Nago Wtfoi Abraham, Wkadoin Fe Sara Mkafe Wet
18:1-15
18
Tali oli wat kdie mre fo, Tuhan wyen hata wkan om man Abraham wak Mamre. Oko fo ou wleli wak wkoit fle yolo yilowin yik bol dik tenda om mgiet, fe tali ou wdrot. 2 Mde ou wkobia wsifuon, whot fo na tolik ei ykro yik ou wbariomo. Ou whot ei fo, wahin hrede ra wain wsese wren fe ei, ofo wti wbatoko wteit wse fobi aiti wabe wkan tali fe ei.a3 Ofo ou wto: “Nai fe nau, tfe na wafle nen, nto nmro fe tet, ofo nain sros amot nfe na dla tet tala. 4 Nkro la! Tet twien fien wata kla mre yka yin nan nware nteit. Nan nleli nskaros firi nik wkoit molo malowin ko. 5 Tet tain twien firi ni eit mre yin nan neit se bo nan nkan yluwa, ofo nan nein kein kdie, fe hra sma nan nka nse nfe na dla tet tak ko.”
Mde ei yto: “Mko, nsiok wata yde le hra nen nrana fe ekei.”
6 Ofo Abraham wain tamli wse wsmian Sara mak bol dik om ofo wto: “Yo, nwien tamli tepung yibot kempir tolik, nkodok tamli ofo noyo roti!”
7 Ofo Abraham wsese wren fe sapi, wwien fien sapi wawet hra wkan fokot ei ytriat, mde whnak wan na dihan, wabe woyo tamli. 8 Mde ou wwien fien susu sapi mkakos hra nai yto dadih, yidien fot susu tkoin yidien sapi wawet hra na ou woyo wale oko, ofo whnak wlak yin na ekei ybariomo. Ou wak wkoit molo, wkro fali ei yeit ni eit ekei.
9 Mde ei yefitwain man ou yto: “Hra nsmian Sara mafe sio?”
Ou wto: “Mafe bol dik mabri koit.”
10 Mde Nago wrana wto: “Tto tkoin kat, der man ale fo tet taka oli tahenek nen, oko fo nsmian om mkafe wale wet wadlau mre wan nen.”
Madien oko fo Sara mak bol magiet hra ei ysbiele om, moso wale ni hra ei yrana ei.b 11 Mahin Abraham wadien Sara la ytrar wale. Sara okom mkak-hen oli dait wale, ofo morsfe mkafe oli dait wet. 12 Mde Sara om masak hlok mak mabri, mnok mto: “Hra bo tet tmdo oli ma tkafe wet? Tet tkodiot tslopit wale le mke. Sma tet ta hra ko wtrar fot wale. Se bo mam mkafe wet oli mde le sie?”c
13 Mde Tuhan wrana man Abraham wto: “Hra Sara masak ro kat fe me? Tet toso om masak mto: ‘Tet ke ttrar wale ofo tet tkafe oli wet ou wde sie? Tet tdrot wale!’ 14 Se bo ni mit ma hra mkahiowain man Tuhan tet? Mdain! Der man ale fo, tet taka kayi oli tse nen nak, ttatiere fe Sara mkafe wet wadlau mreu.”d
15 Mahin Sara maliak, mde mkesi dienen mto: “Hau, tet tasak dait!”
Mahin ou wto: “Hyee, nen nasak wale.”
Abraham Wwaini Nago Wadien Sgia Dait Na Kota Sodom
18:16-33
16 Mde na ekei ysidik yehin oko, ysmit msiolok mse Sodom ale, ofo Abraham wadien twa ei yein. 17 Mde Tuhan wrana wto: “Ni hra bo tet tsiok ei, tet tlak diaman dait yidien Abraham. 18 Basak Abraham ou wabe kayi na sa maflem makohok, ofo tet tatsiofo na sa kadio kat yik fobi katak main fe ou. 19 Fe hra tet tlouk helwain wale ou, se bo wkororo wfe wet ei yein kawuak yidien Tuhan tet, ysiwain ni hra tet tbahe man ou, ysiok ni hra ybot, yihmes, se bo ni kadio hra tet tkadoin fe wale man Abraham, basak Tuhan tet tsiok kayi yin ou wtakein ei.”
20 Sba oko fo Tuhan wrana skatiokot wto: “Na marok ei ykar kohok man tet fe hra na Sodom Gomora ekei ysiok ni yisgia wsamsa kat yin ei. 21 Ofo tet tsiolok le mke tabe thot ni hra ei ysiok ysgia ytian kat yde ni hra nai ykar kohok yin tet ei, afe mdain. Bo tet tnok.”
22 Mde nai yikan lak ei ylelek ybaroro yein yse Sodom, mahin Abraham waheit wkro wak Tuhan wbariomo. 23 Mde Abraham wkadin wataren wse Nago wak, wto: “Bo nen nto nalbir nbawas kat nai yisgia ei yidien fot nai yibot, se? 24 De hra ntiere fe nai yikan 50 (na lak yeigi whri na wna yahar) hra yibot yik kota ekei, ofo de sie? Bo nen nalbir nbawas fali wata nai yibot yidien sisi nai yisgia fe hra nai yibot ysalolo, afe? 25 Nsiok mde ke amo mala! Nto nen nska sisi nai yibot yidien nai yisgia ofo okom msgia! Nsiok mde ke amot mala! Nen nabe Hakim Wafleu nak fobi katak, nkerek sadir mabe na kadio. Bo nen nto nsiok ni yisgia yde ke fo, bo nde le sie? Nsiok hra mabot deri.”
26 Ofo Tuhan wrana wto: “Mko, bo tak ale fo, tto ttatiere fe na kota Sodom yikan 50 deri (na lak yeigi whri na wna yahar) hra yibot, ha na wat hra yrok ei ysgia, ofo tet tadien sgia dait na Sodom kadio kat ei.”
27 Mde Abraham wrana oli wto: “Tet trana bren kat wale man Tuhan nen, mahin tet tabe deri bet afe kabiak, ofo tet tefitwain skatiokot oli tto, 28 mde hra nai yibot ei yharfe dait yikan 50 (na lak yeigi whri na wna yahar) ha, yharfe deri yikan 45 (na lak yeigi whri na wna mahot), ofo nen nsin nalbir nbawas kat na kota kadio kat fe hra nai yibot ei ysalolo, afe nen nto de sie?”
Ofo ou wto: “Tto ttatiere fe yikan 45 (na lak yeigi whri na wna mahot) hra yibot, ofo tet tadien sgia dait na kota kadio kat okom.”
29 Abraham wsalit oli wrana man Nago wto: “Yo, mde hra yikan 40 (na lak yeigi) hra yibot yik ale, ofo mde sie?”
Ofo ou wto: “Mabe nai yikan na lak yeigi ekei, tet tsiok dait.”
30 Mde Abraham wto: “Mde hra tet tto trana oli ni man Tuhan nen, ofo ntrere amot. Nliokeit deri tet trana ni yin nen. Yo, nto ntatiere fe yikan 30 (na mre waigi whri na wna yahar) yik ale, ofo de sie?”
Ofo ou wto: “Yibe yikan na mre waigi whri na wna yahar ekei fo, tet tsiok sgia dait ei kadio.”
31 Abraham wto: “Tet tbren kat trana oli man Tuhan nen, bo ntatiere fe yikan 20 (na mre waigi) hra yibot, ofo mde sie? Ofo bo nadien sgia kadio kat ei?”
Ofo ou wto: “Mabe na mre waigi, ofo tet tsiok sgia dait kadio kat ei.”
32 Mde Abraham wto: “Tuhan, nen ntrere dait man tet fe tet tefitwain kahlia kat mao mres oli man nen le mke: bo ntatiere fe nai yahar (10) yik ale fo, nto de sie?”
Ofo ou wto: “Yto yikan yahar deri fo, tet talbir dait ei kadio kat.”
33 Nago wrana kahlia kat ni fe Abraham, ofo wain. Mde Abraham wsalit oli wse bol.