30
Rahel mnok tnes mabe om mkafe dait wet mre wan Yakub, mde om mkaf sarok mafo om, ofo mrana man msmian Yakub mto: “Nhnak wet mre wan tet. Mto mdain fo, bo tet tkak!”2 Mde Yakub wtrere karmiak kat wto: “Hra tet tabe Nago, ma tet twanik nen nkafe dait wet?”
3 Mde Rahel mto: “Mto mde ke fo, nwien tet tfe na dihan Bilha okom maka, nsmian wata om se bo mkafe wanik wet yin tet se bo ttakein ei yrok fot.”
4 Ofo om mhnak mfe na dihan Bilha man Yakub wsmian, 5 kawuak de mkmat, mkafe wet wadlau mre wan ou. 6 Ofo Rahel mto: “Ahe, Nago wkerek sadir mabot man tet, ou woso wale ni hra tet twaini okom, ofo whnak wet wadla mre wan fot tet.” O le ma hra om mwak wet oko wkedi wabe Dan, (hra nai yto ‘Kerek Sadir Mabot’). 7 Mde Rahel mfe na dihan Bilha msalit mkmat oli, ofo msois wet wadla mre wrat lak wan Yakub. 8 Ofo Rahel mto: “Ahe! Tet tke sok! Tet theden lis tadien tafo, mahin tkait flie, tewer kat om le mke!” O le ma om mwak wet ou wabe Naftali, (hra nai yto ‘Heden Lis’).
9 Lea mhot fo om mkafe oli dait wet, ofo mhnak mfe na dihan madli Zilpa om man fot Yakub wsmian. 10 Mde Lea mfe na dihan Zilpa om msois mkafe wet wadla mre wan Yakub. 11 Ofo Lea mto: “Ahe! Sres kamyi kat maka le mke!” O le ma om mwak wet ou wabe Gad, (hra nai yto ‘Sres’).
12 Mde Lea mfe na dihan madli Zilpa msois oli wet wadla mre wlouk lak fe wan Yakub. 13 Lea mto: “Tet tkashok karmiak kat! Bo na dli marok om ywit tet tabe kayi na dli hra mkashok.” O le ma om mwak wet ou wabe Aser, (hra nai yto ‘Kashok’).
14 Hra oko fo nai ysat fle gandum, ofo Ruben wbait-bat wse sanwat ei, wtatiere fe wkoit dudaim yfuon hra na dli hra ydrot yeit fo ykafe oli wet. Ofo ou wlos, watik yse weme Lea mak. Rahel mhot, ofo mto: “Nai fe na tafo Lea, nhnak komik dudaim hra nfe wet watik ekei mre yin tet.”
15 Mahin Lea mto: “Mdain! Hra nen natik kat wale tet tsmian ou, ofo naka nwaini tfe wet wfe wkoit komik ykan ei?”
Mde Rahel mto: “Nhnak wata komik mre man tet. Bo amuk oko fo tet thnak ou waka wase wadien nen.”
16 Siwit kat fo, Yakub wsalit wahin biele wse bol, ofo Lea mtlok wayen ou mde mto: “Bot amuk ko la faf fese wat, mabe tet thnak tfe wet wfe komik dudaim mse Rahel mak, ofo om mhnak tet tadien nen la faf fkami wat.” Mde amuk oko la yese wat.
17 Nago woso kmiet ni hra Lea mwaini, ofo om mkmat oli mkafe wet wadla mre oli wrat mahot wan Yakub. 18 Lea mrana mto: “Nago whnak ni tasa man tet fe hra tet thnak tfe na dihan Zilpa man Yakub wsmian.” O le ma om mwak wet wkedi wabe Isakhar, (hra nai yto ‘Ni Tasa’).
19 Mde Lea mkmat oli, mkafe wet wadlau wlouk mtamre wan Yakub. 20 Ofo om mto: “Nago le ma whnak hares mabot karmiak kat man tet. Hra oko fo, tet tsmian ou wlok-lok wtik wkaso man tet, fe hra tet tkafe wale kefin mtamre yin ou.” O le ma om mwak wkedi wabe Zebulon, hra nai yto Wtik Wkaso.
21 Sba oko fo om mkafe wet madli mrem, ofo mwak mkedi mabe Dina.
22 Mde Nago wnok fot Rahel, woso kmiet ni hra om mwaini. Mde ou wtli oli mkmat. 23 Mde om mkmat, msois wet wadla mreu. Ofo om mto: “Nago wnaber kat tet thes om mdain. 24 Bo Tuhan nen nhnak oli wet wadla mre wan tet.” O le ma om mwak wet oko wkedi wabe Yusuf, (hra nai yto ‘Mre Wdan Kein Oli’).
Yakub Wkain Ni Ror Yrok
30:25-43
25 Rahel msois wale Yusuf, ofo Yakub wrana man Laban wto: “Nai fe na tamuk, nkami tet wa tain tsalit oli tse ta wi ta le mke. 26 Nen nnok wale tet tsiok ni warok wan nen, tase wale der 14 (yahar teit hat) le mke. Hra ko fo, nnahla kat tsmian ma kei, tfe wet kei hra tet tfelit kerek yehin nen nak, wa tet tain.”
27 Mahin Laban wrana man Yakub wto: “Naka taro tfe wet, nto naisi tet, ofo faf fiheit fese kawuak wata fik ko. Tet tala lial wale, tnok sas fo Tuhan watsiofo tet mabe nen.” 28 Ou wto wskatiokot oli wto: “Nrana fe krek wata nfe ni tasa ei, se bo nen naheit oli, nsiok ni yin tet, ofo tet ttasa kayi ni yin nen.”
29 Mde Yakub wto: “Tamuk, na mna nen nnok deri tet tsiok karmiak kat wale ni man nen. Nen nfe ni ror ei yrok-rak wale. 30 Tet taka kmo fo, nen nfe ni ror ei ywalak kyamre deri. Mahin tet thok tak ko, tsmit lien nfe ni ror ei kayi de yrok yyol karmiak kat. Tuhan watsiofo nen fe hra deri tet tadien nen. Madien hra oko fo tet tsiok deri ni man tet tadien tsmian ma kei.”
31 Laban wto: “Mto mde ke fo, bo tet ttasa ni mit ma oli man nen se bo nen nsiok lis wata ni nan tet?”
Yakub wto: “Tamuk, nen nhnak dait ni mre man tet. Nen nto naisi fo, noso kmiet ni hra tet twaini yin nen nke, ofo tet taheit tsmit lien lis nfe ni ror ei. 32 Nto naisi fo, bot ke tet tain tse wi ma lak kambing domba, tlouk helwain hra yskateik-tak, yiwolot-walat, yogin, yisroit-srat ekei, tlak wat yibe ni tasa yin tet. Yo hra yelek afe yihen, yiheit yin nen. 33 Basak sba, tamuk nen nnok tnes tet tsiok ni yibot yin nen, tlolot dait nen. Bo tamuk nen naka nahenek tet tfe kambing domba ei, nto nhot mre hra yelek afe yihen, ofo nen nnok tet tasliak wale ei yehin nen nak.”
34 Ofo Laban wto: “Mko, tet taisi mde le hra nen nrana fe okom.” 35 Mahin madien hra oko Laban wkoriet kambing yidla hra ysroit-srat, ywolot-walat, yidien fot kambing yidli hra ywolot-walat afe yskateik-tak yelek, yidien fot kambing yiwet hra ykdia yogin ei, yka fo whnak wat yin deri wfe wet yidla ei, 36 ytain fali yehinti kat Yakub, yein yese yse wi wat mrem hra mlis amuk tolik yik fan kedi. Mde Yakub waheit wsitodo Laban wfe kambing domba man hra yiheit ei.
37 Mahin Yakub wwien fien wkoit far, wkoit kewi, yidien fot wkoit ksalika yma yibra yka, wkesek ysroit-srat, 38 ofo wlak yik kempir kadio hra ni ror ei yoko kla fem, se bo yoko kla fo, yhot yik deri kla mabri aiti. Ou wlak wkoit yma eke yik oko, fe hra kambing domba yto yoko kla fo, 39 ybagata yik oko. Ofo ei ykafe wet ei, mre ysroit-srat, mre yskateik-tak, mre ywolot-walat, mre yogin. 40 Ofo Yakub wkoriet kambing yiwet ekei yese wat. Mde ou wkoriet kambing yidli hra Laban wfe yibe ybagata yidien kambing yidla hra yogin ou wfe ei. Mde le ke fo ou wkain hra ywolot-walat, yogin, yskateik-tak yrok, yloit yse ou wak. Yo kyamre deri hra yelek afe yihen, yiheit yin Laban. Wsiok kayi mde le ke kambing satatik lak ekei, Laban wkain yelek yidien yihen, yo Yakub wkain ywolot-walat, yogin, ysroit-srat. Ou wliokeit dait satatik lak ei yein lok dait ha, yein wat-wat deri. 41 Kambing yidli hra ykanas yto ybagata fo, Yakub wlouk wkoit yma ei yka, wlak yse wi ma oko kla mabri aiti, mtatol man ei kadio, se bo ei ybagata yitaren wkoit yma ei. 42 Ha, kambing yidli hra ykanas dait yikaluwa yto ybagata, ofo wlak dait wkoit yma ei yik oko. Mde ke fo, kambing yiwet hra ysiluwa yloit yse satatik Laban wfe, ha man hra ykanas yloit yse satatik Yakub ou wa. 43 Mde ke fo, Yakub wfe kambing yrok sanini karmiak kat, kayi de ou wkohok, wkain kawor na dihan yidla yidli, unta yidien keledai yrok karmiak kat.