani hra tsmian ou wkain ou wadien sgia faf! Wtrik wak sit tet ta, wto wamir tet. Mde tet twak tkader tkanas. 15 Tkader twak tkanas woso fo, waliak wtainti kat not trik ou wfe okom maheit, wsese whok kat.”
16 Mde Potifar wsmian myo not trik Yusuf wfem kawuak de msmian whok. 17 Whok fo, om mrana fe yin msmian mto: “Kawor hra na sa Ibrani nen nkain ou, waka wtrik wse sit tet ta kom whorot wto wamir tet. 18 Mahin tet twak, ofo wtainti kat not trik ou wfe kom, wtain whok wse tlein.”
19 Na Kohok ou woso ro kat ni hra wsmian om mrana ei: “Mde le ke kawor nen nfe wsiok tet,” mde ou wtrere kamyi kat. 20 Ofo na kohok ou wslon Yusuf, wtrik fali wse bui, bol hirit hra raja waworti nai. Mde Yusuf wtrik bui.
21 Mahin Tuhan wadien kawuak Yusuf, wkolihet hares om man ou. Tuhan wkororo na wafle wak bui ou wmro fe kawuak Yusuf. 22 Mde na wafle wa siokti bui whnak Yusuf wslonti na kadio yik bui mabri. Ni hra nai ysiok yik bol mabri ra, Yusuf wsiokti wsadir fe kadio kat. 23 Na wafle wak bui ou wnok saswain dait ni hra whnak wale yin Yusuf wslonti. Ou worsfe kadio kat ni yin Yusuf, mabe Tuhan wadien ou, watsiofo ni kadio kat ei ysres.