Yakub Waliak Ou Wayen Wamon Esau
32:1-21
32
Yakub wain kein kdie fo, ofo Nago wfe malaikat ei ytafri kerek ou wak fan kedi. 2 Yakub whot ei ofo ou wrana wto: “Hmpai! Taliak! Tet tnok dait bo Nago le wase taban mataren mse taban tet ta kom!” Ofo ou wwak wi okom mkedi mabe Mahanaim, hra nai yto ‘Sala Taban Lak.’3 Mde Yakub wbahe nai yelin kein, yein yse wamon Esau wak fobi Seir, wi Edom.
4 Ou wkait wain ei wto: “Nik ale fo nrana hatot man tfe na kohok Esau nto: ‘Nai fe nau, nen naliwet Yakub wrana wto, Naka Tamon, nen naliwet, nen nfe na dihan Yakub tet le taka tse nen nak. Tet tase lis wale tadien la mamuk Laban kawuak de hra ko. 5 Tet tkain sapi, keledai, domba, kambing, yidien kawor na dihan yidla yidli. Tet ttik giet ko man tfe na kohok nen se bo nen nmro fe tet, ntrere oli dait naliwet tet.’ ”
6 Na hra yotik giet ei ysalit oli yse Yakub wak, mde yrana hatot yto: “Mam mhok wale mik namon Esau ou wak fobi ou wa. Hra ko fo ou waka wain heles wale wak fan kedi wto wain wayen nen. Ou wkri kein wfe na dla 400 (na hat ratus) yto yka yein ywayen nen.”
7 Mde Yakub wkahiowain, waliak karmiak kat, ofo ou wkoriet na hra ou wadien ei de satatik lak, ou wkoriet fot ni ror ei satatik lak. 8 Ou wnok wto: “Bo Esau waka wto wfit yikan satatik man ou, ofo yikan satatik man ou ytain!”
9 Mde Yakub wsikafit wto: “Nago hra tate Abraham wfeu, Nago hra tono Ishak wfeu, tfe Tuhan nen, kaman firi nen nbahe tet nto: ‘Nsalit oli nse na wi na, nse nfe nai yik, ofo tet tadien nen tatsiofo nen nsres.’ 10 Tuhan, nen nhares, nadien kawuak nfe na dihan tet. Tet tnok tmol kamuolo tet tfoto kla Yordan kom, tain tse fobi Padan-Aram, ofo tet tatik wat dait ni mrem, ha tet tsiok tiyen deri. Mahin hra ko fo tet tsalit taka tadien fali tfe nai yidien ni ror satatik lak ke. Nai fe nau, ni kadio hra nen nhnak ekei tet twien sayi dait yehin nen nak. 11 Ofo tet twaini lon-lon nmro fe tet, naka nska kaka, nkosia kat tet tahin tamon Esau wak. Tet taliaksi ou waka wfit tet tadien tfe wet ke, yemem ma ke. 12 Mahin nen nkadoin wale man tet nto: ‘Tet tsiok nen nsres kayi, tsiok ntakein ei yrok yde le kinti mak siwan wtefit ale hra nai yaher dait kat.’ ”a
13 Amuk fo, Yakub wto wase taban wak fan kedi. Wase latiot fo, ou wwien fien krek ni mre yibe whnak yin wamon Esau wkain, o le ma: 14 kambing yidli 200 yidien yidla 20, domba yidli 200 yidien yidla 20, 15 unta yidli 30 yidien yfe wet, sapi yidli 40 yidien yidla 10, keledai yidli 20 yidien yidla 10. 16 Ou wberiet ni ror kambing satatik man ou wat, domba satatik man ou wat, unta satatik man ou wat, yka whnak yin wfe na dihan ei ykri kein wat-wat. Ou wbahe man ei wto: “Yo, nan nein nelin, tet taka tain heles. Satatik man ko walin kat, ndlo sba fo, satatik man ou fo weye oli, man ou fo weye oli, kayi de tet taka tain heles kat.”
17 Ou wbahe kayi hra walin kat ou wto: “Nen nain! Bo tamon Esau wtiere wadien, wefitwain man nen wto: ‘Nen nfe na kohok na si ma ou? Hra nen nain nse sio? Na sie yfe ni ror hra ykohli nen nke?’ 18 ofo nen nrana nto: ‘Nfe na dihan Yakub le wkain ni ror kei. Ou wteye ni kei yelin kein yin ou wfe na kohok Esau nen nkain, mahin ou waka wain heles sonat.’ ”
19 Wkabiya man ou walin kat wale, wkabiya ma lak fe wto wain kmo fo, ofo ou wkait wain krek man yikan kadio kat wto: “Noso kmiet! Bo nan ntatiere fe Esau, ofo nrana kayi mde le hra ke tet trana wale man nan om. 20 Nrana kayi nto: ‘Nfe na dihan Yakub waka wain heles.’ ” Fe hra Yakub wnok deri wto: “Tet thliemen ou wadien ni hra tet tteye yelin. Bo tet thot ou, ofo ou wluwa wadien tet.” 21 Mde ke fo, ou wteye ni eke yelin kein, mahin na mna ou waheit wase sonat wak taban fan kedi om.
Yakub Wadien Nago La Ykafa Yboyok
32:22-32
22 Amuk oko Yakub wsidik wkri kein wsmian yolo lak ei yidien fot ou wfe na dli ydihan lak hra yese fat ei, yidien wfe wet yikan yahar teit mre, yfoto fe wi hra nai yfoto sawuan mak kla Yabok yse wtato ana. 23 Mde ou wsalit oli wteye wfe ni ror yidien wfe hrien ei yfoto kadio kat yse kla wtato ana. 24 Hra oko fo Yakub wmres waheit, mde na mreu whok waka, wadien ou la ykafa boyok, ykamti todo, yto man sie ma wkanas wewer man ou, werek ou wti basadit wse fobi, ofo la ykafa yboyok kawuak de sies mkerek, mahin mre mkaluwa dait. 25 Na oko whot fo Yakub wkanas, wti dait wse fobi, ofo ou wna okot man Yakub wkasrien, molot fe ou wkabalak om mkadoi, mahin Yakub wkamti na oko wtodo kat. 26 Mde na oko wto: “Nnahla kat tet! Tet tain wa sies mhok!”
Mahin Yakub wto: “Hau, tet tna bhait dait nen nain! Nhnak fle fe sba tet, se nain!”b
27 Mde na oko wefitwain wto: “Nen nkedi mabe sio?”
Ou wto: “Yakub.”
28 Mde na oko wto oli wto: “Nen nkedi mabe oli dait Yakub, ha, nabe Israel, hra nai yto ‘Ou Wkanas Wkafa Wboyok Wadien Nago,’ fe hra nen nke nkanas newer le nkafa boyok fot Nago, nkanas nkafa boyok fot na tkoin.”c
29 Mde Yakub wto: “Nen nrana fot nkedi man tet.” Mahin ou wto: “Nen nefitwain tet tkedi mabe?” Mde na oko whnak fle fe Yakub wak oko.d
30 Mde ke fo Yakub wwak wi okom mkedi Pniel, hra nai yto ‘Nago Wsifuon,’ fe hra ou wto: “Taliak! Tet tkafa boyok tadien Nago! Thot wale ou wsifri wadien tet, mahin tet tkak dait, ou wliokeit tet tron deri!”
31 Tali om msieret fo, ou wewer Pniel, wain katiala fe hra wkabalak mkadoi, mrohok wtfas mahin wkasrien. 32 Madien hra oko kawuak de ko, na sa Israel yeit dait erwas ykbuos hra ysiokti ykasrien yidien ykabalak molo, fe hra ybiti Yakub wkabalak mkadoi mataren mkbuos om, ofo ei yto kbuos om mkohok man na sa Israel.