Yakub Wsalit Oli Wse Betel
35:1-15
35
Mde Nago wto man Yakub wto: “Nen nsidik kat nahin ko, nain nhri nse Betel nabe nase lis nak ana. Nhok nak ra fo, nbatalok sala kohok man Nago tet, mak wi hra kaman tet tyen hata tkan man nen nak fan kedi, nen ntain nahin namon Esau wak.a2 Mde Yakub wbahe ou wfe nai yidien fot ou wfe na dihan kadio kat ei wto: “Nklat kat nan nfe nago patung klebet man hra nan nsaesik ei, ofo nsrik, nwalis kat nan nkan ei, ntli kat not trik ei, ofo ntrik hao not trik yifi. 3 Yfot fo, nan nka, faf fein fhri fse Betel se bo tet tbatalok sala kohok man Nago mak ana, fe hra kaman tet tkain kafir fle, mde twit man Nago, ofo ou wfalas man tet. Ou le wadien sisi tet, watsiofo tet tak wi kadio hra tet tain om.” 4 Mde ei yhnak yfe nago patung klebet yidien fot kin hra ei ytefit yka fo, yhnak yin Yakub wktan yse wkoit kflio mkda molo mak Sikhem. 5 Mde ei yein, mahin Nago wolot fe na sa kadio kat yik kota hra ykohli ei yelieksi karmiak kat fe ei, se bo ei ytriesi dait, ywain dait ei.
6 Mde Yakub wadien ou wfe na kadio kat ei yhok yik Lus, hra nai yto Betel, mak fobi Kanaan. 7 Wak ana fo, Yakub wbatalok sala kohok man Nago, ofo ou wwak wi okom mabe ‘El Betel,’ hra nai yto ‘Nago, Nago Wfe Bol,’ fe hra kamuolo ou wtain wahin wamon Esau wak, ofo Nago wyen hata wkan man ou wak oko.
8 Madien hra oko fo Debora, na dihan matrar hra mror wain Yakub wemem Ribka madien kamuolo mwet sonat, om eke maigi mak oko, ofo ei ykali om mak wkoit kflio molo mrem hra Betel mtato mse lolik ale, ofo ei ywit wkoit okom mabe ‘Alon Bakuth,’ hra nai yto ‘Wkoit Kflio Hra Nai Yrwe.’
9 Yakub wahinti kat wale fobi Padan-Aram, wase oli wak fobi Betel, fobi hra Nago wkakniet man ou. Wak ana fo, Nago wyen hata wkan oli man Yakub, ofo whnak oli fle kohok man ou wto, 10 “Nen nkedi oli dait mabe Yakub, yo, nen nkedi nabe Israel, hra nai yto ‘Ou Wkanas Wkafa Wboyok Wadien Nago.’ ” Mde ke fo Nago wwak ou wkedi Israel.b
11 Mde Nago wrana oli wto: “Tet le ma tabe Nago Wafle Wakohok Walais Kat. Nkafe kein sanini wet kawuak de nan nibe na sa wat maflem. Basak ntakein ei yyol kayi de yibe na sa yrok, ntakein mrei yibe fot raja.c 12 Kaman tet thnak wale fobi kom man nate Abraham wadien nono Ishak, bo tet thnak kayi fot man nen nadien ntakein ei.” 13 Mde Nago warin wahinti kat Yakub waheit wak wi hra ou wrana ni okom.
14 Mde Yakub wlouk amak malis mrem maka, worik mkro mak wi hra Nago wrana ni man ou, ofo wolio has twok anggur madien minyak mre mak amak masa om mabe ni sanfe man Nago.d 15 Yakub wwit wi okom hra Nago wrana ni wadien ou wabe Betel, Bol Nago Wfem.
Rahel Maigi Mak Fan Kedi
35:16-21
16 Mde ei yehinti kat Betel, yein kein oli kawuak de ykdia yitaren yse Efrata, ofo Rahel mkedi mkerek mabe mto msois, mahin mkahiowain kat, om mhlet mkedi koko lis, mhorot, wet ou whok dait. 17 Om mkedi koko lis kawuak, mde na dli kaswuo om mrana man om mto: “Rahel, nen naliak dait, fe nen nsois wale nkafe wet wadla mre le wko!” 18 Om mwak mfe wet wabe ‘Ben-Oni’ hra nai yto ‘Wet Kafir.’ Mwit sba ou wkedi fo, om mkein kahlia kat mhaliem, ofo mkaso mti, mkak fe main kya kerek. Mahin wet oko wono wwak wabe Benyamin, hra nai yto ‘Tna Tkoin Mhron Fe Ou.’
19 Mde le ke Rahel mkak, ofo ei ykali om mak fan tefit, fan hra mse Efrata (hra nai yto Betlehem). 20 Mde Yakub worik amak malis mkro mak hin masa ago, ofo maheit kawuak de hra ko mhnak kakniet Rahel mfe hin om.
21 Mde Israel ou wain kein oli, wewer kat Migdal Eder, hra nai yto ‘Hodyo Leli Fali Ni Ror,’ ofo wba bol dik tenda wak oko.
Yakub Wsalit Oli Wse Wono Wak Fobi Kanaan
35:22-29
22 Ou wase sonat wak oko, ofo wfe wet Ruben wloit wse wkesi Bilha hra wono wsmian ma ese om mfe bol dik tenda, ofo wase wadien om. Ou wamir kat wono ofo wono woso fe ni kom.
Yakub wkafe wet yidlai yahar teit lak:
23 Yakub wsmian maolo Lea om mkafe:
Ruben, wet waflesa,
ofo Simeon, Lewi, Yehuda, Isakhar yidien Zebulon.e
24 Wet hra wsmian maolo fat Rahel mkafe:
o le ma Yusuf wadien Benyamin.
25 Mde Bilha, na dihan hra Rahel mhnak man Yakub wsmian hamis ma ese om mkafe:
Dan wadien Naftali.
26 Ofo Zilpa, na dihan hra Lea mhnak man Yakub wsmian hamis ma ese fat om mkafe:
Gad wadien Asyer.
Wet yidlai yahar teit mres ekei Yakub wkafe, ofo ou wase sonat wak fobi Padan-Aram ha, Benyamin ou wmres deri ou wkafe wak fan kedi fobi Kanaan.
27 Hra oko fo Yakub wsalit oli wse wono Ishak wak Mamre, mataren Kiryat-Arba – nai yto Hebron – wi hra kamuolo wate Abraham wagiti kat, wi hra wono Ishak wase sonat wak oko.f 28 Yakub wono Ishak wtrar kamyi kat, wase wale der 180 (na mtanhat yeigi). 29 Mde ou wkaso wti, waigi, wawua main mse fan lis mse wate kokos wai yik Mla Sminggir. Ofo wfe wet Esau wadien Yakub la ykali ou wse hin knawato.