Yusuf Wkali Wono
50:1-14
50
Mde Yusuf wti lolowain wse wono wkmuon, wawo wkmois ou. 2 Mde ou wbahe na mre hra yweyen lokdi ou yibe yka yskahito fe wono eigi ou, yware wadien minyak mabe ou wban dait.
3 Ofo ei yskahito fe eigi ou wase amuk 40 (na lak yeigi), wtatol wadien na sa Mesir ei yi ni yi. Na sa Israel fot yidien na sa Mesir kadio kat yrwe fe Yakub, yese amuk 70 (na tolik yeigi whri na wna yahar).
4 Yrwe mfot fo, Yusuf wrana man Firaun wfe na tmak ei wto: “Tet taisi tain tkali tono wak fobi Kanaan. Nen nto naisi man tet, ofo nwaini man Firaun nto, 5 ‘Tono wto wataren waigi fo ou wbahe tet tfafti man ou wto: “Kyamre fo tet taigi, ofo nkali tet tak hin knawato hra tet tkak krek wale mak fobi Kanaan.” Mde le ke nen naisi, ofo nen nbahe tet tain tse ra tkali tono. Mfot fo, tet taka oli.’ ”a
6 Mde Firaun wto: “Nen nain nkali wata nono mde hra ou wbahe nen nfafti man ou.”
7 Mde Yusuf wain wse ra wabe wkali wono. Mde na marok yein sisi yidien ou, Firaun wfe na tmak ei, nai yfle kadio kat yehin istana Firaun, yidien fot nai yfle kadio kat yehin fobi Mesir. 8 Ei yidien fot Yusuf wfe nai yein kadio kat, wamon wai waliwet wai, mahin ei yehinti kat yfe wet ei yidien ni ror kambing, domba, sapi ei, yiheit yik fobi Gosyen. 9 Na mre yorin kereta, mre yorin kuda, ei yein kadio kat yse ra yidien ou. Mde na okom marok karmiak kat.
10 Ei yhok yik fobi Kanaan, kla Yordan mtefit, wi hra nai ybadiak gandum, hra wkedi nai yto Goren-Haatad, ofo ei yowa ysalo fle. Yusuf wrwe fe wono wase amuk mtalak, wat dlen fle fe ou. 11 Na sa Kanaan hra yese yik ekei yhot fo ei yrwe yik Goren-Haatad, ofo ei yto: “Nhot la! Na sa Mesir ei ysiok dlen.” Oko le ma yidien hra ke nai ywit wi okom ysalo Ibrani yto Abel-Mizraim, ou le ma Na Mesir Yrwe.
12 Yo, Yakub wfe wet ysiok ni yde kayi hra ou wto skatoin ei. 13 Ei yotik eigi wain wse fobi Kanaan, ofo ykali ou wak knawato mak sanwat Makhpela hra mataren Mamre mse tali mhok, wi hra Abraham wkain mahin Efron na sa Het mabe hin man ou.b 14 Yusuf wkali kat wono, ofo ou wadien wamon wai waliwet wai yidien fot na marok hra yein sisi yidien ei, ysalit oli yse Mesir.
Yusuf Whliemen Wamon Wai Waliwet Wai
50:15-21
15 Yusuf wamon wai waliwet wai yhot fo yono waigi wale, mde ei ysadir saswain yto: “Bo Yusuf wbafelek wnok tmol kawuak ni hra kamuolo faf fsiok ysgia yin ou. Ofo bo ou wtriesi oli man faf.” 16 Ofo ei yteye giet om malin main mse Yusuf wak, yto: “Kaman nono waigi latiot, ofo wskatoin wto, 17 ‘Bo nan nrana man Yusuf nto: Nbaret keben wata ni hra kamuolo namon wai naliwet wai ysiok satian ysgia yin nen ei. Nnok tmol oli dait ni yisgia ei, nkait eye la!’ Ofo nbaret keben wata mam, mam hra mibe na dihan min Nago hra faf fono wfe.” Yusuf woso giet om mahin wamon wai yik, mde ou wawo.
18 Mde Yusuf wamon wai waliwet wai yka yhok yik ou wbariomo yti kat ybries yse ou wteit aiti yto: “Midien hra ko mam mibe kawor min nen.”
19 Mahin Yusuf wto: “Nan neliek amot. Tet ttriesi oli dait man nan. Tet tabe dait Nago. 20 Nan nidien sgia amo tet, mahin Nago wkororo masgia okom mabe mbot. Ou wto wsiok ni hra faf fhot mhok yidien hra kom, ou le ma ou wror wain na marok yron. 21 Nan neliek amot. Tet thnak kawuak ni eit fe nan nidien nan nfe wet ke.” Mde le oko ou whliemen ei yibri om mluwa. Ou wsadir mluwa man ei mde ei yeliek oli dait.
Yusuf Waigi
50:22-26
22 Yusuf wase kawuak wak Mesir wadien wamon wai waliwet wai. Ou wron kawuak wde umur der 110 (na mahot yeigi whri na wna yahar). 23 Ou wtrar kayi de whot wbiti, o le ma Efraim wate wai kawuak mde wate kokos wai. Ou whot fot wate kokos hra yehin Manasye yidien fot wfe wet Makhir wai. Yo, wate kokos eke yka fo, ou wwalo yik wkabalak.
24 Yusuf wto skatoin man wamon wai waliwet wai wto: “Kyamre fo tet taigi. Basak fo, Nago waka toron wkosia nan nhokti kat nehin fobi kom, watik nan nein nse fobi hra kamuolo ou wfafti wto whnak man Abraham, Ishak yidien Yakub.” 25 Ofo Yusuf wbahe Israel wfe wet ei yfafti ni wto: “Basak ofo Nago waka toron wsmit lien nan, wadien nan nsalit oli nse fobi Kanaan. Oko fo, nan notik tet tkdois kei yehin ko, nan nkali yse ra. Nan nkali dait tet tak fobi Mesir ko mala!”c
26 Mde Yusuf waigi, umur der 110 (na mahot yeigi wtfas foko yahar). Na Israel ykali dait ou ha, ei yskahito fe eigi ou, ofo ylak deri wak peti mabri mak fobi Mesir.