Abraham Wadien Abimelekh
20:1-18
20
Mde Abraham wti wahin Mamre wi Hebron, wain wse fobi Negeb. Wak ana fo, wase flalie wak bri, Kadesh mahin ta, Syur mahin ta. Mde ou wti kdie oli, wase wak Gerar, wabe na whok omuok. 2 Wak ana fo, Abraham wrana fe wsmian Sara wto: “Tet tahano le mkom.” Mde Abimelekh, raja Gerar ou, wbahe nai ywiehla fien Sara om maka mse ou wak.a3 Amuk mre fo, Abimelekh wasamik ni, wto Nago waka wse ou wak, ofo wrana man ou wto: “Nen nke bo naigi kayi fe hra na dli hra nen nwien fien ro kat — na smian le mkom!”
4 Mahin Abimelekh wadien dait latiot om, ofo ou wrana wto: “Tuhan, nen nto nalbir na sa hra ysiok dait ni mre ysgia fe me? 5 Hra na oko wrana gebra man tet wto: ‘Tet tahano deri le mkom.’ Mde fot le om mto: ‘Tet tamon le wko.’ Tet tsiok ni okom madien sablit mabot. Tabri melek, tsiok dait ni mre msgia.”
6 Mde Nago wrana main fe ou wasamik ni wto: “Yo, tet tnok nen nsiok ni ke yidien nsablit mbot man tet. Oko le ma tet twanik nen se bo nen nkafe dait satian man tet, mabe nokot dait om. 7 Bot ko nsalit kat oli na dli om mse msmian ou wak. Fe hra ou eke nabi - bo ou wsikafit man nen se bo nen nron deri. Nto nsalit oli dait om, ofo nen nadien nfe nai kadio bo neigi kayi!”
8 Uwade kat fo, Abimelekh wwit fien ou wfe na dihan marok om, ofo wrana hatot fe ni hra ou wasamik ei, mde ei yeliek karmiak kat. 9 Mahin fo, Abimelekh wwit fien Abraham, ofo wrana wto: “Hra nen nsiok buon ni masgia mde eke man tet fe me? Tet tsiok buon ni mit ma msgia man nen om hra molot fe nen nbaret lolot tet tadien tfe kerajaan kom mkafe satian maflem? Nen nsiok wale ni masgia man tet - ni hra nai ysiok dait kat!” 10 Mde Abimelekh wefitwain man Abraham wto: “Nen nnok ni mit mam mkaka tet he nsiok ni mde le ke?”
11 Abraham wto: “Tet tnok deri tto na mre yik wi ko yeliek dait Nago; tet tnok deri tto bo nai yska tet, fe hra tsmian kom. 12 Hra om mke tet tahano sadik le mkom, fe hra la mam mono sisi mres, ha om meme wat, tet teme wat. Mahin tet tsalit tsmian oli om. 13 Madien kamuolo Nago wbahe tet tain batara, thok tahinti kat tono wai, ofo trana krek man tsmian om tto: ‘Nen nto nbakoko fe tet, ofo wi kadio hra faf fein, fto fhok fik ana, ofo nto deri nto: “Tet tamon le wkou!” ’ ”
14 Mde Abimelekh wwien fien kambing domba yidien sapi yidien fot kawor yidlai yidli, whnak kadio kat ni ekei yin Abraham. Ou wsalit fali oli fot Abraham wsmian Sara om mse oli ou wak. 15 Mde Abimelekh wto: “Fobi tet ta deri le mkatak hra kom. Mahin deri nen nak, nase nak sio?”
16 Ou wrana fot man Sara wto: “Nhot la, tet le thnak perak syikal seribub yin namon ou. Pitis kdois ko thnak mabe thes fe tet twaini samhak nen naka nse tet tak. Ofo nen nkain oli dait satian mre man tet. Nfe na kadio ei ynok wale nen nabri melek.”