Yakub Wtafri Esau
33:1-20
33
Mde Yakub wkobia wsifuon, whot afat fo wamon Esau waka wkri kein wfe na kaisin yikan 400. O le ma Yakub wberiet wfe wet ei yse yeme ma yik - Lea om ma ei, Rahel om ma ou, yidien wsmian yiese na dihan lak ei yi.
2 Ou wlak wsmian yiese lak ei yidien yfe wet ei yelin, Lea madien om mai yik kdie bri oko, ofo Rahel madien mfe wet Yusuf yein heles. 3 Na mna Yakub walin fan wtamli kayi de wataren wamon, ofo wsaesik man ou mao mtalak.
4 Mahin Esau wsese whok wse Yakub wak, ofo wbahlos waliwet ou, wkamti wkmois ou. Mde la yikan lak ei yowa sisi. 5 Yfot fo, Esau webet wsifuon, wsmit na dli yidien yfe wet ei, ofo wefitwain wto: “Na sie ma hra yidien sisi nen nke?”
Mde Yakub wto: “Wet tet ta le mke, hra Nago whnak hares fe yin nfe na dihan tet.”
6 Oko fo wsmian yiese yidien yfe wet yhok yse Esau wak, ysaesik fot man ou. 7 Oli kdie fo Lea madien mfe wet yhok ysaesik fot. Ofo Yusuf wadien weme Rahel la yhok ysaesik kahlia kat.
8 Mde Esau wefitwain wto: “Hra ni ror satatik man hra tet ttatiere fe, tewer yik ke yibe? Nen nnok buon ni mit ma yidien ei?”
Ofo Yakub wto: “Nai fe nau tfe na kohok tamon nen, tet thnak yin nen se bo nen nabri nadien bot tet.”
9 Mahin Esau wto: “Hau taliwet, ni ror tet ta yrok ytol wale. Nen nkain wata, nhnak dait yin tet.”
10 Yakub wto: “Mdain, nai fe nau nen nto naisi tet, ofo nwien fien wata ni ke! Tet tkashok fe nen nbot nadien tet. Thot oli nsifuon ke yde le thot Nago wsifuon wai. 11 Nwien bakoko ni hra tet tatik tiktol wale yin nen nke, fe hra Nago watsiofo wale tet. Tet tkain ni ror warok latiot le mke!” Yakub wrana skayit kawuak de Esau wsamenie, wwien fien ni hra ou whnak ei yin ou wkain.
12 Mde Esau wto: “Yo ma, tet tsria nen, faf fein sisi fidien hra ko!”
13 Mahin Yakub wto: “Nai fe na tamon, nen nalin kein wata! Nnok deri wet kei yteit ayi yein tamli dait, tet tain tmo-tmo fe tfe ni ror hra ysio sonat wet ke. Faf fto fbasie yein tamli, yein amuk mres deri fo, bo yeigi kadio. 14 Mde ke fo, nai fe na na kohok nen nalin kein wata. Yo, nen nfe na dihan tet tain heles tmo-tmo fali ni ror yidien tfe wet ke, kayi de mam mka mhok mse Na Kohok nen nak fobi Seir.”
15 Esau wto: “Mde ke fo, tet tlaktoin tfe wedla ke mre yiheit ykaka nen.”
Mahin Yakub wto: “Fe me? Yik wata! Yo, tet tkashok deri fe tfe na kohok nen nabe nabri mbot wale madien tet.”
16 Mde wadien tali hra oko fo Esau wsalit oli wse wi ou wa wak fobi Seir. 17 Mahin Yakub wain wwer wat wse Sukot. Wak ana fo ou wba bol dik mre man ou, wba fot bol dik mre yin ni ror ei. O le ma nai ywit wi okom mabe Sukot, hra nai yto ‘Bol Dik,’ wabe wba bol dik wak fan kedi.
18 Mde ou wain kdie oli kawuak mde whok wak kota Sikhem mak fobi Kanaan. Wak ana fo, ou wba dik oli bol dik tenda ei yik wi hra mataren wale mabe yihot mse kota, fe hra ou wain fan lis wahin fobi Padan-Aram kawuak de whok wak fobi Kanaan, fan malis om mharfe le oko. 19 Wi hra ou wba dik bol tenda fe okom, ou wfelit kerek kat mahin Hemor, na fobi hra wala sayen kota Sikhem, ou wfe wet yidla ei, mat pitis kdois perak 100 (na mahot yeigi).a 20 Wak oko fo, ou wbatalok sala kohok, ofo wwak sala kohok om wkedi mabe ‘El Elohe Israel,’ hra nai yto ‘Nago okou, ou eke wabe Israel tet tfe Nago ou.’