Ishak Wadien Abimelekh
26:1-35
26
Mde tolo katot fle kdie mreu wflie fobi okom - tolo katot man ou wat kdie wahin kamuolo Abraham wron sonat - ofo Ishak wti wain wse Abimelekh, raja na sa Filistin, wak kota Gerar. 2 Wak ana fo, Tuhan wyen hata wkan man ou wto: “Nnok deri nain oli dait nse Mesir. Nase wata deri nak fobi hra tet tbahe man nen. 3 Naheit nase dienen la nak deri fobi kom. Bo tet tlolowain nen, tatsiofo nen. Man nen nadien nkafe kein wet ei tet thnak fobi ko man nan. Bo tet tbatirik kadoin hra kaman tkaitti todo wale man nono Abraham.a 4 Bo tsiok nen ntakein ei yrok karmiak kat, yde le twon yik yik ago. Bo tet thnak nen ntakein ei yslonti fobi na sa kadio kat ekei. Basak tet tatsiofo na sa kadio kat yik fobi katak ko, main fe nen nbiti ou. 5 Fe hra ni kadio hra tet tbahe, afe ttoji, afe tfafti, afe tojinti man nono Abraham, ou woso kmiet kadio kat ni ekei, wsiok tri-tri kat kawuak.” 6 Mde Ishak waheit wase wak deri Gerar.7 Hra oko fo na dla hra yese yik wi ekei yefitwain man ou mabe wsmian om. Ofo ou wrana lolot dienen wto: “Tet tahano le mkom,” fe ou waliak wsamenie wto: “Tet tsmian tkoin le mkom.” Ou wnok wak wabri deri wto: “Na dla hra yese yik wi okom bo yska tet fe hra Ribka om mbot mmnel karmiak kat.” Mde ke fo, ou wwien kein wto, wahanom.b 8 Ishak wase lis wale wak oko, ofo Abimelekh, raja na sa Filistin oko, wsaton wsmit main fe jendela mse aiti, whot fo Ishak wsae kefes wsmian om, wbawalis-walas msifuon ei la yein. 9 Ofo Abimelekh wbahe nai ywiehla fien Ishak waka. Whok fo wrana wto: “Hra nsmian toron kat le mkom! Hra nen nto nahano mabe?”
Ishak wrana wto: “Tet taliaksi tto nai yska tet mabe ywien fien tsmian kom.”
10 Mde Abimelekh wtrere wto: “Hmpai! Hra nen nsiok buon mam mde ke fe me? De hra na dla mre wto wsiok nsmian om, ofo nen nhnak satian maflem man mam!”
11 Mde Abimelekh wojin wfe na kadio wto: “Na man sie ma wto wsiok sgia na ko, wsmian kom, ofo bo tet bahe nai yska wkak!”
12 Mde, wak ana fo, Ishak wklat har gandum yfuon yik biele, mde yfori kayi de ykanas. Ofo wsat gandum ei yhada ei yhon fe ykan, na mahot yeigi man, na mahot yeigi man. Ofo ou wnok deri Tuhan watsiofo ou, fe hra gandum hra ou wsat ei yrok yewer kat man hra yilali wale. 13 Tuhan watsiofo ou kawuak, kayi de na okou wkohok karmiak-mak kat. 14 Ou wfe domba, sapi yidien na dihan ei yrok kamyi kat. Ofo na Filistin ei ybahoin ou wfe ni yrok, mde ykaf sarok kat ou yto: “Hra ou wkohok sok wak ko fe me?” 15 Ei ybakrek yidien ou kayi de ei yklatti kat amak bet fe se kak kadio hra kamuolo wono Abraham wfe na dihan ei ykak, kayi de yhon fe bet.
16 Mde Abimelekh wbahe man Ishak wto: “Nhok kat! Nen nain nahinti kat mam! Hra nen nfle nkohok newer buon mam mibe?”
17 Ofo Ishak wahinti kat wi okom, wba bol dik tenda mak lolik Gerar, mde wase kawuak wak oko. 18 Ou wsalit wkak oli se kak kadio hra wono Abraham wkak ei, fe hra kaman ou waigi fo, na Filistin yka ylakti bet fe ei. Ofo Ishak waheit wwak se kak ei ykedi ytatol yidien ykedi hra kaman wono ou wwak ei.
19 Mde Ishak wfe na dihan ei yto ykak se kak maifi mak lolik om, ofo ytatiere fe kla sitayi hra mfriorok mahin fobi mabri aiti. 20 Mahin gembala Gerar ei yheden yidien gembala Ishak wfe, yto: “Kla kom mam le mkain!” Ofo Ishak wwak kla okom wkedi le ma Esek (hra nai yto Heden Frit), fe hra na Filistin ykaf kesik yidien ou. 21 Mde ou wfe na dihan ei ykak oli kdie se kak maifi mrem, mahin ei yheden frit fe oli. Ofo ou wwak se kak okom mkedi le Sitna (hra nai yto Salo Frit). 22 Ofo ou wahinti kat wahin oko, wkak wat se kak mre kdiem. Mde ei yheden oli dait, ofo ou wwak mkedi le Rehobot (o le ma nai yto Mkatak), fe hra ou wrana wto: “Ahe! Hra ko Tuhan whnak tnes fobi mkatak man mam. Bo mam miheit msielwat, mese wi kom msres!”
23 Mahin oko ou wain whri wse Bersyeba. 24 Amuk oko fo ou wase, mde Tuhan wyen hata wkan om man ou, wrana wto: “Tet le ma Nago hra nono Abraham wfe. Naliak amot. Tet tadien sisi kawuak nen. Bo tet tatsiofo nen, thnak nen ntakein ei yrok, fe hra nono Abraham wabe tet tfe na dihan, ou wadien bot sawuan tet.”
25 Ofo Ishak wbatalok sala kohok wak oko, wwit Tuhan wkedim. Mde ou wba kdie wfe bol dik tenda mak oko, ofo ou wfe na dihan ykak kdie se kak mrem mak fot oko.
26 Mde Abimelekh wadien Ahuzat, wanak hra whnak sablit lis fe ou, yidien Pikhol, ou wfe na sebe wafleu hra wslonti ou wfe kaisin ei, yehin Gerar ei yka ytfoi ou.c 27 Mde Ishak wto man ei wto: “Hra nan nka ntfoi fien tet tabe? Hra nan le ma nkrek buon tet, nan nwain kat hono tet thok tahinti kat fobi nan ni kom!”
28 Mde ei yto: “Mam mhot sros kayi Tuhan wadien sisi nen, ofo mam mnok sas deri mto: “Mabot ma faf fkaitti todo sisi ni - mam midien nen. 29 Mde ke fo, ngietti krek nen nadien sgia dait mam, nkosirik dait mam, mde le hra kaman mam midien sgia dait nen, mam mble mbot midien nen, mbahe nhok nain nbot deri. Hra ko fo nen nabe na hra Tuhan watsiofo kawuak nen.”
30 Mde Ishak wsiok ni eit, yka fo yeit sisi ni eit, yoko lok sisi kla. 31 Uwade mlabit kat fo, ei yfafti sisi ni yibe yto basak ei ykhan frit oli dait. Mdain fo, Ishak wna bhait ei ysalit oli yse wi ei yi, yein yidien mbot deri yehinti kat ou.
32 Yidien fot tali hra oko fo, Ishak wfe na dihan ei yka yrana hatot man ou yto: “Mam mtatiere fe kla mre mhok tnes mak se kak hra mam mkak om!” 33 Ofo ou wwak se kak okom mkedi mabe Syeba, o le ma ‘Fafti.’ Kayi de hra ko nai ywit sonat kota okom mkedi mabe Bersyeba, hra nai yto ‘Se Kak Fafti.’