Yakub Wtain Wahinti Kat Laban
31:1-21
31
Yakub woso fo waris Laban wfe wet yidla ei ytrere yidien ou yto: “Hyee! Faf fmait Yakub ko watik kat wale mam mono wfe ni ror kadio kat, yka wror ware wat kayi de ou wkohok karmiak kat, wkain ni warok ekei yehin deri ni ror hra mam mono wfe.”
3 Mde Tuhan wto man Yakub wto: “Nsalit oli nse fobi nate, nono, nfe nai yik. Tet tadien kayi nen, tkororo kawuak.”
4 Sba oko fo, Yakub wbahe nai ywiehla fien Rahel madien Lea la yka yse ou wak sanwat, wi hra ou wleli fali kambing domba ei. 5 Yhok yka fo, ou wrana ni fe ei wto: “Thot wale la nan nono wbot oli dait wadien tet wde hra kaman ei. Ou wkrek wata tet, mahin tono wfe Nago wlolowain tet.
6 Na mna la nan nnok fot wale tet ttrein tsiok karmiak kat ni man nono ou, 7 mahin ou wtadrot, wlolot dienen kawuak tet, wsalit oli wale ni hra ou wkadoin wto whnak yin tet mao wale yahar. Mahin Nago wliokeit dait nono ou wsiok sgia tet. 8 Oma hra nono wto: ‘Kambing domba hra yskateik-tak yibe ni tasa yin nen,’ ofo kambing domba ykafe kadio kat wet hra yskateik-tak. Mahin ou wlet oli sadir, wrana wat wto: ‘Hau, hra yskateik-tak dait, madien hra ko fo yisroit-srat deri yloit yse nen nak,’ ofo kambing domba ykafe deri wet hra ysroit-srat kadio kat. 9 Mde le ke Nago wwien fien yehin ni ror nono wfe, whnak yin tet.
10 Kaman firi, tolo kambing domba ei ybakol fo, tet tasamik ni, thot fo kambing yidla kadio hra ybagata yibe ysroit-srat, yskateik-tak, ywolot-walat kadio. Ha mre yelek dait, mre yihen dait. 11 Mde Nago wfe malaikat wrana man tet, mais fe ni hra tet tasamik ko wto: ‘Yakub!’ Ofo tet tfalas tto: ‘Wo! Tet le mke!’ 12 Mde ou wto: ‘Nkobia nsifuon, nhot la kambing yidla kadio hra ybagata le ma deri hra ysroit-srat, yskateik-tak, ywolot-walat. Tet tsiok mde le ke fe hra thot ni kadio hra Laban wsiok sgia yin nen. 13 Tet tke tabe Nago tak Betel, hra kaman nen nkait hene man tet, norik amak mkakniet fe bol man tet, ofo nen nolio has minyak fem, nkait todo kadoin man tet. Madien hra ko fo, nyo nfe hrien ni ror ei, nain nahinti kat fobi kom, nsalit oli nse fobi nen na - wi hra kamuolo nen nase lalie om.’ ”a
14 Mde Rahel madien Lea la yto man Yakub yto: “La mam mkain dait oli ni mre yik la mam mono wak. [Kamuolo ou wkadoin wto wsan hrien trifan mre yin la mam, mahin madien ko fo mam mhot ou wkrek fe oli kat, ofo mam mnok tmol oli dait wale ou.] 15 Ou wnok la mam mke mibe deri wale na sa wat. Fe hra ou wsafo wale mam, mde hrien hra mam mi ta ei, ou wbakya kat wale yfot. 16 Ni kadio hra Nago wtrie kat yehin mam mono wak ei, yka whnak oli yse mam midien wet mam mi mkain kayi. Mde ko fo, nsiok wata ni hra Nago wrana wale yin nen.”
17 Mde Yakub wlak wfe wet ei yidien wsmian ei yorin kadio kat yse unta ysbiele ago, 18 ofo wkri kein wfe ni ror ei kadio kat, yotik hrien hra ou wkain yik Padan-Aram, ofo wain wto wsalit oli wse wono Ishak wak fobi Kanaan.
19 Madien hra oko fo, Laban wain wase wat wale wse wi ou wfe kambing domba ei yik, wto wkerek ygien yidien gunting. Mahin madien hra oko, Rahel marin hlok mse mono wfe bol mabri, masliak kat ou wfe patung berhala hra ou wsaesik wsikafit sawuan man ei, wwit ei yibe ou wfe nago ei. Om mlouk hlok, mrana dait ni fe Yakub. 20 Mde Yakub wlolot dienen Laban na Aram ou, wrana dait ni fe ou, ha wtain hlok kat deri. 21 Mde kayi le ke ou wtain wadien fali wfe ni ekei, wfoto kla wafle Efrat, ofo ei yein ytatol yse sfa bri yik fobi Gilead.
Laban Wwain Korwain Yakub
31:22-42
22 Amuk wagiet tolik fo, Laban woso na mre yrana man ou wto: “Nkonsiofo Yakub wtain wale!” 23 Ofo ou wkoyo wfe na kadio yife mres, ofo ei ysese ywain korwain Yakub yese amuk mtalak yik fan kedi, kayi de yrat ou wak sfa bri fobi Gilead. 24 Amuk fo, Nago waka wse Laban na Aram ou wak, mais fe wasamik ni, ofo wkait wain wto: “Nnok deri, nrana dait ni mre ysgia yin Yakub wala!”
25 Hra oko fo Yakub wba wale ou wfe bol dik tenda mak sfa bri fobi Gilead, ofo Laban wadien wfe na ei yhok yrat ou wak oko, mde ei yese fot yik oko. 26 Mde Laban wrana man Yakub wto: “Ni mit ma mfe he nen nsiok buon tet tde ke? Hra nen ntain fali tfe wet yidli ke yde kayi le nai yblan kawor! 27 Hra nen nlolot, ntain hlok, nahinti kat tet tabe? Nen nrana dait ni fe tet tabe? Nrana ni fe wata tet amo se faf feit lok kahlia kat ni. Ofo mam mba kalin, monggo, mba kecapi yibe mkadie heyit korwain nen, ofo nen nain nadien nkashok deri. 28 Mahin nen nhnak dait tet tkmois tfe wet kei, tate kei, tkami kahlia dait ei. Hyee, na sanet-nat nen nke nnok dait buon ni fe me? 29 Tet tke tsiok sgia kahet nan! Mahin kramuk amuk, nono wfe Nago ou wrana man tet wto: ‘Ye, nnok roro wain deri, nrana dait ni mre ysgia yin Yakub!’ 30 Tet tnok nen nmro fe nono, naisi nsalit oli nse ou wak, mahin, hra nen nasliak kat tet tfe trifan patung berhala yibe?”
31 Ofo Yakub wrana man Laban wto: “Tet tak sonat ana tet taliak, trana dait ni fe nen, walbo nen nadien kaisin nkafreko nfe wet ke, nkrek fe ei ysalit, yiheit kawuak yidien nen. Mde mam mein hlok deri. 32 Mahin nto ntatiere fe nfe patung berhala yik na man sio ma wak, ofo ou waheit waron oli dait. Yo, mam mkro wata, msayo na mna nen ndihar ntwan hewain hrien kadio kat hra mam mfe ana ke. Nto ntatiere fe nen nfe ni mre, ofo nlouk kat.” Yakub wrana wata mde le ke fe hra wnok dait wata wsmian Rahel om masliak hlok wale patung berhala ekei.
33 Mde Laban wloit lalie wse bol dik tenda Yakub wfe, ofo wsalit oli wloit wse dik tenda Lea mfem, ofo wloit oli wse tenda hra na dihan yidli lak ei yfe, mahin wtatiere fe dait ni hra ou wdihar ei. Ou whok kat wahin bol dik tenda Lea mfe ofo wloit kahlia wse dik tenda Rahel mfe. 34 Mahin Rahel mlouk kat hlok wale trifan patung berhala yka, mde mlak diaman yse om mfe kya, ofo mleli eye. Ha, Laban wtwan dihar kadio kat hrien warok yik dik fralak ekei, mahin wtatiere fe dait kat.
35 Rahel mto man mono mto: “Nai fe nau tono, ntrere amot. Tet tyesma tsidik tkro semfe dait tak nen nbariomo oko, fe tet tkak hen le mke.” Laban wdihar kayi wfasa, mahin ou wtatiere fe dait trifan berhala ei.
36 Mde Yakub wtrere karmiak kat, whar kat Laban wto: “Hra tet tsiok buon ni mit ma msgia om? Afe tet tkain buon satian mit ma om mfe he nen naka nwain korwain tet hra mde kom? 37 Nen ntwan hewain wale tet tfe hrien kadio kat ekei, ofo nen ntatiere fe ni mit ma om? Ofo nlak mak faf fbariomo aiti ko se bo faf fikan kei fhot kadio sisi, se bo la faf ffe na kei ykerek sadir fe yto na man sio ma wkain satian om, na man sio ma wdain.
38 Tet tsiok ni, tase tadien nen der 20 (na mre waigi). Nen nfe kambing domba ei ykafe wet yibot deri, mre ysatlok dait. Tet tat dait nen nfe ni ror mrei. 39 Kambing domba hra erwas yyaka ysiok, tet tatik dait yta mre yin nen nhot, ha tet mres tdanhok hlok deri yehin tet tfe. Man hra nai yisliak yidien tali afe amuk, nen ntok fe yin tet kawuak de tskade ni ror mre ydanhok yin nen. 40 Tet tase tak sanwat tsiok lis ni tan nen, tali watan tet tbat smeren, amuk wska tet tkomin, ofo tet tase roro wain dait, tsifuon ke ytayi 41 fe hra tet tsiok kawuak ni tan nen der 20 (na mre waigi) ekei. Tet tsiok ni tan nen der 14 (yahar teit hat) mabe tkain nfe wet kei, mde tsiok oli ni der mtamre se bo tet tkain ni ror mre yehin nen nak. Ha nen nsiok sgia tet, nkadoin dienen, nskalet wale tfe ni tasa mao yahar. 42 Mahin Nago hra tono wadien Abraham la yfe, Nago hra tono Ishak waliak wsaesik man ou eke wlolowain tet. Amloi fo nen nbahe yit tet tain slok deri! Nago whot wale ni kadio hra nen nsiok sgia yin tet, whot fot tet tkliowo tbresek fe nen. Ou le ma kramuk amuk whar kat nen.”
Yakub Wadien Laban La Yeit Lilin Dara
31:43-55
43 Mde Laban wsalit wto man Yakub wto: “Na dli hra kei yehin tet tak, wet sdeik angke yehin fot tet tak. Ni ror, hrien kadio kat nan nhot angke yehin tet tak. Mahin tet tsiok oli dait ni mre msgia man nan. Tet ttek oli dait ni ke yin tet. 44 Mto mde ke fo, naka, la faf fkait ti-ti ni, flak tatik amak mabe mkakniet ni kadio hra bot faf fkadoin ei.”
45 Mde Yakub wlouk amak mrem maka, worik mata mse ago. 46 Ofo wbahe wfain yidien wfe nai ei wto: “Nlouk tatik amak mre yka!” Mde ei ywien amak, yka ykalok ysworti amak okom kawuak de ysafuk yik oko. Mfot fo ei yeit resak sisi ni eit yitaren yik amak masatatik om. 47 Amak masatatik mres okom mkedi lak. Laban ou wsalo Aram wwak mkedi Yegar-Sahaduta, hra nai yto ‘Amak Satatik Kadoin.’ Mahin Yakub wsalo Ibrani wwak fot amak satatik okom mabe Galed, hra nai yto ‘Amak Satatik Kadoin.’ Amak msatatik mres okom mkedi lak.
48 Mde Laban wto man Yakub wto: “Hra ke fo, amak satatik kom mabe kakniet fe la faf ftik hao sadir om.” O le ma nai ywit mabe Galed. 49 Nai ywit fot mkedi mabe Mizpa, hra nai yto ‘Hodyo Bialok Kro Fan,’ fe hra Laban wrana wto: “Basak faf fsiar wat-wat fse wi yilis, ofo Tuhan wsmit lien nen, wsmit lien fot tet. 50 Nen nto nsiok sgia ni mrem, mde hra nsiok sgia tfe wet ke, afe nsmian wat na dli mrem, nnok deri Nago le ma wsmit lien nen nadien tet.
51 Laban wrana kdie man Yakub wto: “Amak satatik hra tet tsiok le mkom mabe kdein man fot nen, man fot tet. 52 Amak satatik madien sisi amak hra mkro trik bri angkom ykakniet fe hra tet tke tewer dait kdein kom taka tsiok sgia nen, mde fot hra nen newer dait kdein kom naka nsiok sgia tet. 53 Nago Abraham wfe, Nago Nahor wfe, Nago la yono wfeu, ou le ma wabe na wafle hra wkerek sadir man faf.”
Mde Yakub wkadoin wto: “Tet tfafti kat ni ekei yeis fe Nago hra tono Ishak waliak sawuan fe ou.” 54 Mde Yakub wak sfa oko wkerek ni ror yka, wsanfe man Nago, ofo wwaini fien ei yikan yi yklat lili, yeit sisi ni eit. Yfot fo, ei yese yik oko.
55 Klen sawok uwade kat fo, Laban wkmois wate ei, wfe wet ei, ofo whnak fle fe ei. Yehin fo, wsalit oli, wain wse wa fobi wa.