Abram Wska Kaka Fien Wfe Wet Lot
14:1-16
14
Hra oko fo, Amrafel wabe raja wak fobi Sinear,a Ariokh wabe raja wak fobi Elasar, Kedorlaomer wabe raja wak fobi Elam, yidien Tideal wabe raja wak fobi Goyim. 2 Raja yikan hat ekei ykhan yfit yidien Bera, raja Sodom ou, Birsya, raja Gomora ou, Syinab, raja Adma, Syemeber, raja Zeboim, yidien fot raja kota Bela, hra nai yto fot yto kota Zoar. 3 Ofo raja yikan mahot ekei ybalifis yyo yfe kaisin yik toji Sidim, wi hra madien hra ko mabe siwan wkahtit hra nai yto Kla Misin afe Kla Maigi. 4 Fe hra raja mahot ekei ysaesik wale yin raja Kedorlaomer yese der 12 (yahar teit lak), mahin wadien der 13 (yahar teit tolik) fo ei yaha kat ou wslonti oli dait ei.5 Madien der 14 (yahar teit hat) fe fo, raja Kedorlaomer waka sisi wadien raja hra ybalifis yidien ou, ofo ei yfit na sa Refaim hra yese yik fobi Asyterot-Karnaim, na sa Zuzim yik fobi Ham, na sa Emim yik fobi Syawe-Kiryataim, 6 yidien fot na sa Hori hra yese yik fobi sfa bri hra nai yto Seir - yfit kat na marok ko kayi de yse El-Paran hra mataren fobi sabarak mafle mtefit om, mde ykanas. 7 Mde raja hat ekei ykohli ysalit oli yhok yik En-Mispat (wi hra nai yto Kadesh), ofo yfit yflie kat na sa Amalek yik ana, yidien fot na sa Amori hra yese yik Hazezon-Tamar.
8 Mde raja mahot yehin fobi Sodom, Gomora, Adma, Zeboim, yidien fot Bela (hra nai yto Zoar), ei yyo ei yfe kaisin ei yik toji Sidim yto yka yfit 9 Kedorlaomer, raja Elam ou, Tideal, raja Goyim, Amrafel, raja Sinear, wadien fot Ariokh, raja Elasar - raja yikan hat man ei ykhan yidien raja yikan mahot. 10 Mahin toji Sidim oko madien kmain yrok hra yhon fe aspal. Mde raja Sodom wadien raja Gomora la yidien ei yfe kaisin ei ytain, ofo ei yfe kaisin mre yti yse kmain mabri ra, ofo yada yin aspal ofo ykak, mre oli ysifi ytain yse sfa. 11 Raja yikan hat hra yehin tali mhok yidien ei yfe kaisin ei yhok yka, ofo yblan hrien, ni eit, yidien fot na kadio hra yese yik kota Sodom madien Gomora; ofo yein. 12 Ei ykami fot Lot, Abram wamon wfe wet ou, wadien ou wfe hrien ei, wabe ou wase wak Sodom, ofo ysria yein.
13 Mde na mreu wsifi, wtain sirik wain, waka whok wse Abram, na Ibrani ou wak. Hra oko fo, ou wase wak wkoit olo yifle hra Mamre, na sa Amori ou wfe. Mamre oko wadien waliwet lak ei, Eskol wadien Aner, o le ma ylok-lok yidien Abram. 14 Woso ro kat fo kaisin ykami wale wfe wet Lot ou, ofo Abram wkoyo ou wfe kaisin wedla na dihan hra ynok ykhan, yikan na dla 318, ofo ysese yti korwain kaisin ekei kawuak de yrat yik fobi Dan. 15 Mde amuk fo, Abram wberiet ou wfe kaisin ei, ofo wfit kaisin man ei, ywain yska ei kawuak de yhok yik Hoba hra Damsyik wtato mse ra. 16 Ofo ou wsalit fien kat oli hrien warok ei kadio kat, yidien fot Lot, wamon Haran wfe wet ou, wadien ou wfe hrien kadio kat, wadien fot na dli na sa Sodom Gomora marok ei, yidien fot ei yfe na ei.
Abram Wadien Melkisedek
14:17-24
17 Abram wsalit wale wahin wi hra ou wfit Kedorlaomer wadien sisi ou wfe raja lok ei, mde raja Sodom whok waka, wtafri ou, wlia kein ou wak Lolik Syawe, hra nai yto Lolik Raja. 18 Mde Melkisedek, raja kota Salem ou, wlak roti madien twok anggur. Ou le wabe imam wan Nago, Nago hra Wfle Wkohok Wlais Karmiak Kat.b 19 Ofo Melkisedek whnak fle fe Abram, wto:
“Nago hra Wfle Wkohok Wlais Karmiak Kat watsiofo Abram,
Nago hra wsiok yik ago wadien fobi kom,
ou le ma whnak fle fe nen.
20 “Faf fhdin man Nago hra Wafleu Wkohok Wlais Karmiak Kat,
Wabe ou whnak wale nfe yomon ei yin nen nska ei.”
Mde Abram wkoriet wlak tatik hrien kadio hra ou wblan ei, wber-ber kayi de satatik yahar. Ofo ou wlouk satatik mres ou waka, whnak wan Melkisedek ou wkain. O le ma nai yto persen yahar.
21 Mde raja Sodom wrana man Abram wto: “Nsalit oli deri tet tfe na ei, ha hrien ei yiheit yin nen nkain wata ei.”
22 Mahin Abram wrana man raja Sodom ou wto: “Hau, tet tkosia tna, tfafti kat wale man Tuhan wkedi, Nago hra Wfle Wkohok Wlais Karmiak Kat, Nago hra wsiok yik wadien fobim, 23 tto twien dait ni mre mahin nen nak, kneis mre afe, omos kait sepatu afe, mdain. Tet taha basak nen nnok nto nen le nhnak hrien warok oko man tet, yolot fe tet taheit tabe na kohok.’ 24 Mabe tet fo, twien fien dait ni mre mahin nen nak, ha, ni eit deri hra tet tadien tfe wedla ei yeit wale. Ha, man table Aner, Eskol, Mamre, yidien ei yfe nai, nliokeit ei ywien wata hrien mre yin ei.”