Sara Maigi
23:1-20
23
Sara mase kawuak de umur der 127 (na mtamre yeigi whri na wna mtalak),
3 Mfot fo, Abraham wsidikti kat wsmian okom, wwaini man na sa Het 4 wto: “Tet tke na sa wat tet taka tti se nan nik ko. Nto neisi fo, nsafo bet mre man tet mabe hin se bo tkali tsmian ma eigi kom.”a
5 Mde na sa Het ei yrana man Abraham yto, 6 “Nai fe nau Smau, noso mahin mam mik. Nen nabe na wafle nahin Nago wak nan mam. Mde ke fo nkali wata nsmian maegi kom mak hin knawato mam mi hra mabot kat. Na mre ykrek fe dait ei yfe hin mabe nen nkali nfe na hra yeigi ei.”
7 Ofo Abraham wahin wsaesik man na fobi, na sa Het ei. 8 Ou wrana man ei wto: “Nan nto neisi tet tkali tsmian maegi kom, ofo noso nbakoko fe tet. Nwaini wanik man tet, nto man Efron hra Zohar wfe wet ou, 9 se bo ou wsafo wfe knawato Makhpela hra mak ou wfe sanwat mata koit. Nwaini se bo ou wsafo man tet tkain, mat pitis ytatol, mabe kawuak tfe hin knawato mak nan nik ko.”
10 Madien hra oko fo, Efron, na sa Het ou, wleli sisi fot wak oko. Mde ou wrana man Abraham se bo na sa Het kadio hra yleli sisi yik fan ta kota ou wa ei yoso fot. 11 Wto: “Mdain, tfe na fle nen, noso mahin tet tak. Tet thnak sanwat om man nen. Tet thnak fali fot knawato okom hra mak sanwat mtefit om. Mak krek tet tfe na ke ybariomo, tet le thnak tkoin wi kom man nen nkain. Nkali wata nsmian om mak knawato koit.”
12 Mde Abraham wsaesik oli man na fobi ei. 13 Wto man Efron se bo na marok ei yoso kadio kat krek wto: “Noso la tet. Nto naisi fo, tet tfelit kerek sanwat koit madien pitis. Nto naisi fo, bo tet thnak pitis man nen se bo tkali tfe nai yeigi yik koit.”
14 Ofo Efron wsalit wto, 15 “Tfe na fle nen, noso la tet, sanwat bet om mat syikal perak 400. Ni mit senfe ma ekei? Nkali wata nfe na eigi!”
16 Mde Abraham wsamenie fe ni hra Efron wrana ei, ofo ou wkniet pitis mak timbangan, maka fo, whnak man Efron, mtatol madien ni hra Efron wrana man na sa Het kadio yoso krek - o le ma perak syikal 400, ytatol yidien kniet hra nai ysafo sawuan ni.
17 Mde ke fo, Efron wfe sanwat hra mak Makhpela hra wataren wse Mamre - sanwat om madien fot knawato hra mak mabrim, yidien fot wkoit kadio hra yik sanwat mabri ekei yidien fot hra yik mtefit ei - 18 wi ekei kadio kat Efron wsafo yin Abraham wkain kawuak. Na sa Het kadio hra ykro yik fan ta kota okom ysayo kadio kat. 19 Oko wale fo, Abraham wkali wsmian Sara om mse hin knawato mak sanwat Makhpela hra mataren Mamre (o le ma Hebron) mak fobi Kanaan. 20 Mde ke fo sanwat okom madien fot knawato hra mak mabri om, na sa Het ei ysafo man Abraham wkain kawuak mabe hin knawato man ou wadien wtakein ei.