Yakub Wtain Wse Wamuk Laban Wak Mesopotamia
28:1-9
28
Mde Ishak wwit fien Yakub wabe whnak fle kohok man ou, mde wto skatoin man ou wto: “Nsmian amot na dli mrem mahin fobi Kanaan ko mala! 2 Nsidik, nain tamli nse Padan-Aram,a nse neme mono Betuel wfe nai yik, ofo nwien fien nasiolo mrem mahin neme mamon Laban wfe wet ei man nen nsmian. 3 El-Syadai, Nago hra Wkohok Walais Katb watsiofo nen, wsiok nen nkafe wet nkokos ei yrok kayi de nan nibe na sa yrok.
4 Nago whnak man nen nadien ntakein ei ni kadio hra kaman ou watsiofo wkadoin wale man nate Abraham, se bo nen nkain fobi hra nen nti naka nase omuok kom, fe hra Nago whnak krek wale man nate ou.”c 5 Mde Ishak wnahla Yakub wain wse fobi Padan-Aram, wse wamuk Laban ou wak. Laban ou wono Betuel, na Aram ou. Laban wahano le ma Ribka om, hra Esau wadien Yakub la yemem.
6 Hra oko fo na mre yrana hatot yin Esau yto: “Giet mo, nen nsamne! Nono Ishak whnak fle kohok wale man naliwet Yakub, wnahla kat ou wain wse fobi Padan-Aram mabe ou wwien fien wsmian om mahin ana. Nono wtoji naliwet wto: ‘Nsmian dait na dli Kanaan mrem mala!’ 7 Ofo naliwet Yakub wsamenie fe ni hra nono neme la ybahe fe ekei. Ou wain wale wse Padan-Aram.” 8 Mahin oko fo Esau wnok tnes wono Ishak whar kat waha wfe wet la ysmian dait na dli Kanaan. 9 Mde ke de, Esau wain wse wtot Ismael, Abraham wfe wet ou, ofo wwien fien wat Mahalat, Ismael wfe wet om, man wsmian hamis kdie olim. Mahalat mamon wkedi le Nebayot.
Yakub Wasamik Ni Wak Betel
28:10-22
10 Mde Yakub wahinti kat Bersyeba wain wse Haran. 11 Wain kayi de tali msrik, mde ou wase domri deri wak fan kedi. Ou wlouk fien amak mrem maka, wase tlein sa ofo wase wak oko. 12 Wase dis samne deri de, ou wasamik ni, whot fo wlin mre mahin fobi ko marin kayi de mse yik mayehet ago, ofo Nago wfe malaikat ei yorin yeis, yorin yeis.d 13 Tuhan wkro wak wlin masa ago wto: “Tuhan le tet, nate Abraham wfe Nago tet, nono Ishak wfe Nago. Fobi hra nen nase kom bo tet thnak kayi man nen, man fot ntakein ei. 14 Badian ntakein ei yrok yde kbiak, yyol-yal kat yse fobi katak, yse tali mhok ago ko, yse tali mti aiti ko, yse tasik amak ra ko, yse tasik blen ale ko.e Mais fe nen nadien ntakein ei, tet tatsiofo na sa kadio kat yik fobi katak.f 15 Wi man sio ma nen nain om, tet tadien sisi nen, tlolowain nen, kayi de tsalit tadien oli nen naka nse fobi kom. Tet tahinti kat dait nen kayi de tet tsiok kadio kat ni hra tkadoin krek fe yin nen le mke.
16 Mde Yakub wsifuon yhak, wde wto: “Tet taliak! Tuhan wase wak kayi le ko! Mahin tet tnok dait, tase samhak tak ko!” 17 Mde ou waliak wto: “Tawua main fe wi kom! Wi kom mabe kayi bol Nago wfem! Wi kom mabe hrede main mse ou wak wi mayehet ago!” 18 Uwade kat fo, Yakub wlak amak hra ou wase wsa tlein sa okom maka fo, worik mabe ni kakniet, ofo wlouk minyak yka, wolio has yik amak masa. 19 Ou wwak wi okom mkedi mabe Betel, hra nai yto ‘Bol Nago Wfem.’ (Kamuolo kota okom mkedi mabe Lus.)
20 Mde Yakub wkait ti-ti kadoin man Nago wto: “Nago, bo nen nto nkomot nsmit lien kayi tet tak fan hra tet tain kom, nhnak ni eit yin tet tat, nhnak not trik yin tet ttrik, 21 kayi de tet tsalit oli tadien tbot deri tse tono wfe nai yik. Mto mde ke fo, Tuhan nen nabe kayi tet tfe Nago. 22 Ofo amak hra tet torik okom mabe kawuak Nago nen nfe bol kom. Yo, mahin ni kadio hra nen nhnak yin tet, ni ror yo, ni biele wo, hrien ou, ofo tet tberiet wat kyamre yin nen. Mde hra tkain ni yahar, ofo tet trie kat mres maka thnak man nen nkain, ha, mtanhat ei yiheit yin tet tkain. Mde ke fo thnak persen yahar man nen, ofo persen 90 (na hat yeigi whri na wna yahar) yiheit yin tet tkain kawuak.”