Nago Wwit Abram
12:1-9
12
Tuhan wkadoin man Abram wto: “Nahinti kat wi nen na kom, nen nfe na ei, nono wai, nain nse wi hra bo tet tkakniet man nen.”a2 “Ofo tet thnak nen nabe na sa maflem,
tet thnak fle fe nen;
Tet tsiok nen nkedi om mririn,
tatsiofo na marok main fe nen.
3 Na man hra yidien bot nen,
ofo tet tadien bot ei, tatsiofo ei.
Yo, na man hra yto yidien sgia nen, yfruo kat nen,
ofo tet tadien sgia fot ei, tami kafir fe ei.
Na sa marok kadio yik fobi lolok
tet tatsiofo main fe nen.”b
4 Mde Abram wain, wde le Tuhan wbahe man ou. Lot wain fot wadien ou. Hra oko fo Abram wase wale der 75 (na tolik yeigi, whri yahar wtlok na wna mahot), ofo wahinti kat fobi Haran. 5 Ofo Abram wain wadien wsmian Sarai, wadien fot Lot, wamon Haran wfe wet ou. Ei yotik kadio kat hrien yidien fot na hra ei ykain yik fobi Haran, yein kawuak de yhok yik fobi Kanaan.
6 Abram wain wewer kat fobi oko, whok wak wkoit kflio wafleu wak More, wi mataren Sikhem. Hra oko fo na sa Kanaan yese fobi okom.
7 Mde Tuhan wyen hata wkan om man Abram wto: “Basak sba fo, tet thnak fobi kom man ntakein ei.” Mde ke fo Abram wbatalok sala kohok man Tuhan hra wyen hata wkan man ou.c
8 Mde ou wahinti kat wi okom, wain wse sfa bri hra yik Betel wtato wse tali mhok, ofo whro ou wfe bol dik tenda wak ana, wbadik flalie mak bri, Betel mse tali mti, Ai mse tali mhok. Mde ou wkalok amak yibe ou wtatik sala kohok man Tuhan, ofo wwit Tuhan wkedim. 9 Mde Abram wahinti kat wi okom wain kdie oli wse wi hra nai yto Negeb, fobi Kanaan mtato mse tasik blen ale.
Abram Wak Mesir
12:10-20
10 Hra oko fo tolo katot fleu whok wak fobi oko, mde Abram wti wse Mesir, wabe katot fleu wflie fobi Kanaan.
11 Wataren wkdia wse Mesir fo, wojin fe wsmian Sarai om wto: “Fe hra tet tnok nen nbot nmnel karmiak kat. 12 Bo na Mesir yhot nen fo, bo ei yto: ‘Ou wsmian le mkom’ ofo bo ei yka yska tet, ha yliokeit nen naheit nron. 13 Nto wata nto: ‘Ou wahano le tet’ se bo ei yidien bot tet fe hra nen, ei yliokeit tet taheit tron.”d
14 Abram whok kmo wak Mesir fo, na Mesir ei yhot na dli om mbot mmnel karmiak kat. 15 Madien hra oko fo Firaun wfe pegawai ei yhot om, ofo yrana fe na dli okom man Firaun kayi de ou wbahe nai yidien twa na dli okom mse ou wfe bol istana om. 16 Firaun wkashok fe Abram fe hra wkesik na dli okom, mde whnak kambing-domba, whnak sapi, keledai yidlai yidli, unta, whnak fot kawor yidlai yidli yibe ysiok ni yrok yin ou.
17 Mahin Tuhan whnak kafir maflem man Firaun wadien ou wfe nai ei, ofo ei ykaini msamsa om fe hra ou wlouk samne Abram wsmian Sarai om wto bo wsmian. 18 Mde Firaun wwit fien Abram wto: “Ni mit ma hra nen nsiok man tet kom? Hra nen nrana tahak dait nabri om man tet mabe nsmian kom? 19 Hra nen nto nen nahano om mabe? Ma hra tet twien samhak man tsmian? Nnn! Nsmian nen na kom! Nhok! Nein kat!” 20 Ofo Firaun wbahe wfe na mre ywain kat Abram wadien wsmian om yidien wfe hrien kadio kat yhok yehinti kat Mesir.