Sara Mkafe Ishak
21:1-7
21
Tuhan whnak hares man Sara mde le ou wrana krek fe walem. Ou wsiok man om wde kayi hra kaman ou wkadoin wale. 2 Mde Sara mkmat ofo mkafe wet wadlau wan Abraham hra wkan mlo wale, mtatol wadien hene hra Nago wkadoin man ou.a 3 Abraham wwak wet hra Sara msois firi wan ou wkedi wabe Ishak (hra nai yto ‘Ou Wasak’). 4 Ishak wase amuk mtadolik, ofo wono Abraham wbrein ou, wkerek kat ou wflak mfalek matam wde le Nago wbahe wan ou.b 5 Abraham wase wale der 100 (na mahot yeigi), ofo Sara msois wfe wet Ishak wan ou.6 Sara mto: “Nago wsiok wale tet tasak fla kamit fe tkashok le mke. Na kadio hra yoso tet tkafe kmo wet, ofo yasak tla mede kayi, ykashok sisi fe tet.” 7 Om mto mskatiokot mto: “Nto tkoin, na mre dait ynok yto man Abraham yto: ‘Basak nsmian Sara msio oli wet!’ Fe hra na kadio ynok deri yto tet tkafe oli dait wet. Tsmian wtrar wale, wkan mlo wale, mahin tet le tkafe kmo wet wadla mre wan ou!”
Abraham Wbahe Hagar Madien Ismael La Yein Kat
21:8-21
8 Hra ko fo wet oko Ishak wfle wale. Mayi fe tali hra ou wleli wemem msio ei, wako oli dait, ofo wono Abraham wsiok konon mafle kat, mabe wfe wet ou wfle wale. 9 Mahin Sara mhot fo wet hra Hagar na sa Mesir om mkafe ou wtbekein-kan Ishak, 10 ofo om mrana man Abraham mto: “Nwain kat kawor Mesir madlim mhok fali kat wet ou ma okou! Fe hra kawor mfe wet okou wkain sayi dait flesa afe trifan hrien wadien sisi dait tfe wet Ishak ou.”c
11 Ni okom molot fe Abraham wabri om mkahiowain kat, fe hra ou wmro fe wfe wet ou. 12 Mahin Nago wrana man ou wto: “Nkahiowain dait fe wet ou wadien nfe na dihan om. Noso wati ni hra Sara mrana yin nen ei, fe hra tet taher ntakein ei yein fe deri Ishak.d 13 Mahin ntakein hra mais fe nfe na dihan om, tet tsiok ei yibe fot na sa, yibe hra ou wabe kayi nen nfe wet ou.”
14 Wi mlabit kat fo, Abraham wwien roti madien botol mahin erwas falek mres hra mhon fe kla, yka fo whnak yin Hagar msebet yik mkbek ago, ofo wbahe om madien mfe wet ou la yein. Ofo om main sak-sak deri mak fobi sabarak Bersyeba.
15 Kayi de kla hra mak botol okom mdain, ofo om mlak wet oko wak wi sari satrio malowin aiti, wak wkoit molo mres. 16 Mde om mkadin mahinti kat wet ou, mleli mkadlo kat mak hra ana, mabe mto: “Tet tmro fe wet ou wluwa kat wale, tsayo dait wabe waigi.” Om mleli mak ana mawo, mokol kat msalo mfle.
17 Nago woso fo wet ou wawo fot, ofo Nago wfe malaikat wak yik mayehet ago wwit man Hagar wto: “Hagar, nen nrwe buon fe me? Naliak amot! Nago woso wale wet ou wawo wahin wi hra wase koit. 18 Nsidik, nkosia fien wet koit, nsiokti wak wna, nsria la nein, fe hra basak tet tsiok ou wabe na sa wafle.”
19 Mde Nago wkororo Hagar msifuon ei yhak, mhot ro kat kla sitayi mrem. Ofo om main, mtehe kla man botol falek om, maka fo mhnak man wet ou wakom.
20 Nago wlolowain wet ou kawuak de wfle. Ou wase kawuak wak fobi sabarak, wnaroro whana sawuan erwas. 21 Kawuak de ou wfle, wase wak fobi sabarak Paran, ofo wemem mwien na dli man om mahin Mesir man ou wsmian.
Abraham Wkait Toto Ni Wadien Abimelekh
21:22-34
22 Hra oko fo, Abimelekh raja na sa Filistin ou wadien Pikhol, na sebe wafle hra wslonti ou wfe kaisin ei, la yto man Abraham yto: “Mam mhot fo Nago wadien sisi wale nen, watsiofo wale ni warok hra nen nsiok ei ysres kadio kat.e 23 Mto mde ke fo, nfafti kat man Nago wan tet toso mak ko, se man tet, man fot tfe wet, tate, tate kokos ei, bo nabri msgia oli dait nan mam mke. Na omuok nen nase lis wale nabe na ti nak tet tfe fobi kom, ofo tet tsiok deri mabot man nen. Hra ko fo nfafti man tet mabe nen nsalit nsiok deri mabot man tet tadien tfe na sa ei.”
24 Ofo Abraham wto: “Yo oma, tet tfafti kat le mkom!”
25 Mde Abraham warin fali man Abimelekh wto: “Hra nen nfe na dihan ei yreko kat tet tfe se kak hra tet tkak madien kamuolo.” 26 Mahin Abimelekh wto: “Hyee, tet tnok dait. Na sio ma wsiok ni mde ke? Nen nrana hatot dait man tet fe me? Tet toso dait latiot kayi de tet toso kmo madien hra ke.”
27 Mde Abraham wwien domba yidien sapi yka, whnak kadio kat yin Abimelekh se bo la ykait todo sisi ni se bo la yibri mres, la yibot oli, ykhan oli dait. 28 Mde Abraham wberiet wat domba yidli ywet mtalak yehinti kat domba man ei. 29 Ofo Abimelekh wefitwain man Abraham wto: “Domba mtalak hra nen nberiet ke yibe mit ma ei?”
30 Abraham wsalit wto: “Nwien fien kayi domba yidli ywet mtalak ekei yehin tet tak, yibe ni esikti yibe tfelit kerek se kak hra tkak mak nen nfe fobi kom.”
31 Mde eke fo, nai ywit wi okom mabe Bersyeba, hra nai yto ‘Se Kak Fafti,’f mabe na dla lak ei yfafti ni yik wi okom.
32 Ei ykaitti todo wale ni mak Bersyeba, ofo Abimelekh wadien Pikhol, ou wfe na sebe wafleu, la ysalit oli yse fobi ei yi Filistin. 33 Mde Abraham worik wkoit tamariskag wolo mres wak oko, ofo ou wwit Tuhan Nago Hra Waron Lis Kawuak ou wkedim. 34 Mde Abraham waheit kdie wase lis, wabe na ti wak fobi na Filistin yfe okom.