Yehuda wadien Tamar
38:1-30
38
Madien hra oko fo Yehuda wahinti kat wamon wai waliwet wai, wain wse krotia Adulam wnok wain kawuak na mre hra wkedi nai yto Hira. 2 Wak oko fo Yehuda wtafri na dli mrem mahin na sa Kanaan, Syua le wfe wet om, ofo ou wsmian om. 3 Wsmian kayi de na dli om mkmat, msois wet wadlau waflesa ou, ofo ei ywak wkedi wabe Er. 4 Mde om mkmat oli, msois wet wadlau wabri, ywak wkedi Onan. 5 Ofo mkafe oli wet wadlau wakyau, ywak wabe Syela. Oko fo, yese latiot yik Kezib.6 Ei yese kawuak de wet ei yfle, ofo Yehuda wien na dli fe wfe wet waflesa Er, mkedi le ma Tamar. 7 Mahin Er wiyaka, wsiok ni ysgia. Tuhan whot, wde wsiok wkak.
8 Mde Yehuda wbahe Onan wto: “Nen nain nlouk nkobon hra namon Er wagiti kat, se la nkafe wet yka ndanhok nhro yin namon ou.” 9 Mahin Onan waha whro wet yin wamon, fe ou wnok wto basak ou wkain dait ei. Ofo wsmian wata wamon wsmian om mahin, wsmian roro wain dait. Ou wkrit kat, wliokeit wflakse yhok yti yse tlein. Ou wsiok mde le ke fe waha wkafe wet yin wamon ou. 10 Tuhan whot ni hra ou wsiok ekei ysgia, ofo wsiok waigi fot wde le wamon ou.
11 Ofo Yehuda wrana man ware om wto: “Tamar mo, nen naheit nabe semit nak nono wfe bol, kayi de wet tet ta Syela ou wfle sba, ofo wsmian kayi na nen.” Mahin ou wkadoin lolot fe hra ou waliaksi wto: “Bo tfe wet wakyau wkak fot wde wamon lak ei.” Mde Tamar main mse mono wfe bol, maheit mak koit, mase kawuak.
12 Yese kayi de dian kat, ofo Yehuda wsmian, Syua wfe wet om, maigi. Yehuda wrwe mfot fo, wadien sisi wanak Hira, na Adulam ou, la yein yse Timna, yse nai ykerek ou wfe domba yigien.
13 Nai yrana hatot yin Tamar yto: “Nare wain firi deri wse Timna wabe wkerek wfe domba yigien.” 14 Moso mde le oko, ofo mtli kat not trik semit yfe, mhriet oli om, mhobor msam se bo nai yhana dait, ofo main kerek, mleli kein mak fan yata main mse Enaim, fan hoin mse Timna. Yibe Tamar mnok Syela ou wfle wale, mahin mare whnak dait om man ou wfe wet wsmian.
15 Ofo Yehuda whok waka, whot om mleli mak fan mtefit wto bosi na dli mdom yibe mhoborti msifuon. 16 Mde ou wwer wse om mak fan tefit wto: “Nen naka, tet tadien nen.” Wnok dait oli wata ware o le mom.
Mefitwain mto: “Nadien tet sadik ofo nhnak mit ma man tet om?”
17 Mde wto: “Bo tteye kambing wawet mre wan nen.
Ofo mto: “Nen nhnak esikti ni mit ma man tet?”
18 Ou wefitwain wto: “Tet thnak ni esikti mit ma om?”
Ofo om mto: “Nhnak nfe cap meterai, sabet yidien tiyen hra nen nsiokti angkom, nhnak yibe ni esikti yin tet.” Mde ou whnak kadio kat ni esikti ekei yin om, ofo ou wadien om, mde mkmat sros kawuak. 19 Mfot fo om main oli mse bol, mtli kat not hra mhobor msifuon madien fot not trik, mde mtrik oli not na semit yfe.
20 Kyamre kdie fo, Yehuda wteye kambing wawet ou wain fe wanak Hira, na Adulam ou, watik wain wto wskalofos fien ni esikti. Ou wain wdihar mahin wtiere dait na dli om. 21 Hira wefitwain na dla hra yese yik Enaim wto: “Na dli mdo hra mleli mak fan yata angko mak sio?”
Ei yrana hatot man ou yto: “Hau, na dli mdo mre mak dait ko.”
22 Mde ou wlelek wsalit oli wse Yehuda wak, wrana hatot wto: “Tet ttiere fe dait om. Mde na hra yik ekei yto: “Na dli mdo mre mak dait ko.”
23 Mde Yehuda wto: “Ni esikti ekei yin wata om, wa nai ytbekein faf. Tteye hewain wale, mahin nen ntiere fe dait om.”
24 Bo main mse mok tolik kayi, ofo nai yrana hatot fe man Yehuda yto: “Nare Tamar om mamir wat, mde mkmat wale.”
Mde Yehuda wto: “Notik na dli om maka, faf ftatik kat!”
25 Nai yto yotik om yein, mde om mbahe na mre yein oli yse mare wak yto: “Na hra wfe hrien ke le ma wkain kmat ko.” Mde mto fot mto: “Nahenek la, na sie ma ykain cap meterai ko, sabet ko yidien tiyen kom?”
26 Yehuda whana oli hrien ekei, wde wsamenie wto: “Om mto tkoin! Om mtian dait, ha tet le ma ttian, mabe tet thnak dait tfe wet Syela wan om msmian.” Mde, ou wadien oli dait om.
27 Mde na dli om mataren msois, ei yhana om mkmat tbouk wet lak. 28 Mde mto msois fo, wet man ou wna mhok malin. Mde na dli kaswuo hra mafan om mlouk fien kneis mahen om maka mkaitti mak wet wna malim, mto: “Wet waflesa le wko.” 29 Mahin wet ou wkein kat wnam mloit oli mse mkmat, ofo wet man ou whok walin. Ofo na dli hra mafan om mrana oli mto: “Hyee, nen nkanas nrok, le ma hra nhok nros sros!” Mde ei ywak wet ou wkedi wabe Peres, hra nai yto Ros Sros. 30 Mahin fo, waliwet whok fot wain heles, wna mali madien ni kaitti kneis mahen. Mde ei ywak ou wkedi Zerah, hra nai yto Wna Hen.