Yakub Wlolot Dienen Wono Ishak Se Whnak Fle Fe Ou Wabe Wet Flesa
27:1-40
27
Mde Ishak ou wtrar wale, wsifuon ei ymian kayi de whot roro wain oli dait ni. Mde ou wwit fien wfe wet waflesa Esau waka, wto ni fe ou wto: “Tfe wet.”Esau wfalas wto: “Wo, tono.”
2 Ishak wto: “Nhot la, tet ttrar wale le mke, tnok roro wain dait hene hra mabe tet taigi om. 3 Ofo nkrit fien nfe tawur madien nggaref ei, nain la nse samdi, nsiok erwas mre wan tet tat.
4 Nfosik wadien ni eit mre hra yiwas karmiak kat, yde hra tet taisi fe ei. Yfot fo natik yka tet tat, se bo tet thnak tfe fle kohok man nen, sba se tet taigi.”
5 Mahin Ribka moso kmiet wale ni ekei hra Ishak wrana yin wfe wet Esau ou. Esau wain samne wse samdi wdihar erwas mre wsiok man wono.
6 Ofo Ribka mrana man mfe wet Yakub mto: “Naka se! Tet toso wale nono wrana ni fe namon Esau wto, 7 ‘Natik erwas hra nen nsiok ou mre waka, ofo nfosik wadien ni eit hra yiwas ei yin tet tat, se bo tet thnak fle fe nen nak Tuhan wbariomo, sba se tet taigi wata.’ ” 8 Ribka mrana oli man Yakub mto: “Tfe wet, noso la, nen nain nsiok la ni hra tet trana ke. 9 Nain nse wi hra faf flak domba koit, nlouk helwain kambing ywet lak hra yfori ymor ymniak-mnak yka, nhnak yin tet tfosik yde hra nono waisi fei, 10 ofo nkain twa yin nono wat. Ydain fo, nono ou whnak krek fle fe nen, sba se bo waigi.”
11 Mahin Yakub wsalit wto oli man weme Ribka om wto: “Teme, nen nrana sadik ni le me ke. Mahin Esau wkan om mgien karmiak kat, yo tet tkan ta kom mgien dait. 12 Taliaksi tono wna hewain tet tkan kom, ofo tet tde sie? Ou wnok wto tet tlolot ou, ofo ou whnak fle fe dait tet, ha wfruo kat deri tet, wami kafir fe tet.”
13 Mahin weme mto: “Tfe wet, nkahiowain naliak amot. Mto mde ke fo, ni hra ou wfruo kat mat deri tet, yo nen ndain. Nsiok wata ni hra tet tbahe fei. Nen nain nwien fien kambing lak ei.”
14 Mde ou wain wwien fien kambing ekei, watik yka yse weme mak, ofo om moyo tamli ni eit ekei yiwas karmiak kat, mde kayi hra wono waisi lokdi fe sawuan ei. 15 Yfot fo, Ribka mwien fien not trik ybot hra mfe wet waflesa Esau wfe hra ou wyo yik bol bri, mde mbahe mfe wet wakya Yakub wtrik not ekei. 16 Mde om mwien fien kambing yfalek ei, yka mhobor yik wna yidien fot mre yik wdioro hra magien dait ago. 17 Ofo om mhnak ni eit hra yiwas karmiak kat ekei yidien roti hra om moyo ekei yin mfe wet Yakub.
18 Mde kayi eke Yakub wtrik wse wono wak, wi hra ou wleli wase om. Ofo ou wto: “Tono.”
Mde wono wfalas: “Wo, tfe wet, na sio ma nen?”
19 Yakub wto man wono wto: “Nfe wet waflesa Esau tet le mke. Tet tsiok wale ni yde hra nen nrana fe yin tet ei. Nahin nleli, nat erwas hra tet tsiok tfosik wale le mke, se nhnak fle fe tet.”
20 Ofo Ishak wefitwain man wfe wet ou wto: “Tfe wet, hra nen nsiok tamli deri erwas?”
Ofo Yakub wrana wto: “Yo, Tuhan nfe Nago ou watsiofo tet tsres le mke.”
21 Mde Ishak wto man Yakub wto: “Tfe wet, naka nataren tet se bo tet tna sas-sas nen, nen nabe kayi tfe wet Esau afe ndain. Walbat wet man nen wat.”
22 Mde Yakub wataren wse wono Ishak wak, ofo wono wna hewain ou. Mde wono wto: “Hee? Wsalo sadik le Yakub, mahin wna gien ke yde Esau!” 23 Ishak whana dait ou fe hra ou wna ei ygien yde wamon Esau wnai. Mde ou wto whnak fle fe ou mahin wefitwain oli sba ou wto, 24 “Nto tkoin kayi tfe wet Esau nen le mke?
Mde ou wsamenie kebenti wto: “Ee, tono.”
25 Mde Ishak wto: “Tfe wet nen, nhnak erwas tabra hra nen noyo wale yin tet tat, se bo tet thnak fle fe nen.”
Ofo Yakub whnak ni eit ekei yin wono wat, whnak fot twok anggur man wakom. 26 Yfot fo, wono Ishak wrana oli man ou wto: “Tfe wet, naka nkmois tet.”
27 Mde Yakub wain wse wono wak, wkmois ou. Mde wono wahan not trik hra Yakub wtrik om, ofo ou whnak fle fe ou wto:
“Ahe, tfe wet nen nrnoin nrofof-fof
nde kayi le biele hra Tuhan watsiofo!a
28 Nago whnak man nen lami yehin yik ago!
Ou watsiofo nen nago biele yban -
se bo nen nkain gandum yidien twok anggur yifi wsamsa karmiak!
29 Na sa kadio kat yka yibe na dihan yin nen,
Na sa warok ei ysaesik yin nen.
Yo, nen nabe kayi na wafle nan nfe na ei,
naliwet hra neme mkafe yka ysaesik fot yin nen.
Yo, na man hra yto yfruo kat, ysiok sgia nen, ofo Nago wfruo kat fot ei.
Na man hra yto yhnak fle fe nen, ofo Nago whnak fle fe fot ei.”
30 Ishak whnak fle fe wfe wet Yakub yfot fo, Yakub whokti kat firi wono, ofo wamon Esau whok kmo wahin samdi. 31 Esau woyo fot ni eit hra yiwas karmiak kat, yka wloit fali yse wono wak, ofo wto: “Tono, nsidik nahin, nat erwas hra tet toyo kmo le mke, se bo nen nhnak fle fe tet.”
32 Mde wono Ishak wto: “Ha? Hra na sio ma nen?”
Mde wto: “Tono, nfe wet flesa Esau tet. Tet thok kmo toyo ni eit.”
33 Mde Ishak wawua main, wteit rioro kat, wto: “Giet muo! Na sie ma whima erwas hra wfosik yin tet tat wale yik ke? Nen naka latiot fo, tet tat wale ni tkesit, thnak fle fe samhak wale ou — ou eke wabe kayi na wafle, wsres kawuak!”
34 Esau woso wale ni hra wono wrana ekei, mde wtrere, whlein karmiak kat, wabri om msgia, wto man wono wto: “Tet fot! Tono, nhnak fle fe fot tet!”
35 Mahin wono wto: “Naliwet ou waka wlolot tet fe hra ou wabin kesik nen nfe fle om.”
36 Mde Esau wto: “Hra ou wkedi mtatol Yakub,b mabe ou wgebra wale tet mao lak fe le mkom. Kaman ou wasliak wale tet tfe flesa om, yo hra ko fo ou wasliak oli tet tfe fle kohok om mahin nen nak!” Mde ou wefitwain wto: “Hra tono nen nkain oli dait fle wat kdie mrem mabe nhnak man tet?”c
37 Mde Ishak wto man Esau wto: “Tto tkoin kat mabe tet tebet kat ou wabe kayi na wafle wan nen. Tet thnak kayi ou wslonti nen, tfe na ei yibe kadio kat ou wfe na dihan. Tet thnak fot ou wkain gandum yidien twok anggur yifi yrok sanini kat yin ou. Mahin ni mit oli ma bo tet thnak wat man tfe wet nen? Mdain!”
38 Mde Esau wto man wono wto: “Tono, nen nadien deri kohok fle mres deri le ma okom? Tono, nhnak fle fe fot tet!” Mde ou wawo wsia salo, wmorstiak.d
39 Mde wono Ishak wto:
“Tet tto tkoin kat man nen mabe basak sba nen nti nahinti kat fobi hra madien bet mabot karmiak kat kom.
Basak nen nahinti kat fobi hra madien kla lami yehin yik ago kom, nain nse fobi wat.e
40 Ofo nen nase nkhan sawuan.
Naliwet oko wslonti nen, wbahe nen nsiok sawuan ni mabe ou.
Yo, nen nto ntrere fo,
bo nen nhok kat nahin ou wak. Rantai hra ou whirit nen okom, basak nen ntli nkober kat mahin nen ndioro.”
Esau Wsin Wto Wska Waliwet Ou
27:41-46
41 Esau wtadrot wadien Yakub ofo wnok mak wabri wto: “Tono whnak buon fle kohok man sok Yakub wabe? Mde la bo tono waigi sba fo, tet tska taliwet ou le wou.”
42 Mahin na mre yrana man weme Ribka om yto: “Esau wsin wto bo ou wska waliwet ou.” Ofo om mwit fien Yakub, waka fo mto: “Tfe wet, noso la neme tet! Namon Esau wtrere karmiak kat, wsin wto bo basak ou wska nen. 43 Mto mde ke fo, nsidik ntain kat nadien le ko nse tamon Laban wak kota Haran. 44 Nase kawuak nadien ou kayi de namon ou wtrere mdain. 45 Wtrere mdain fo, wsablit mluwa, wnok dait sba ni hra nen nsiok yin ou ei, ofo tet tbahe na mre yka ywiehla fien nen nahin oko. Fe hra tet taliaksi bo ou wska nen, ofo madien oko nai yhirit yska ya kdie oli ou, ofo tet taheit tabe sabir kat, tkain oli dait wet, ofo tet tde le sie?”
46 Mde Ribka mto man Ishak mto: “Tet tkas koko tkahiowain kat fe na dli Het hra Esau wsmian ke! Walbat Yakub wsmian samhak na dli na sa Het mre kdie oli fot, mto mde eke fo tet tron oli fe me? Hyee, tet taigi wata!”