Nago Wkait Kadoin Wadien Nuh
9:1-17
9
Mde Nago whnak fle fe Nuh wadien wfe wet ei, wto man ei wto: “Nkafe kein-kein wet yrok karmiak yhnak hon fe fobi katak kom.a 2 Bo ni kadio kat yeliek, ytain yehin nan – erwas warok yik fobi kei, klen warok yik yik ago ei, ni warok hra ymli yik fobi kei, eren warok yik siwan ale – ni ekei kadio kat tet thnak yin nan nsiokti. 3 Madien kamuolo fobi sayen kat tet thnak deri ni yifuon yidien ni ybra ei yibe ni eit yin na tkoin nan. Yo, madien fobi waifi hra ko fo, tet thnak oli kdie ni kadio kat hra yron ymli ei, yibe fot ni eit yin nan.”4 “Ni mres deri hra tet tkaboti yidien nan - o le ma erwas yfokot hra yihen yiheit sonat mak mabri ra. Ha erwas hra yihen sonat yik ykan yibri ra, neit amo yila!b Hen okom mkohok - [tet le ma deri tkain hen om fe hra om molot fe ni kadio yhalie yron.] Nan neit dait amo yila!c 5 Yo, na tkoin yfe hen yhalie om mkohok fot. Erwas man sio ma watan nai ykak, afe na tkoin man sio ma wska nai ykak, ofo tet ttok fe hen okom kayi de nai yde mre man tet. Nen nfe hen om, tet ttok man na hra wska nen, man fot erwas hra watan nen. Tet ttok fe kayi hen om, tnok tmol lis kawuak.”
6 “Bo na man sio ma wska nai ykak,
ofo tet ttriesi, tbahe na wafle hra wslonti fobi ou wska fot ou wkak wbakorwain fot ou,
fe hra Nago wsiok na tkoin ei
ysilok yidien ou.d
7 Mahin nan nke, niheit nkafe kein-kein wet warok sanini kawuak, kayi de nai yaher dait fe na marok mak fobi katak kom.”e
8 Mde Nago wto man Nuh wadien wfe wet ei wto: 9 “Tet tto tkoin kat man nan tto, hra ko fo tet tkait kadoin man nan nidien nate kokos wai, 10 nidien fot ni kadio hra yron yhalie yik fobi katak kom – klen, ni ror, erwas ysikol-kal, ni kadio hra yidien sisi nan nhok nehin kma om. 11 Mde tet tkaitti kadoin om madien nan, fe hra tet tsiok sgia oli dait nan main fe kla smas mre oli dait. Kaye fle mre oli dait waka watsi kat fobi kom.”
12 Mde Nago wrana oli wto: “Hra ko fo tet tkaitti todo ni okom man nan nidien ntakein ei, man fot erwas yrok kadio hra yiron ekei yidien fot ytakein ei kayi de dian-dian kat. Ofo tet tafik ni mrem mabe kyat fe kadoin hra tet tkaitti man nan nidien ni yrok kadio hra yron. 13 Nhot la, tet tlak tfe wesen mak yik wbat ago le mkei - ou le ma kyat fe ni kaitti todo man tet tadien fobi kom. 14 Basak nan nto nhot yik om mri, ofo nhot wesen om mak yik ago, 15 mde tet tnok saswain oli ni kadoin hra tet tkadoin wale man nan nidien fot ni skaheit-hat kadio hra yiron ei. Mabe tet thnak oli dait kaye mre waka watsi oli dait ni kadio hra yiron ei ykak ytinik kat. 16 Wesen om mto mhok mtlein mak yik ago, ofo Nago tet thot, tnok tmol oli ni kadoin hra tet tkadoin wale man ni kadio hra yron yik fobi katak om.”
17 Mde ke fo Nago wto man Nuh wto: “Wesen om mabe kyat fe hra kadoin hra tet tkaitti wale madien ni kadio hra yron yik fobi katak ei.”
Nuh Wfe Wet Ei
9:18-29
18 Nuh wfe wet hra yhok yehin kma om o le ma Sem, Ham, yidien Yafet. (Ham o le ma Kanaan wono.) 19 Nuh wfe wet yidla tolik, o le ma hra ke. Ei yikan tolik ei o le ma ykafe na kadio kat hra ysiar-sar yik fobi katak ko.
20 Na hra worik sayen kat anggur om, o le ma Nuh, hra na waogo biele. Worik anggur ofo wlos, wsiok wklam mabe twok, ofo wakom. 21 Ou wako wale twok anggur om, ofo wmsit, wase wkablok wak bol dik om. 22 Mde Ham hra Kanaan wono whot wono wkablok om, ofo wliokeit waiti, wain wtbekein wono wan wamon wai se bo yasak fe ou. 23 Mahin Sem wadien Yafet la yasak fe dait yono ou ha, la ymro fe yono ofo ywien fien not mata mrem maka, yrenes mloyo mak ykbek ago, yein sbiel kat, ykabor si wat man yono wabe ou wase kablok kat. La yikan lak ei ysifuon ywat se bo yhot dait yono wkablok om.
24 Nuh ou wmsit om mdain wale, ofo woso ni hra ou wfe wet wakyau Ham ou wsiok sgia man ou, 25 ofo wto:
“Foo! Tgiet kafir om mat Ham wfe wet Kanaan wou!
Ou wabe kayi kawor,
na wasgia wsandior, wan wamon wai!”
26 Mde Nuh wrana oli wto:
“Tet thdin Tuhan, Sem wfe Nago ou!
Basak Kanaan wabe kawor deri wan wbele Sem.
27 Nago watsiofo Yafet wa wi wa myol mak fobi katak.f
Basak Yafet wase lok wadien waliwet Sem wak Sem wfe bol dik ou,
Mahin Kanaan wabe kayi
kawor wasgia wsandior wan ei.”