Nago Wkadoin Ni Man Abram
15:1-21
15
Mahin hra oko fo, Tuhan wyen hata wkan om man Abram, ofo wrana wto: “Abram, nen naliak amot! Tet tabe kbat ba kat kahat tan nen, tlolowain nen nahin kafir. Tet tabe fot nen nfe ni tasa mafle msamsa kat.” 2 Mahin Abram wto: “Tuhan, tfe Nago nen, bo nen nhnak ni tasa mit ma man tet? Tet tke tkafe dait wet mreu. Tet taigi fo, bo Eliezer wahin Damsyik, ou le waheit wkain trifan hrien kadio hra tet tfe. 3 Nen nhnak dait wet mre wabe wtakein wan tet, bo na dihan ko wdanhok wan tet.”
4 Mahin Tuhan wrana man Abram wto: “Hau, na oko dait, ou wdanhok dait nen. Ha, nen nfe wet hra nen nkafe sros wahin nabri om, o le ma basak wdanhok nen. 5 Mde Tuhan wkri kein Abram la yhok yse tlein, ofo wto: “Oma nhot mse yik ago, naher twon hra age. Bo nen naher sadik, afe?” Mde Tuhan wkadoin man ou wto: “Basak nen ntakein om mrok mde le twon yse yik ago.”a
6 Ofo Abram wnok tmol mak wabri wto: “Bo Tuhan whnak kayi wet mre wan tet, mde le ou wrana ei.” Tuhan whot fo Abram wten wkaso man ou, ofo wto: “Madien hra ko fo tet taher oli dait nen nfe satian. Tet taher nen nabe deri na wabot, nabe na wabri melek.”b
7 Ou wto oli wto: “Tuhan tet le mke, hra kaman twit nen nahinti kat kota Ur mak fobi Kasdim, tatik nen nse fobi kom mabe tet thnak man nen nkain.” 8 Abram ou wto: “Ya Tuhan, tfe Nago nen, nen nhnak latiot fobi kom man tet. Basak tet tnok mahin sio ma tkain fobi kom?” 9 Tuhan wto man ou wto: “Nwien fien man tet, sapi madli mrem mase wale der tolik, kambing madli mrem mase wale der tolik, domba wadla mreu wase wale der tolik, klen okles sana mrem, yidien fot klen mpompo sanam.” 10 Mde Abram wwien fien kadio kat ni ekei yin Tuhan, yka wkolok tahak flalie erwas fan lak ei, ofo wlak barere yslili wain yse tato-tato yik fobi aiti. Mahin klen ei ou wkolok tahak dait, ha wlak owo deri. 11 Mde klen wat mre man hra yeit erwas ykan fokot ei yka yslon yik erwas ykan fokot ekei, mde Abram wwain kat yehinti kat erwas hra ou wlak.
12 Mkdia tali msrik fo, Abram wase dis kat. Mde armian wkodo waisti kat ou, ofo ou waliak.c 13 Mde Tuhan wrana man Abram wto: “Noso la, tet trana tkoin man nen mabe ntakein ei basak ofo yti yse fobi na wat yfe. Yik ana fo, na fobi ei bo ysiok sgia ei, yolot fe ei yibe kawor yin ei, kayi de dian kat, mharfe der 400 man kat hra ale.d 14 Mayi fe der oko fo, tet taka kayi thirit kat na sa man eke hra ysiok sgia ei yibe kawor yin ei eke. Ofo tet teren kaka ntakein ei yhokti kat yehin fobi okom yidien yotik yfe hrien hra ei yblan yrok ei.e 15 Yo, mabe nen nmres, tet thnak nen nase kawuak de nen ntrar, nsa mririk fo, nen naigi mbot deri, nain nse nate kokos wai yik, ofo nfe wet ei ykali nen nak fobi kom. 16 Yo, mabe ntakein hra yti yese kawuak yik fobi wat man ana, basak dian kat fo tet twiehla fien nbiti ei yhok kat ysalit oli yse fobi okom. Tet thnak krek dait fobi okom man nen, fe hra na sa Amori, na fobi tit hra yese sonat yik fobi okom, ysiok dait sonat latiot satian yrok. Yo, basak dian kat, yfe satian ei yrok mewer kat, ofo tet thnak nbiti yka ybawas kat ydanhok ei yik fobi kom.”
17 Hra oko fo tali msrik wale, wi om mmian. Mde Abram wrioro fe fo whot fo belangan mres hra nai ysiok lele mabe wnit om mbi mkafoi, madien fot sitin man hra mdhen mkahroro, ei yka ymres yein yropiak fe erwas ykan fokot yflalok yibri aiti. [Mahin ou whot dait na mre wsiok lele ni hra ydhen ekei wain fe oko.] 18 Mde Tuhan wkadoin krek man Abram wto: “Basak tet thnak fobi kom man nen ntakein nbiti nbla wai ykain, mahin kla Mesir kawuak kayi de kla wafle hra Efrat –f 19 fobi hra na sa Keni, na sa Kenas, na sa Kadmon, 20 na sa Het, na sa Feris, na sa Refa, 21 na sa Amori, na sa Kanaan, na sa Girgasi, na sa Yebusi, fobi hra na sa yrok eke yese – fobi kadio kat kom basak tet thnak man nen nbiti nbla wai.”