Abram Wadien Lot La Yhriak
13:1-18
13
Mde Abram wahinti kat Mesir wain wse fobi Negeb, ou wadien wsmian wadien kadio kat wfe hrien ei, na ei. Ofo Lot wadien sisi fot ou la yein.
3 Whok wahinti kat fobi Negeb, wskaros wase tiwain kawuak de whok wak Betel mse ta, Ai mse ta, wi hra kaman wbadik tenda 4 madien wbatalok sala kohok. Oko fo, ou wwit Tuhan.
5 Lot ou wase lok wadien wtot Abram. Ou eke wkohok fot, wkain fot kambing-domba, sapi yrok, yidien fot bol dik tenda yrok. 6 Mahin deri fobi okom mwet, mkatak dait, mtol dait man la yikan lak ekei, yibe ei yfe ni ror ou warok, mde yese sisi semfe dait. 7 Mde wedla gembala Abram wfe yidien Lot wfe yhoyok frit. Hra oko fo na sa Kanaan yidien fot na sa Feris yese yik fobi okom.
8 Mde Abram wto man Lot wto: “Tfe wet, masgia mabe gembala nen nai yidien gembala tet ta yheden frit. La faf fhoyok frit amot mala. La faf fikan lok deri. 9 Noso la, mabot ma la faf fhriak wat-wat. Wi okom mkatak dait, aa? Nen nain nse tna tkoin, yo tet tain tse tna wait. Nen nain nse tna wait, ofo tet tain tse tna tkoin. Nen nlouk helwain. Mahin deri nen nak.”
10 Ofo Lot wkobia wsifuon, wsmit saswain fobi okom, mde whot toji Yordan madien kla warok mahin wata ago kayi de kota Zoar, wak toji wata kahlia aiti. Toji okom mbet mbot mde le kamuolo biele Tuhan wfeu, mde fot le toji mak fobi Mesir om. (Fe hra Tuhan wseli kat dait latiot Sodom madien Gomora.)a 11 O le ma Lot whelwain toji Yordan man ou wase, ofo ou wtiti kat Abram, wain wse tali mhok kawuak de whok wak toji Yordan. 12 Abram waheit wase wak samdi mak fobi Kanaan, mahin Lot wase wataren kota yik toji Yordan, wbadik wataren Sodom. 13 Hra oko fo na dla Sodom ekei ysgia karmiak kat, ysiok satian yifle ytatol yin Tuhan.
14 Lot wahinti kat wale Abram, ofo Tuhan wrana ni fe Abram wto: “Abram, nkobia nsifuon, nsmit kohli-hla la wi hra nkro kom, mahin ago mse aiti ko, mahin ra ko mse ale ko. 15 Fe wi kadio hra nen nhot ke, bo tet thnak man nen, man ntakein ei, kawuak de dian-dian kat.b 16 Ofo tet tsiok nen ntakein ei yrok yde le kbiak mak fobi katak. Mto mde hra na mre wto waher sadik kbiak kom, ofo waher kahet fot nen ntakein ei, mahin mdain, fe hra kbiak om na mre waher dait kat. 17 Yo, nen nain hewain, nsmit lien kohli fobi kom, malis wain kom, mabakredi kom, fe hra fobi kom tet thnak kadio kat man nen.”
18 Hra oko fo Abram wkosia kat bol dik om, wsiok kawuak mataren mak wkoit yifle yik Mamre, mataren Hebron, ofo ou wkalok amak ei yka, wbatalok sala kohok man Tuhan.