Nago Wkadoin Krek Wadien Abraham
17:1-27
17
Hra oko fo Abram wase wale der 99 (na hat yeigi whri na wna yahar wtlok teit mtanhat). Mde Tuhan wyen hata wkan om man Abram wto: “Tet tke le ma El-Syadai, Nago Hra Wakohok Wlais Kat.a Nadien kawuak tet, nbot deri, nsiok dait ni yisgia mrem.
2 Ni kadoin hra kaman tet tkaitti-ti wale man nen, mabe nen ntakein ei yrok ei, bo tet tbatirik kayi man nen, se bo basak nfe wet ei ykafe kein wet ei yrok.”
3 Ofo Abram wti worik wteit sia yeli fobi ofo wsaesik man Nago. Mde Nago wrana man ou wto, 4 “Mahin tet tak ko, tkaitti kadoin tadien nen: Bo nen nabe kayi na sa marok ei yono nen. 5 Mde ke fo, nen nkedi nabe oli dait Abram, Bla Wafleu, ha, tet twak nen nkedi nabe Abraham, hra nai yto ‘Na Sa Marok Ybla Ou,’ fe hra nen nke tet tbatok nabe na sa marok ybla nen.b 6 Bo tet tsiok nen nke nkafe kein wet nate kokos wai kayi de yrok, mre yibe na sa wat-wat, ysidik yibe fot raja. 7 Tet tke tkadoin krek man tet tadien nen nadien ntakein ei kayi de dian-dian kat, mabe kadoin hra maron, se bo tet tabe Nago tan nen, tabe fot Nago tan ntakein ei.c 8 Man nen, man fot ntakein ei, bo tet thnak fobi kom hra nen nase nabe na ti, o le ma fobi Kanaan kadio kat, tet le ma thnak man nan nkain kawuak kat. Ofo tet tabe kawuak ei yfe Nago.”d
9 Nago wto oli man Abraham: “Mahin nan nik nen nsiokti kawuak tet tkadoin kom man nen nadien nen ntakein ei, kawuak de nbiti nbla wai. 10 Tkaitti kadoin le mkom. Nsiokti kawuak ntodo nidien tet tadien nan, nidien fot ntakein ei: O le ma na dla hra nan nke nai ybrein kadio kat.e 11 Nai ybrein nan, ofo ni okom mhnak kakniet fe tet tkait kadoin okom madien nan nidien tet. 12 Madien hra ko kawuak de dian-dian nbiti nbla, wet hen yidla kadio kat hra yese wale amuk mtadolik, ofo nai ybrein kayi. Nai ybrein tiktol deri wet yidla ei hra nan nkafe yik bol nan ni, yidien fot wet man hra nan nkafe dait, ha, nkain pitis feu wahin nai yiti. 13 Na dla hra nan nkafe yik bol yidien fot na dla hra nan nkain pitis fe - nan nikan kadio nai ybrein kayi. Tet tfe ni kadoin mak nan nkan fokot mabri okom - o le ma brein om - mhnak kakniet fe tet tkadoin om hra maron, main lis kawuak, mtaret dait. 14 Na man hra nai ybrein dait, ofo nai ykosia kat na okou, wahinti kat na sa man nan. Ou waha kat tfe kadoin kom.”
15 Nago wto kein kdie man Abraham wto: “Nsmian Sarai om, nwit mkedi oli dait Sarai, ha, mkedi le ma Sara. 16 Bo tet tatsiofo om mkafe wet wadlau mre wan nen. Tet thnak fle fe om kayi de mabe na sa marok yemem. Ofo mtakein ei, basak ei ymre yibe raja na sa ei.”
17 Mde Abraham woso ni ke ofo wti worik wteit sia yse fobi ofo wsaesik man Nago. Mahin, ou wasak, wnok fe mak wabri wto: “Na man hra wkan mlo wale wase der 100 (na mahot yeigi), ofo wkafe oli wet wde sie? Mdain! Sara kom mase wale der 90 (na hat yeigi whri na wna yahar), ofo hra om mkafe wet mreu de sie?” 18 Mde Abraham wto man Nago wto: “Ah, Nai fe Nau, bo natsiofo deri tfe wet Ismael. Wet wat man ei yila!”
19 Mahin Nago wto: “Mdain, bo nsmian Sara mkafe kayi wet wadla mre wan nen, ofo nen nwak wet oko wkedi wabe Ishak, hra nai yto ‘Ou Wasak.’ Wet oko bo tet tkaitti kawuak tfe kadoin tadien ou, tadien fot ou wtakein ei - mabe kawuak kadoin maron om. 20 Mabe Ismael, tet toso kmiet ni hra nen nwaini ei mabe ou. Bo tet tatsiofo kayi ou. Basak wtakein ei yrok, tet tsiok kayi ou wkafe raja yahar teit lak hra yibe na sa yifle. 21 Mahin, tet tfe kadoin maron om, tet tkaitti tadien dait Ismael ha, tkaitti tadien deri Ishak, hra basak Sara mkafe wan nen, ou wadien der man hra ale, mok wsa sisi oli wde hra ke.” 22 Nago wsadir ni ekei wadien Abraham kawuak de yfot, ofo ou wsidik warin, wahinti kat ou.
23 Tali hra oko fo, Abraham wwit fien kat wfe wet Ismael wadien ou wfe na dla marok hra nai ykafe yik ekei yidien fot na dla hra ou wkain yidien pitis, o le ma na dla kadio hra Abraham wfe ei, ofo ou wbrein kadio kat ei yidien oko, ytatol mde le hra Nago wrana krek wale man ou. 24 Abraham wase wale der 99 (na hat yeigi whri na wna yahar wtlok mtanhat), ofo ou wbrein waleis ou wam. 25 Wfe wet Ismael wase wale der 13 (yahar teit tolik) ofo wono wbrein fot ou wam. 26 Tali hra oko fo Abraham wadien wfe wet Ismael la ybrein sisi, 27 yidien fot na dla kadio hra Abraham wfe, yidien fot na dla dihan kawor hra ou wkain yehin na sa wat, ei ybrein sisi yidien ou.