Hodyo Mak Babel
11:1-9
11
Kla smas wdain wale fo, na tkoin kadio kat ei yese sisi ysalo deri mres. 2 Mde ei yti yein yse tali mhok, ofo ytatiere fe toji hra mtatol mak fobi Sinear, ofo ei yese yik oko.3 Man ei ykait saswain man ei yto: “Nan nka faf fsiok bet mabe amak tela, ftatik kayi de ykanas.” Ofo ei ysiok dait amak tkoin, ha ysiok deri amak tela, yo ysiok dait semen, ha ei ysiok deri aspal mabe warak mskatiokot amak tela ei. 4 Yto fot yto: “Nan nka, faf fala kota mrem man faf madien fot fsiok hodyo hra msidik mahin fobi aiti kayi de mskatok mse yik wbat ago, se bo nai ynok yto faf sok ma fwamo. [Nago wbahe wale wto faf fsiar fse fobi katak, mahin faf faha foso giet mahin ou wak. Faf fsiok kota madien hodyo okom] se bo faf fsiar sak-sak dait fse fobi lolok.”
5 Mahin Tuhan wais wabe wto whot kota madien hodyo hra na tkoin ei ysiok wale mak wale mkedi, mataren mabe mnok mfot om. 6 Mde ou wto: “Faf fto fliokeit nai ke yibe na sa mres, ysalo mres, bo ni sgia hra ei ysin ekei basak ei ysiok kawuak. Ni mre mkahiowain dait man ei.
7 Mabot ma faf feis fkowiri-wara ei ysalo mak ana, se bo ei ysalo wat-wat, ofo ykahiowain kat ynok oli dait salo sayen kat man ei ysalo ei yim.”
8 Mde kayi le eke, Tuhan wkosiar-sar ei yehin oko yse fobi katak, ysalifis oli dait yala kota hra okom, ha yehinti kat maheit mfalek deri, ei yein kawuak. 9 O le ma molot fe hra nai ywit kota okom mkedi mabe Babel, hra nai yto ‘Kahiowain Kat,’ fe hra mak oko Tuhan wkowiri-wara na tkoin yfe salo om. Mahin oko Tuhan wkosiar kat na tkoin yse fobi lolok.
Mahin Sem Kawuak De Mti Mse Abram
11:10-26
10 Ojin trar mabe Sem wtakein le mke.
Kla smas wdain wewer wale wase der lak, ofo Sem umur kmo der 100 (na mahot yeigi), ofo wkafe wet waflesa Arpakhsad ou.a 11 Mde Sem waheit waron sonat oli der 500, eke fo wkafe oli wet yidla mre, yidli mre. Ou wase kawuak de umur 600, ofo waigi.
12 Arpakhsad wase der 35 (na mre waigi whri na wna yahar teit mahot), ofo wkafe wfe wet waflesa Selah ou. 13 Mde Arpakhsad wase oli kdie der 403, wkafe oli wet yidla mre, yidli mre. Ou wase kayi de umur 438, ofo waigi.
14 Selah wase der 30 (na mre waigi whri yahar), ofo wkafe Eber. 15 Mde Selah wase oli kdie der 403, wkafe oli wet yidla mre, yidli mre, kayi de umur 433, ofo waigi.
16 Eber wase der 34 (na mre waigi whri yahar tfas foko hat), ofo wkafe Peleg. 17 Mde Eber wase oli der 430, ofo wkafe oli wet yidla mre, yidli mre.
18 Peleg wase wale der 30 (na mre waigi whri na wna yahar), ofo wkafe Rehu. 19 Peleg wase oli der 209, wkafe oli wet yidla mre, yidli mre, ofo waigi.
20 Rehu wase der 32 (na mre waigi whri na wna yahar teit lak), ofo wkafe wet Serug. 21 Rehu wase sba oli der 207, wkafe oli wet yidla mre, yidli mre, ofo waigi.
22 Serug wase der 30 (na mre waigi whri na wna yahar), mde wkafe Nahor. 23 Serug wron kdie wase oli der 200 (na yahar yeigi), wkafe oli wet yidla mre, yidli mre, ofo waigi.
24 Nahor wase wale der 29 (na mre waigi whri na wna mtanhat), ofo wkafe Terah. 25 Nahor wron wase oli der 119 (na mahot yeigi whri na wna yahar teit mtanhat), wkafe oli wet yidla mre, yidli mre, ofo waigi.
26 Terah wase wale der 70 (na tolik yeigi whri na wna yahar), ofo wkafe Abram, Nahor yidien Haran.
27 Ojin trar mabe Terah wtakein le mke.
Terah wkafe Abram, Nahor, yidien Haran. Mde Haran wkafe Lot ou. 28 Haran wono Terah wron sonat, ofo Haran waigi omuok wale wak kota Ur-Kasdim, wi hra weme mkafeu. 29 Abram wadien wamon Nahor la yikan lak ei ysmian wale. Abram wsmian le ma Sarai, ha Nahor wsmian wamon Haran wfe wet om hra mkedi le ma Milka. (Haran oko wkafe wet yidli lak, Milka madien Yiska.) 30 Mahin Sarai okom msa, mkafe dait wet.
31 Mde Terah watik wfe wet Abram, wadien Haran wfe wet Lot, wate ou, yidien fot ware madlim Sarai hra Abram wsmian om, ofo ei yehinti kat fobi Ur-Kasdim yein sisi yto yein yse fobi Kanaan. Mahin yik fan kedi, yik wi hra nai yto Haran, ofo yese kawuak yik oko.
32 Terah wase kawuak de umur der 205 (na yahar yeigi whri na wna mahot), ofo waigi wak Haran.