Yusuf Wasamik Ni
37:1-11
37
Ofo Yakub waheit wase kawuak wak fobi hra wono wase lalie walem, fobi hra nai yto Kanaan.2 Ojin trar hra Yakub wfe le mkom.
Hra oko fo Yakub wfe wet Yusuf wfle wsasia kmo, umur der 17 (yahar teit mtalak). Yusuf ou wadien sisi waliwet yese fat kadio kat hra Bilha madien Zilpa la ykafe ei, yikan kadio kat yidien sisi kambing domba, ni ror hra yono wfe ei. Waliwet wai ysiok ni yisgia, ofo Yusuf warin fali, wrana twa ni ke yse wono.
3 Israel, ou le ma Yakub ou, wten wkaso kamyi kat man wfe wet Yusuf wewer wahin wfe wet man ei, wabe wkafe wadien wtrar wale. Mde Yakub wsor not trik jubah malis hra mabot om man Yusuf.
4 Yusuf wamon wai waliwet wai yhot yono wten wkaso man ou wewer wahin ei, ofo ei ytadrot kawuak ou, mde ysadir lok dait yidien ou.
5 Amuk mre fo, Yusuf wasamik ni, mde wrana man wamon wai waliwet wai. Se oko fo, ei ytrere kamyi kat yidien ou. 6 Ou wto: “Noso kmiet ni hra tet tasamik ei: 7 Faf fik sisi kadio kat biele wabri, fsat gandum ei, fkaitti wat-wat ysafok-fak yrok. Ofo trioro fe safok tet ta okom mahin msidik, mkro trik. Nan ni ei ysidik ykro ykohili, ofo ykatawok ysaesik yin tet tam.”
8 Wamon wai waliwet wai yhlein yto: “Hyee! Nen nbahoin nto nabe na wafle nan mam, afe? Nen nsin nto nsiokti mam, afe?” Mde ei ytrere kamyi kat ou wabe wrana wasamik ni ou.
9 Amuk kdie mre fo, ou wasamik ni mre oli, ofo ou wrana oli man ei wto: “Noso kmiet ni waifi hra tasamik kou! Tali madien mok, twon yahar teit mre, ei ysaesik yin tet.”
10 Ni hra wasamik ou, wrana fot man wono. Ofo wono whar kat wto: “Nasamik sak-sak mit ma hra mde okom? Se nto nono tet tadien nemem midien namon wai naliwet wai, mam mka msaesik min nen?” 11 Ofo wamon wai waliwet wai ybait krek yidien ou, mahin wono wnok tmol deri ni ekei yik wsablit aiti.a
Ei Ysafo Yusuf Wse Mesir
37:12-36
12 Tali mre fo wamon wai waliwet wai yidien ni ror hra yono wfe, ei yein kawuak mde yhok yik Sikhem. 13 Yese amuk wtato kat fo, Israel wwit fien Yusuf wbahe wto: “Tfe wet, nen nnok wale namon wai naliwet wai yese fali ni ror faf fi yik Sikhem, ee? 14 Nain nhot fien ei yidien ni ror ei, ofo naka nrana hatot man tet!”
Yusuf wto: “Mko, tono tet tain!”
Ofo ou wahin lolik hra nai yto Hebron, wain kawuak de whok wak Sikhem.
15 Whok wak ra, ou wkro sas-sas sanwat ei, ou wse ta wse ta, wdihar wamon wai waliwet wai. Na mre wtiere ou wak oko. Na oko wefitwain wto: “Nen ndihar ni mit ma okom?”
16 Ofo ou wto: “Tet tdihar wain tamon wai taliwet wai. Nrana hatot bakoko yin tet, ei yidien ni ror yik sio mke?”
17 Mde na ou wto: “Ei yehinti kat wale ko. Toso mre wto: ‘Nan nka, faf fein fse Dotan.’ ”
Mde Yusuf wbakorwain wamon wai waliwet wai kawuak de wrat ei yik Dotan. 18 Wataren latiot wse yik, ofo ei yhana afat wale wahin ana, mde ysin fe yto yska ou.
19 Mre yto man mre yto: “Nhot la, na wasamik sawuan ni le waka ou! 20 Nan nka faf fska ou, fklat kat wkan wse se kak mabri aiti ko. Ofo faf frana hatot man fono, fto erwas yiyaka yatan wkak, ofo ytelek wale ou. Se faf fhot fto wfe ni wasamik ei yde sie.”
21 Mde Ruben woso waliwet wai ysin yska Yusuf, ofo ou whar kat mahin ei yik, wto: “Nska amot wala! 22 Nolio kat hen ou wam mala! Ha, faf fklat kat wata wse se kak mabri aiti mak wi sabarak kom! Nsiok sak-sak dait ni mre man ou!” Mde Ruben wain siya, wnok tmol mak wabri aiti wto bo wkotadet waliwet ou wahin ei yna, wkosia fien la ysalit oli yein yse yono wak.
23 Yusuf whok wak wamon wai waliwet wai yik, ofo ei ytli kat not trik malis, jubah mabot hra ou wfe om. 24 Mde ylouk yklat kat ou wse se kak mabri aiti. Se kak om mfalek, madien dait kla.
25 Ofo ei yleli yibe yeit ni eit. Mde ei ykobia ysifuon yhot na marok om mahin ra maka yidien unta. Na sa Ismael yka yehin Gilead, ylak rempah-rempah, balsam, yidien kyir hra mrnoin mbot hra nai yto mur, ei ysadiwir kat yein yto ysafo yse Mesir.
26 Mde Yehuda wrana man wamon wai, waliwet wai, wto: “Faf fto bo fska filiwet ou wkak, ofo flak diaman kak kou, ofo faf fkain mit ma ei? 27 Nan nka, faf fsafo ou wabe deri kawor wan na sa Ismael ke! Faf fsiok dait ni mre man ou wala, mabe faf fikan fi ou. Faf fhen mres. Faf fkan fokot mres.” Mde yikan ei yoso ni hra ou wrana ei, ysamenie fe.
28 Na sa Midian hra ysafo ni yewer wale, ofo Yusuf wamon wai waliwet wai ykein fien wahin se kak mabri aiti. Waka fo, ei ysafo wan na sa Ismael ekei, wat pitis kdois, syikal perak na mre waigi. Ofo nai ekei yotik kat ou wse Mesir.b
29 Mde Ruben whok oli, waka fo, wain wahenek se kak om, mde whot dait waliwet ou, ofo ou wkodihak not trik ou wam, wabe wmro fe waliwet ou. 30 Ou wain oli wse waliwet ei yik, wto man ei wto: “Wet ou wak dait koit! Se tet tsiok mit ma madien kom?”
31 Mde ei ywien fien not trik Yusuf wfem maka, ywien kambing mre wan ykerek, mde ylo not trik om man when aiti. 32 Ofo ei yotik not trik jubah main mse yono wak. Yto: “Tono, mam mlouk not ko mak fan kedi. Nhana not kom. Nfe wet Yusuf ma wkain afe, nai sio ma wkain?”
33 Mde Yakub wsmit lien not trik om ofo wto: “Not trik hra tfe wet ou wfe le mkom. Bo thana erwas yiyaka yatan wkak wale.” Yakub whlein wto: “Hee, erwas yiyaka yeit wale tfe wet Yusuf!”
34 Mde Yakub wkodihak kat not trik ou wam, wkaitti not maogin mak wkedi, wrwe lis kawuak fe wfe wet ou. 35 Wfe wet yidlai yidli kadio kat yka yto yhliemen ybalalan yono. Mahin ou waha kat wto: “Mdain, tet trwe kawuak de taigi, tbakorwain tais thot ou wak Mla Sminggir.” Wde le ke Yakub ou wrwe fe kawuak.
36 Mahin na sa Midian ysafo wale Yusuf wak Mesir wan Potifar, na sebe wafle walolowain Firaun, raja Mesir ou.