Dina Madien Na Sikhem
34:1-31
34
Yakub wase lis wak Sikhem kayi de wfe wet ei yifle ysasia wale. Tali mre fo Lea mfe wet Dina main mto mlit na dli fobi man hra yese yik wi ekei. 2 Mak ana fo, Raja Hemor na Hewi ou wfe wet Sikhem whot Dina, ofo wkesik om. Om maha mahin, ou wslon fien om maka, wkamti, ofo wamir om. 3 Ou wkaso mtlok fe Dinam, Yakub wfe wet om, ofo wkesik karmiak kat, wsadir batoko wadien om se bo om msablit main mse ou wak. 4 Sikhem wto man wono Hemor wto: “Tono, tet taisi tsmian na dli kom. Nala kwat man mono watik.”5 Hra oko fo Yakub woso ro kat fo wfe wet Dina om nai ysiok sebe fe walem. Ou wfe wet yidla ei yik dait bol, ha, yleli fali sonat yfe ni ror yik sanwat samdi ra, ofo ou wsatmor fali deri kawuak de ei ysalit oli.
6 Mde Sikhem wono Hemor whok waka wse Yakub wak wto wsarfain wadien ou. 7 Mahin hra oko fo Yakub wfe wet yidla ei yoso wale sebe okom, ei yrioro fe, mde ei ysalit tamli yse bol. Ei ytrere karmiak kat, ykaso msa kat fe hra Sikhem wsiok ni yisgia yitatol yin na Israel ei, wase wadien yihano Dinam. Ei yto: “Hra nai ysiok buon ni sgia mre mde oko man na Israel faf fibe!”
8 Mahin Hemor wrana man ei kadio wto: “Tet taka tsarfain le mke. Tfe wet Sikhem oko wkaso mtlok wkesik nfe wet om. Tet twaini man nan, nto neisi, nhnak Dina man tfe wet ou wsmian. 9 Se bo na sa lak faf fsmian skaleis. Nan nhnak na dli nan ni yin mam. Nan nwien fien na dli mam mi yin nan nsmian. 10 Ofo nan niheit nese sisi nidien mam. Niheit nibe kawuak na fobi nik ko, nhelwain wi mrem man nesem. Nese nik ko, nfri hene nidien mam, nfelit kerek wi ke yin nan.”
11 Mde Hemor wfe wet Sikhem wrana man Dina mono mamon wai wto: “Tet taisi nan nsalio kein tet. Nan nwaini ni kadio kat hra ei, bo tet ttatik yin nan nkain. 12 Nlak wata ni ehir kwat ala om mfle mewer, bo tet thnak man nan nkain. Wet om mat wata kserek fle, mahin nhnak wata om man tet tkain. Bo tet tfelit kerek kat om.”
13 Mahin Yakub wfe wet ei ynok sas, ykaso msa kat kawuak fe hra Sikhem wsiok sgia yihano Dinam, wkami om maka, wamir om, mabe oli dait na dli mmor, ou wolot fe om mfe fle kohok mdain wale, ofo ei yrana ni gebra yin Sikhem wadien wono Hemor yto, 14 “Mam meisi amo mahin mam msiok dait mde ke. Mam mhnak dait mihano man na dla hra wbrein dait latiot ou wsmian, mabe ni kom msgia man mam. 15 Mto mde ke fo, mam mto man nan mde le ke - na dla kadio nan nfe ei nai ybrein kadio kat se bo nan nde fot le mam. 16 Ofo mam mhnak mam mfe wet yidli yin nan nsmian, nan nhnak fot nan nfe wet yidli yin mam msmian, se bo mam mese sisi midien nan nik fobi ko, faf fibe na sa mres. 17 Mahin, nan nto naha nbrein, nsamenie fe dait ni hra mam mrana ekei, ofo mam mwien fien kat mam mihano mahin nan nik, ofo mein fali om.”
18 Mde Hemor wadien wfe wet Sikhem la yeisi ysamenie fe ni hra ei yrana om. 19 Ofo wedla okou, hra wkedi fle wewer wahin wamon waliwet wai, ou wto wsiok tamli ni hra ei yrana, fe hra ou wkesik karmiak kat Yakub wfe wet om. 20 Hemor wadien wfe wet Sikhem la yein yhok yik hrede kota, wi hra na dla kadio ybalifis yibe ysadir fe ni, ofo la yrana man ei yto, 21 “Na dla kei, naka noso mam! Na kei yto ei yibri ybot yidien deri faf. Mto mde ke fo, faf fskariet wi kom mre man ei. Faf fhnak wata ei yese yik fobi faf fi kom, yskaleis ni yidien faf. Fobi kom mfle mkatak man fot ei. Faf fsmian wata ei yfe wet yidli, ei ysmian fot faf ffe wet yidli. 22 Mahin ei yaha yese sisi yidien faf, fe hra faf fbrein dait latiot, yo faf fbrein sok. Faf fto fbrein wale fde le ei, ofo ei yeisi yese sisi yidien faf. 23 Mto mde ke fo, nan nka, faf fsiok fot wata se bo ei yese sisi yidien faf. Bo basak ei yfe ni ror ei, hrien ei, ni kadio kat hra ei yfe, yibe faf fkain sisi, ei yloit kawuak yse faf fik.”
24 Mde na dla kadio hra ybalifis yik hrede kota ekei ysamenie fe ni hra Hemor wadien wfe wet Sikhem la yrana ei, ofo na dla kadio hra yese yik kota ekei nai ybrein kadio kat. 25 Amuk tolik oli fo, na dla kadio ekei ykain klis hra ybrein ei ykoko ysamsa kat sonat fo, Yakub wfe wet hra Dina mamon lak ei, Simeon wadien waliwet Lewi, la ykrit yfe mnian ei, yka fo, yloit hlok yse kota mabri, ofo yfit na dla kadio kat ei yala tiorok ei ydiris ytinik kat. 26 La yala tiorok fot Hemor wadien wfe wet Sikhem, ofo la ykri kat Dinam mhok mahin bol Sikhem wfe, madien mamon ei yein ysalit oli. 27 Mde Yakub wfe wet man kdie ei yhok yein heles, yhot kak ekei, ofo yblan hrien yehin kota hra nai ysiok sgia yihano Dina om. 28 Ei yblan yfe ni ror kadio - kambing, domba, sapi, keledai - ni kadio hra yik kota mabri yidien fot man hra yik tlein. 29 Ei yblan fot hrien kadio yehin ei yfe bol, yotik yin ei ykain. Ei ykami fot na dli yidien yfe wet kadio yibe kawor yin ei.
30 Mde Yakub wto man Simeon wadien Lewi wto: “Nan nsiok sgia karmiak buon tet tabe? Nan nolot fe bo na sa Kanaan yidien na sa Feris hra yese yik fobi ko, bo yka ytrere kadio tet. Faf fke fikan kya deri! Bo ei yto ybalifis yife mres, yka yfit tet, ofo yska faf ftinik kat!”
31 Mahin ei yto: “Fe hra wet wadla ou wsiok sgia mam mihano mde kayi le na dli mdo hra mamir was!”