Abraham Wtakein Hra Ketura Mkafe Ei
25:1-6
25
Mde Abraham wlouk oli na dli mrem man wsmian, mkedi le ma Ketura.a 2 Na dli okom mkafe wet yidla mtamre yin ou, o le ma Zimran, Yoksan, Medan, Midian, Isybak yidien Suah. 3 Ketura mfe wet wabri Yoksan ou wkafe Syeba wadien Dedan. Dedan wkafe kein na sa Asyur, na sa Letush, yidien fot na sa Leum. 4 Yo, Ketura mfe wet wabri man ou Midian, ou wkafe Efa, Efer, Henokh, Abida yidien Eldaa. Yikan kadio ei le ma Ketura mkafe kein.
5 Abraham wron latiot fo, whnak krek wfe trifan hrien kadio kat yin Ishak, 6 mahin man wfe wet hra wsmian na dihan ykafe ei, ou whnak deri hrien wat-wat mre, ofo wteye ei yehinti kat wfe wet Ishak, yein yese wat-wat yse fobi tali mhok.
Abraham Waigi
25:7-11
7 Abraham wase der warok kawuak de umur 175 (na mtadolik yeigi whri na mna yahar wtfas foko mahot). 8 Ou wsagien om mririk kat, ofo waigi, wkaso wti, wbalifis wadien wfe na hra yeigi yelin wale. 9 Ou wfe wet Ishak wadien Ismael la ykali ou wak hin knawato Makhpela hra mataren Mamre wtato ago, 10 mak sanwat hra Zohar wfe wet Efron, na sa Het ou, kaman wsafo man Abraham. Yik ana fo, ei ykali Abraham wbakorwain, ylak sisi wadien wsmian Sara om mkdois ei, wase lolowain dli om.b
11 Abraham waigi sba fo, Nago watsiofo kein wfe wet Ishak. Oko fo ou wase wataren kla sitayi Lahai-Roi.c
Ismael Wtakein Ei
25:12-18
12 Ojin trar mabe Abraham wfe wet Ismael hra Sara mfe na dihan madli mahin Mesir om mkafe wan Abraham - o le mkom.
13 Ismael wfe wet kadio kat yehin waflesa kawuak de wakya kat ei le mke: Nebayot, hra Ismael wfe wet waflesa ou, ofo Kedar, Adbeel, Mibsam,d 14 Misyma, Duma, Masa, 15 Hadad, Tema, Yetur, Nafis yidien Kedma. 16 Wet hra Ismael wfe ykedi le mkei. Ei yikan kadio yahar teit lak yibe nai yifle, fo na sa hra ei ykro kein ei ykedi silok yidien ei, yidien fot fobi wat-wat hra ei yese ykedi lok yidien ei. 17 Ismael wase kawuak de umur der 137 (na mtamre yeigi whri wasin yahar wfrok teit mtalak), sba fo wkaso wti, waigi, wbalifis wadien wfe na hra yeigi yelin kein. 18 Fobi hra ou wtakein ei yese om mteik msidik mahin mbiya Hawila ale main kawuak de mse Syur mak ra, hra mkdein Mesir mse tali mhok, mak fan hra main mse Asyur. Mahin ei ykhan frit lis kawuak yidien yible Abraham wtakein man kdie ei.
Yakub Wadien Esau
25:19-34
19 Ojin trar mabe Ishak, Abraham wfe wet, o le mkom.
Abraham wkafe wfe wet Ishak ou. 20 Ishak wase umur der 40 (na lak yeigi) ofo wsmian Ribka hra mono Betuel, na sa Aram wahin fobi Padan-Aram. Yo, mamon le ma Laban, na sa Aram ou. 21 Mde Ribka om mdrot lis kat, mkafe dait wet. Ofo Ishak wsikafit man Tuhan mabe wsmian om. Mde Tuhan woso ni hra ou wwaini ei, ofo Ribka mkmat tbouk wet lak. 22 Wet tbuok lak le yska nai ysia yik mkmat ra, ofo mto: “Ni mit ma molot fe he tet tkmat om motot ee? Mto mde le ke fo, tet taigi wata!” Ofo om main mefitwain ni kom man Tuhan wak.
23 Mde Tuhan wrana man om wto:
“Na sa lak le ma nen nkmat ekei.
Bo nen nsois na sa lak hra basak yein siar wat-wat.
Na sa man ou basak wkanas wewer na sa man ou,
ofo wet waflesa wabe kawor wan wet wakyau; waflesa wsalit woso ni wahin waliwet wak.”e
24 Mayi fe amuk hra om msois, ofo msois tbouk wet yidla lak. 25 Hra whok walin, wkan om mhen, wgien satirin kadio kat, ofo ei ywak ou wkedi wabe Esau (hra nai yto Wagien). 26 Sba oko fo waliwet wsiokti wamon wteit kawi, ofo whok skatiokot wain heles - o le ma ywak wabe Yakub (hra nai yto Wslonti Teit Kawi, hra flet mto Wlolot Dienen). Ishak wase wale der 60 (na tolik yeigi), se wsmian Ribkam mkafe tbouk wet lak ekei.
27 Wet lak ei yfori kawuak de yfle. Esau wsiafolo wabe whima, wsiok sawuan erwas, wase domri wsi tabra kawuak. Yo, Yakub ou wsitonti deri, waheit sawuan deri wak bol dik tenda. 28 Ishak waisi wat sawuan erwas tabra, ofo ou wten wkaso man wfe wet Esau, mahin Ribka mten mkaso man mfe wet Yakub.
29 Tali mre fo Yakub wfosik sup, ofo Esau whok wahin samdi ra, wtiblie karmiak kat. 30 Ou wto man waliwet wto: “Eh, tet ttiblie karmiak kat le mke. Nhnak tamli sup kacang yihen ekei mre yin tat!” (Hra oko le ma nai ywak Esau wabe fot Edom, hra nai yto ‘Wahen.’)
31 Mahin Yakub wto: “Mko, mto mde ke fo, nhnak wata fle hra wet flesa nen nfe om man tet tkain. Ofo tet le tabe kawuak wet waflesa.”
32 Mahin Esau wto: “Nhot la, tet ttiblie karmiak kat, kyamre fo tet tkak le mke, ofo tnok oli dait tfe flesa om. Nhnak wata ni eit mrei yin tet tat!”
33 Mahin Yakub wrana wto: “Nfafti man tet sba se!” Ofo Esau wfafti man waliwet Yakub, wsafo kawuak wfe flesa man ou.f
34 Mde Yakub whnak roti yidien sup kacang yihen ei yin wamon Esau, ofo ou wat, wako, ofo wsidik wain.
Mde le ke Esau waha kat ou wfe kohok flesa kom, whnak kat man waliwet wkain kawuak.