Nago Wbahe Hewain Abraham
22:1-19
22
Mde, bo waheit wase mok kat wak ana fo, Nago wbahe hewain Abraham. Ou wwit wto: “Abraham!, Abraham!”Ofo Abraham wto: “Wo! Tet le mke!”a
2 Mde Nago wbahe wto: “Nwien fien nfe wet oko, nfe wet mres tomi Ishak hra nen nmro fe ou, ofo la nan nein nse fobi Moria. Wak ana fo, nkerek ntatik kat ou wabe ni sanfe wan tet, wak sfa hra bo tet tkakniet.”b
3 Klen sawok uwade mlabit kat fo, Abraham wsidik wahin, wkait ni maleli mak ou wfe keledai, wwit fien ou wfe na dihan yikan lak man ei yidien wfe wet Ishak, wkafla wkoit seli yrok ytatol yibe ni sanfe om, ofo wadien ei yein yse wi hra Nago wrana man ou. 4 Kayi de tali tolik fe fo, Abraham wkobia wsifuon, whot afat wi okom.
5 Mde ou wrana man wfe na dihan lak ei wto: “La nan nidien keledai niheit nik ko! Tet tadien wet oko, la mam mein mse ana. Mik ana fo, bo la mam mwit mhdin Nago, ofo mam mka mba kat oli nan.”
6 Abraham wlouk wkoit seli yibe sala kohok om, yka fo wlak yse Ishak wkbek se wkafe, yo Abraham wsiok lele wnit madien sak, ofo la yein sisi. 7 Yik fan kedi fo, Ishak wto man wono Abraham wto: “Tono?”
Ofo Abraham wfalas wto: “Wo? Tfe wet?”
Ofo Ishak wefitwain wto: “Sala madien wkoit seli le mke, mahin domba wawet wabe ni sanfe wafe sio?”
8 Mde Abraham wto: “Tfe wet, bo Nago le whnak kayi domba wawet wabe ni sanfe. Faf fein wata!” Wata fo la yein sisi kawuak.
9 La yhok yik wi hra Nago wrana wale man ou fo, Abraham wbatalok sala kohok, wbaret wkoit seli yik sala batalok masa ago, ofo wkaitti wfe wet Ishak, waka fo wlak wak wkoit seli ysa ago fo,c 10 wlouk sak om maka, wto wkerek wfe wet wdioro om.
11 Madien ro kat hra oko fo, malaikat Tuhan wfe wsalo mahin yik mayehet ago, whowa kat ou wto: “Abraham! Abraham!”
Mde ou wfalas wto: “Wo, tet le mke!”
12 Ofo Tuhan wto: “Nkosia kat sak okom! Nska amot wet ou wala! Nsiok oli dait ni mre msgia man ou. Madien hra ke tet tnok nen naliak noso kmiet man Nago tet, fe hra nen nkrek fe dait nfe wet ou, nfe wet mres tomi ou.”
13 Mde Abraham wsirek, whot fo domba wadla mre wsa ei ytibias lak, ou wawok-awok wak wi masari. Ofo ou wain wse koit, wwien fien domba oko, ofo wkerek tnes, wsanfe man Nago, wdanhok wan wfe wet ou. 14 Mde Abraham wwak wi okom mkedi mabe ‘Tuhan Whnak Kayi.’ Kayi de madien hra ko, nai yrana yto: “Mak sfa Tuhan wfe, ou whnak kayi.”
15 Malaikat Tuhan wwit oli Abraham mao lak fe wahin yik ago. 16 Wto: “Tuhan tet tto tfafti kat tkan ta kom, fe hra nen nsiok wale mde ke, nen nhnak nfe wet wamres kat wan tet, nkrek fe dait ou, nkahiowain dait,d 17 ofo tet thnak fle fe kayi nen, tatsiofo nfe wet ei ykafe wet yrok se bo ntakein ei yrok karmiak kat yde twon yik yik ago, mde fot le kinti mak siwan wtefit ale. Na hra ykhan sawuan yidien ntakein ei, basak ei ywain kat ei, ydanhok yese yik ei yfe kota ei. 18 Basak tet tatsiofo kayi na sa kadio kat yik fobi katak ei, main fe nen nbiti ou,e fe hra nen noso kmiet wale tet.”f
19 Mde Abraham wsalit oli wse wfe na dihan lak ei yik, ofo ei yein sisi oli yse Bersyeba.
Nahor Wfe Wet Ei
22:20-24
20 Abraham waheit wase mok kat wak ana fo, woso nai yrana giet fe wamon Nahor wkafe wet yrok. Nai yto: “Milka hra namon Nahor wsmian om mkafe wale wet yidlai yrok yin ou. 21 O le ma Us hra waflesa, wadien Bus, wadien waliwet Kemuel (hra wabe biti na sa Aram), 22 yidien fot Kesed, ofo Hazo, Pildas, Yidlaf wadien Betuel.” 23 Betuel oko le hra wkafe wet Ribka. Na dla yikan mtadolik ei Milka mkafe yin Nahor hra Abraham wamon. 24 Nahor wsmian ma ese om hra mkedi mabe Reuma om mkafe fot wet yidla mrei, o le ma Tebah, Gaham, Tahas wadien Maakha.