Nago Walbir Kat Kota Sodom Madien Gomora, Wkri Kat Lot Whok
19:1-29
19
Malaikat lak [hra ysifuon yde le na dla tkoin] ei yhok yik kota Sodom yidien siwit kat. Lot wleli samne wak kota mfe mobo magiet, ou whot yehin ana yka. Mde ou wsidik wain wayen ei, ofo ou wti, wbatoko wteit, worik wsifuon yse fobi aiti wabe watik kein na omuok lak ei. 2 Mde wto: “Nai fe nai, nka wata ntrik nse nfe na dla tet tfe bol kom. Nka, fese la fik bol tet ta! Nware nteit ei, se bo klen sawok uwade fo, nai fe na nan nein kein kdie.”Mde ei yto: “Mdain, mam mein mese deri mse wi masanwat mak kota mabri.”
3 Mahin ou wlon-lon wkanas kat kayi de ei ylio yse ou wak ytrik yse ou wfe bol. Mde ou woyo ni eit kadio kat yidien fot roti hra madien dait ragi, yka whnak yin ei yeit. 4 Oko fo ei yese dait sonat, ofo na dla marok mahin kota Sodom, yiwedla yifori yidien fot yitrar, na dla kadio kat hra yik kota ekei, yka ylalo bol okom. 5 Ei yhowa yto: “Woi, Lot, na dla hra yka firi yidien amuk, yka yse nen nak ko yife sio? Natik ei yhok yka mam memir ei!”
6 Lot whok, wlakti hrede mak wsbiele ra, 7 ofo wto: “Tanak wa nan, nsiok amo ni masgia mde oko mala! 8 Ha, tet tfe wet yidli lak hra na dla mre yokot latiot. Nto neisi fo tet thnak yin nan nsiok wata ei nde le hra nan nkashok fe. Mahin na dla omuok lak ke, nsiok sgia dait, yibe ei yka yese yik tet tak bol ko, tet ttek fe ei, na mre ysiok sgia dait!”
9 Mde ei yto: “Nnh! Ntain la! Hra kaman na sa wat nen naka nase nadien sisi mam, nadien ko nto nabe hakim nan mam? Bo mam msiok sgia nen newer kat nahin nai yikan lak ei!” Mde ei yhorot yes kaf kat Lot, yrohok yibe yto ybatdak hrede om.
10 Mahin na dla lak hra yik bol mabri ykein fien kat Lot wtrik kat wse bol mabri, ofo ydanti tamli hrede om. 11 Mde la ysiok na marok yik hrede ysibra kadio kat, mahin yiwet kayi de yifle, se bo nai yidihar hrede om kayi de yfasa.
12 Mde na dla lak ei yefitwain yto: “Nen nto nkain na mre yik ko, nkonsiofo mre afe, nfe wet yidla yidli mre afe, nmait mre afe, nen nfe na wat kdie mre yik kota ko, ofo nkothok kat ei, nbahe ytain yehinti kat wi kom, 13 mabe bot ke mam mbawas malbir kat kota ko! Tuhan woso wale ni hra nai ykar kohok yin ou fe na hra yese yik kota kom ysiok sgia ni, kawuak de ou wbahe mam mka malbir mbawas kat kota kom mdiris.”
14 Ofo Lot whok wrana ni fe na dla lak hra yto basak ysmian ou wfe wet yidli lak ei, hra ou wto bo wkonsiofo ei, wto: “Nsidik, nhokti kat tamli wi kom, fe hra Tuhan wto walbir kota kom, wsiok mdiris kat!” Mahin wkonsiofo tlo ei ynok deri yto yaris tlo ou wgebra deri.
15 Sies mto mkerek fo, malaikat lak ei yhorot Lot ybahe yto: “Nahin tamli, nadien nsmian, wet lak ei, ntain kat se bo nen nadien ei nkak fe fot dait nik kafir hra bo Nago wsiok malmias kota kom!”
16 Ou whenen-hanan latiot, ofo na dla lak ei yslon fien Lot wadien wsmian, wet ei ynai, ytain kafrit fali yhok kat yehin kota ou, wabe Tuhan wmro fe ei.a 17 Ytain fali yhok kat yse tlein, ofo man ou wbahe kat man ei wto: “Nsese! Ntain kat nse sfa ra! Nsmit oli dait mse nsbiele! Nskaros oli dait nik toji Yordan ko! Nsese sros kat nse sfa ra, se bo kafir msiok dait nan nkak!”
18 Mahin Lot wkar kohok man ei wto: “Nai fe nai, nbahe dait mam mein lis mse sfa ra! 19 Nai fe na nan nmro fe wale, nkosia kat nfe na dihan tet, mahin nto tet tsese lis tse sfa ra, bo kafir om mbakorwain tet, ofo tkak. 20 Nhot la, kota mreu le wataren alkou. Nliokeit wata tet ttain tse le oko se bo tet tkak dait. Kota ou wawet deri!”
21 Ofo ou wto man Lot wto: “Mko, tet thnak ni hra nen nwaini nlon-lon fe okom; tet talbir tbawas kat dait kota hra nen nrana ou. 22 Mahin ntain tamli nse ale, mabe tet taheit tsiok hewi dait ni mrem mabe nan nik latiot fan kedi kawuak de nan nhok sba nik ale.” (Oko le ma nai ywak kota okou wkedi wabe Zoar, ou le ma nai yto ‘Wawet.’)
23 Tali msieret mska fobi, ofo Lot whok wak Zoar. 24 Mde Tuhan wbatweit kyen sala tewo madien amak smat belerang hra ybia ydhen ei yeis yehin ou wak yik ago, yrit kat Sodom madien Gomora.b 25 Mde le ke fo Nago walbir wbawas kat kota kadio hra yik toji Yordan - na kadio yidien wkoit hro hra yik fobi ekei. 26 Mde Lot wadien wsmian, wfe wet ei ytain kat sisi mahin, wsmian om mbafelek msifuon msmit mse msbiele, mde mlelek mabe kawuak amak sira sakro hra maheit mkro.c
27 Uwade kat fo, Abraham wsidik wsalit wse wi hra kramuk ou wkro wak Tuhan wbariomo. 28 Ou wsmit mtatol mse Sodom madien Gomora ale, mse kadio kat toji Yordan, mde ou whot fo sala mbi mkafoi, mfak mkodo marin kat mse yik ago, mde kayi nai yrit sala melin wat.
29 Mde kayi eke Nago walbir kat kota hra yik toji ekei. Mahin ou wnok tmol Abraham, ofo wkosia kat Lot wahinti kat kafir maflem hra mflie kota ekei hra kwan Lot wase.
Lot Wadien Wfe Wet Yidli Lak Ei
19:30-38
30 Mde Lot wadien sisi wfe wet yidli lak ei yehinti kat Zoar, yein yese yik sfa ra, wabe ou waliak wase oli dait wak Zoar. Ofo ou wadien wfe wet yidli lak ei yese deri yik knawato. 31 Tali mre fo, maflem mto man maliwet mto: “La fono wtrar wale. Na dla mre dait yik fobi kom hra yka ysmian faf, mde hra na tkoin ysiok lokdi yik fobi katak. 32 Naka la fhnak twok mre yin la fono wako, ofo la fese fidien ou, se bo faf fkafe wet yibe yhro kein yin la fono ou, wa bo na sa man faf ftinik.”
33 Wadien amuk oko, ei yhnak twok anggur man yono wakom, mde wet mafle om mtrik mase madien mono. Mde mono wmsit wfle, wnok dait om maka madien la yese, wnok dait om msidik main oli.
34 Tali kdie man oko fo, mafo om mrana man maliwet mto: “Kramuk amuk tet tadien wale a fono la mese. Bo amuk ko, faf fhnak oli twok anggur om man ou wako, ofo nen nadien ya ou la nese, se bo faf fkafe kein wet mre yin faf.” 35 Mde ei yhnak oli twok anggur yin yono wako madien amuk, ofo maliwet om msidik mamir fot mono. Madien hra oko fo ou wnok dait fot wet om maka madien la yese ei, msidik main oli ou wnok dait.
36 Kayi de Lot wfe wet yidli lak ei ykmat fe yidien yono ou. 37 Hra maflesa om mkafe wet wadlau, waka mwak ou wkedi wabe Moab, hra nai yto ‘Wahin Tono.’ Ou eke wabe biti na sa Moab kayi de hra ko. 38 Wet makyam mkafe fot wet wadlau, mwak wkedi wabe Ben-Ami, hra nai yto ‘Wet Na Sa Mam Mi.’ Ou eke wabe biti na sa Amon kayi de hra ko.