Ishak Wadien Ribka
24:1-67
24
Mde madien hra oko fo Abraham wtrar wale, wase der ei yrok, fe hra Tuhan watsiofo adit ni warok kadio wan ou. 2 Mde Abraham wrana man ou wfe na dihan wafle hra wslonti ou wfe na kadio wto: “Naka, nlak nna mak tkabalak malale kom se bo nen nfafti kat krek man tet mabe nen nsarfain na dli mabot man tfe wet Ishak wsmian. 3 Yo ma, tet taisi nen nfafti man tet, main fe Tuhan, Nago hra wkain yik wadien fobi, mabe nen nsarfain dait na dli mrem mahin fobi Kanaan hra tet tase sayi kom tabe na omuok, man tfe wet Ishak. 4 Tet taha kat na dli Kanaan ei, yo, nen nain kayi nse fobi tet ta, nhok nak na tet ta ei yik ana, ofo nsarfain na dli mre mahin ana man tet tfe wet Ishak wsmian.”5 Ofo wfe na dihan ou wefitwain man ou wto: “Bo na dli okom maha madien tet la mam mka mse fobi ko, ofo mde sie? Bo tet tatik kayi nfe wet ko wain wse fobi hra kaman na kohok nen nahinti kat om, afe?”
6 Mahin Abraham wtoji wto: “Hau, nkri kein dait wet tet ta kou wain wse ana wala!
7 Tuhan, Nago hra wkain yik ago, hra wwit fien tet tahinti kat wale tono wai wadien fot fobi tet tam, ou wkadoin wale man tet wto: ‘Basak tet thnak kayi fobi kom man ntakein ei.’ Mde ke fo, bo Tuhan ou wbahe ou wfe malaikat ou walin kein nen, se bo nen nwien fien wet madli mrem mahin ana man tfe wet kou. 8 Yo, na dli om mto maha madien sisi nen la nan nka, ofo nen nnok oli dait ni fafti okom mak wata. Yo, nnok deri wet tet ta kou, nadien dait wain sero wse ana, mabe ni fafti kom.” 9 Mde na dihan ou wlak wna man Abraham wkabalak malale aiti, ofo wto: “Tfe na kohok, ni hra faf frana ei, tet tfafti kayi le mkom!”
10 Sba oko fo na dihan ou wwien fien unta yahar yehin ou wfe na kohok ou wak, watik hrien yibot heit-hat yehin ou wfe na kohok ou wak, wlouk na dla dihan wat mre ykomot ou, ofo wain wse fobi Aram-Mesopotamia,a wse kota Nahor. 11 Whok wak ana fo, wsiok unta ei ybatoko yese yse fobi yitaren kla sitayi hra mak fan ta kota okom. Hra oko fo siwit, tali mkdia msrik, ofo na dli ei yein ytehe kla, ykafe nggisi hra nai ysiok yehin bet yibe botol yifle karmiak kat.
12 Ofo ou wsikafit wto: “Tuhan, hra tfe na kohok Abraham wfe Nago nen, nhnak kayi tet tsres tadien bot kei. Nhnak hares man tfe na kohok Abraham ou. 13 Nhot la, tet tke tkro tataren kla sitayi ko, ofo na kota yfe wet yidli mor ei yka yto ytehe kla. 14 Bo nhnak mde le ke: Wet madli man sio ma tet tto: “Nai fe nam, nkokaini bakoko nfe nggisi okom se bo tet tako kla mrei,” de mto: “Yo, nai yfe nau, nako wata, bo tet ttehe oli mabe nfe unta ke yoko fot!” - ofo om eke le ma nen nhnak helwain man nen nfe na dihan Ishak ou. Mde ke, se bo tet tnok nen nkakniet wale hares man tet tfe na kohok ou.”
15 Ou wsikafit mfot dait latiot fo, Ribka mhok mahin kota, mkafe nggisi mak mkbek ago. Om eke Abraham wate om, fe hra Abraham wamon Nahor wsmian maolo Milka om mkafe Betuel, mde Betuel wfe wet le ma Ribka om. 16 Wet madli okom mkan mbahin mbot karmiak kat. Om mmor, na dla mre yokot dait latiot om. Om msiolok mse kla sitayi aiti, mtehe mfe nggisi om, ofo msalit marin oli.
17 Mde na dihan ou wain tamli wse om mak ofo wto: “Nai fe nam, nhnak bakoko kla kyamre yehin nfe nggisi okom yin tet takom.”
18 Mde om mto: “Nai fe nau, na kohok, nako wata!” Ofo om mkosia nggisi mahin mkbek ago, mak mna aiti fo, mkokaini man wakom.
19 Wako mfot fo, om mto oli mto: “Maka, tet ttehe oli kla mabe nfe unta kei, kayi de ei ysitolo ei ydain.” 20 Ofo kla hra mak nggisi mabri om molio kat tamli man ni hra unta yoko kla fe om, ofo msalit msese oli mse kla sitayi ale, mtehe kawuak kla de unta ei ykesit kadio kat. 21 Mde na oko wkro satmor kat, wsmit lien om, wnok sas mak wabri wto: “Tuhan whnak tet tain kom msres afe, mbhait?”
22 Unta ekei yoko kla kawuak de ykesit, mde na oko wtwan fien kinta emas mres hra mitian syikal mata,b madien fot slak emas lak hra mat pitis yrok, yitian syikal yahar,c yka fo, wdan kinta om mak om mtawadiom, slak yik mnai.
23 Mde ou wefitwain wto: “Nai sie wfe wet nen? Nrana hatot bakoko man tet, bol nono wfe madien wi ma esem mrem man mam, afe mdain?”
24 Ofo om mto man ou: “Tet tono le ma Betuel, hra Nahor wadien Milka la yfe wet ou.” 25 Om mrana kdie mto: “Mam mkain fot wi ese mabe nan nese. Mam mkain fot ni eit unta warok, mkain fot gandum yolo yislo yrok yibe nan nsni yse aiti se bo nan nfe unta ei yese.”
26 Mde na oko wti wbatoko wteit wsaesik man Tuhan 27 wto: “Tet thdin nen Tuhan, tfe na kohok Abraham wfe Nago nen, fe hra nen nhares, nadien kawuak tfe na kohok ou mde hra nen nkadoin wale. Mabe tet fo, Tuhan nen nkororo tet tak fan kedi kawuak de thok tak tfe na kohok ou wfe na ei yik bol ko.”
28 Na dli okom msese mrana hatot fe ni eke yin meme mai yik bol. 29 Ofo Ribka mamon Laban ou whok wsese wse na dla ou wak kla sitayi mtefit ale. 30 Fe hra ou whot wale kinta hra Ribka mta om madien slak hra om mna ei, woso om mrana wain fe ni hra na dla oko wrana man om, mde ou whok wain wahenek na dla hra wkro fali unta ei yik sonat kla sitayi magiet. 31 Mde ou wrana man ou wto: “Nai fe nau, nen nke hra Tuhan watsiofo, naka! Nen nkro nak tlein fe me? Tet tyo kein wale bol mabe nen, madien fot wi mabe unta yese.”
32 Ofo na oko wain wse bol. Ei ytefek kat hrien yehin unta ei, ofo nai yhnak gandum yolo yislo, yidien fot ni eit yin unta ei, yhnak fot kla yin na oko wadien wfe na ei yware yteit. 33 Mde ei ylak ni eit yik ou wbariomo, mahin ou wto: “Hau, tet tat hewi dait latiot ni eit kei. Tet trana hatot sba fe ni hra tet taka tse ko fe kei.”
Mde Laban wto: “Yo ma, nranam.”
34 Ofo wrana wto: “Abraham wfe na dihan le tet. 35 Tuhan watsiofo karmiak kat tfe na kohok ou kayi de wkohok karmiak kat. Tuhan whnak wale man ou domba yidien sapi, emas yidien perak, na dihan kawor yidla yidli, unta yidien keledai. 36 Tfe na kohok wsmian Sara om mtrar kat wale mahin mkafe tomi deri wet mres wan tfe na kohok ou. Ni kadio kat hra ou wkain ei ou whnak krek wale yin wfe wet ou. 37 Tfe na kohok wbahe tet tfafti kat man ou wto: ‘Nen nwien dait kat na dli mrem mahin na sa Kanaan hra fobi tet tase kom man tfe wet ou wsmian. 38 Mahin nain kayi oli deri nse na sa tet ta, tono wai yik mabe nwien fien na dli mrem man tfe wet ko wsmian.’
39 Mde tet tefitwain man tfe na kohok ou tto: ‘Walbat na dli okom maha madien tet la mam mka sisi - ofo mde sie?’
40 Mahin ou wto man tet wto: ‘Tuhan hra wadien sisi tet la mam mein, bo wteye wfe malaikat wadien nen se bo wkororo ni ei ysres, nen nwien fien kayi wet madli mrem mahin na sa tet ta, tono wfe na ei yik. 41 Bo nen nto nhok nak ana, nai yaha yhnak dait na dli mrem man nen, ofo ni hra nen nfafti man tet ei ydain, ykaitti oli dait nen.’
42 Hra ke siwit, tet thok tak kla sitayi alkom, ofo tet trana tto: ‘Tuhan hra tfe na kohok Abraham wfe Nago nen, natsiofo bakoko ni hra tet taka fe kei se bo ei ysres. 43 Nhot la, tet le tkro tataren kla sitayi kom. Man na dli mor hra bo maka mtehe kla ou, ofo tet tto: “Nbakoko, nhnak la kla hra mak nen nfe nggisi man tet takom,” 44 bo na dli om mrana mto: “Nai fe na, nakom! Tet tehe kla fe fot nen nfe unta kei yokom” - om oko le ma Tuhan wlouk helwain man tfe na kohok wfe wet.’
45 Tsikafit kmo latiot mak tabri, ofo Ribka mhok maka, mkafe nggisi mak mkbek. Mais mse kla ale mtehe, ofo tet trana man om tto: ‘Nbakoko nhnak kla mre yin tako ei.’
46 Ofo om mtefek tamli nggisi om mahin mkbek ago, ofo mto: ‘Nai fe nau, nako. Tet thnak fot kla yin nfe unta ei yoko.’ Ofo tet tako watam, om mtehe fot kla mre yin unta ei yoko fot.
47 Mde tet tefitwain tto: ‘Na sie ma ou wfe wet nen?’ Om mto: ‘Tono le Betuel, wet hra Milka mkafe wan Nahor.’
Ofo tet tdan kinta om mak om mtawadiom, slak yik mnai, ofo tet torik tteit sia, tsaesik man Tuhan.
48 Tet thdin Tuhan, tfe na kohok wfe Nago, hra wsiok siowo tet tain kayi fe fan mabot mse ko se bo tet twien fien tfe na kohok wamon wate madli om man tfe na kohok wfe wet ou wsmian. 49 Madien hra oko fo, nan nto nhares kawuak nidien tfe na kohok ou, neisi kein ni hra tet trana kei, ofo nrana man tet. Yo, nto nsawer fe naha, ofo nrana fot man tet, se bo tain tdihar wat na dli mrem.”
50 Mde Laban wadien wono Betuel la yto: “Ni hra ke yka kadio kat yehin Tuhan wak. Mam mhar kat dait mto msgia afe mbot, fe hra Tuhan wkerek sadir fe walem. 51 Ribka le mkom. Nwien fien om madien nan nein, mabe wata nfe na kohok ou wfe wet ou wsmian, mde le Tuhan wkororo walem.”
52 Ofo Abraham wfe na dihan ou woso ni hra ei yrana ei, ofo ou wbatoko wse fobi aiti, wsaesik man Tuhan. 53 Mde wkrit fien hriet yehin emas, perak, yidien fot not trik adit yrok ei, yka fo whnak yibe ni seris yin Ribka om. Mde ou wala kwat, whnak ni hra yeit pitis warok yin mamon Laban ou, wadien fot meme om. 54 Sba oko fo na dihan ou wadien ou wfe na ei yeit ni, yoko kla, mde ei yese yik oko.
Uwade sba fo, ei ysidik, ofo na dihan ou wrana wto: “Nai fe nai, tet tsalit oli wata tse tfe na kohok ou wak.”
55 Mahin Ribka mamon wadien memem la yto: “Hau, wet madli okom main hewi sonat, ha, maheit latiot madien mam kawuak de amuk yahar oli kdie, sba fo madien nan nein.”
56 Mahin ou wrana man ei wto: “Tet tase semfe dait fe tet tsbal om msres. Nan ntoji dait tet, fe hra Tuhan watsiofo wale tet tsres. Tet tain wata. Nbahe tet tsalit oli tse tfe na kohok ou wak.”
57 Mde ei yto: “Mko, mam mwit fien wet madli om maka se mefitwain na mna om.” 58 Ofo ei ywit fien Ribka, ofo yto: “Nen naisi se nadien na ko la nein?”
Om mkane mto: “Ee, tet taisi.”
59 Ofo Ribka mamon wai ei yteye om madien mfe na dihan hra mkomot om yidien Abraham wfe na dihan ou ei yein sisi. 60 Ei yska ojin, yhnak fle fe om yto:
“Mam mihano nen, nkafe wet ntakein ei yrok karmiak kat,
ribu man ribu man, yde sdiok.
Basak ntakein ei ydanhok, yeseti kota
hra na khan ei yfei.”
61 Mde Ribka madien mfe na dihan ei yyo hrien, yorin yse unta ysbiele ago, yidien na oko yein. Mde ke fo Abraham wfe na dihan ou wwien fien Ribka madien ei yein kawuak yde yhok yik fobi Kanaan.
62 Mde hra oko fo Ishak wsalit oli [wse Hebron] wahin kla sitayi Lahai-Roi, wi hra kwan firi ou wase wak fobi sabarak Negeb. 63 Siwit tali mteit rohoin, ou whok wain wse sanwat wabri, wabe wnok tmol ni, ofo wkobia wsifuon whot afat fo, unta warok ei yka. 64 Ribka mahin ana mkobia msifuon, mhot afat fot Ishak, ofo mais mahin mfe unta ou, 65 mefitwain man na dihan ou mto: “Na dla man sie ma wain fe wi sanwat ana, waka wren fe faf?”
Mde ou wto: “Tet tfe na kohok wfe wet le wou!” Ofo om mlouk not smian fe om maka, mlakti msifuon mabe mkowahe ou.