Kla Smas Wais
8:1-22
8
Mde Nago wnok tmol Nuh wadien fot erwas yisi kol yidien fot erwas hra yror ei hra yidien sisi ou yik kma mabri ra, ofo Nago whnak komin ou wfrio wain fe fobi masa ko, kawuak de kaye ou wais. 2 Kla sitayi hra kaman yfriorok yik fobi katak ei, Nago wkoboti ofo ykerek wale kadio kat. Yik hra kaman Nago wkoriohok he kaye wbawe wse fobi ko, ou wdanti wale, ofo kyen wais oli dait, wtaret ou. 3 Ofo kaye ou wais kawuak de mayi fe amuk hra mao 150 (na mtalak yeigi whri na wna yahar) fe, ofo sfa ysa ei yitaren yibe yenie. 4 Hra oko fo, tanggal 17 (yahar teit mtalak), mok mtalak, ofo kma om mfafa morik mtodo mak sfa bri Ararat, fobi Armenia. 5 Kaye wais kayi kawuak de tanggal mres, mok yahar, ofo sfa ysa ei yhok yenie.6 Amuk na lak yeigi kdie oli fo, Nuh wkothok ni danti klek jendela okom, 7 ofo ou wna bhait klen oweri om mhri, main mse ale, main mse ana, mse koit, kawuak de kaye ou wais wkerek. Om main kawuak kat, maka oli dait. 8 Man bri oli kdie fo, Nuh wna bhait klen okles mres om mhri main fot mse tlein, se bo wnok wto kaye ou wais wla, wdain wale. Se bo wnok wto fobi om menie wale afe mdain latiot. 9 Mahin klen okles om mhot dait wi mrem mabe mslon mabe kla waisti latiot fobi om, ofo om msalit oli mse Nuh wak kma mabri om. Mde Nuh wkotguos wnam, mloit fe klek jendela om, ofo klen okles om mslon mak wna, wkein fien wtrik fali klen om mse kma mabri. 10 Mde amuk mtalak oli kdie fo, ou wna bhait klen okles okom msalit mhri oli. 11 Mkdia siwit fo, klen okles om msalit oli mse Nuh wak. Ou whot fo, klen om mat karen wkoit zaitun wlas wkamin yifi! Ofo Nuh wnok tnes wto kaye ou wdain wale, wahinti kat fobi kom. 12 Ou wleli sba oli kdie amuk mtalak, ofo ou wna bhait oli klen okles om mhri mak ale fo, main kawuak, msalit oli dait mse ou wak.
13 Mok mres oli fo, mayi fe Nuh wfe konon magiet der 601, mloit mse mok wasayen, tali wasayen, mtatol madien tanggal okom kla kaye ou wkerek, fobi om mfako kat. Ofo Nuh wkotdak fafan hra yibe kate mahinti kat kma om masa ago, whot fo fobi om mhak, sfa ei yenie sros, bet ei yslo, kaye ou wais kat wale, fobi om mkla smok oli dait, mfako kat deri. 14 Madien tanggal 27 (na mre waigi whri na wna mtalak), mok lak, ofo fobi katak om mslo tkoin kat.
15 Mde Nago wrana man Nuh wto: 16 “Nhok nehinti kat kma mabri kom – nen nadien nsmian, nadien nfe wet ei, yidien nare ei. 17 Ni adit yrok kadio hra yron yidien nan ei – klen, erwas, ni kadio hra yara yik fobi aiti – nkothok ni ekei kadio yehinti kat kma mabri kom, nidien neis nse fobi, se bo ei ykafe kein wet, basak ei yrok karmiak kat yik oli fobi kom.”
18 Mde Nuh wadien wsmian, la yidien yfe wet ei, yidien fot ysmian ei, ei yhok kat yehin kma mabri om, yeis yse fobi aiti. 19 Ofo erwas kadio yidien fot ni kadio hra yara yik fobi aiti, yidien fot klen kadio – ni kadio kat hra ymli yik fobi kei – ei yeis, ysafik man, ysafik man, yehinti kat kma okom, ei yhok yskatiokot-tiokot fe ysafik mres-mres.
20 Mde Nuh wkalok amak, wbatalok sala makohok mak fobi, ofo ou wlouk fe mres-mres yehin erwas hra yiwas, ykohok dait,a wlouk fot mre-mre yehin klen hra ykohok dait, yka fo ou wkolok, wtatik yse sala madhen yibe sanfe yin Tuhan. 21 Mde hra oko fo Tuhan wahan ni ekei yrnoin yrofof-fof kat, ofo ou wnok sas wak wabri wto: “Tet tto tami kafir fe oli dait fobi kom, tet tfruo kat oli dait fobi fe hra ni ysgia hra na tkoin ysiok ei. Fe hra na tkoin ynok wanik deri ni ysgia yehin yibri aiti madien ywet kawuak de ytrar ei. Tet tadien sgia oli dait ei, tfruo kat oli dait. Tet tala kowa oli dait ni kadio hra yron ei ytinik oli dait yde hra kwan firi wa ko.”
22 “Badian fobi kom maheit lis kawuak,
ni mre mkerek dait,
tolo nai yorik ni yidien fot tolo nai ylos ni,
tolo komin yidien tolo mtbat,
tolo melin yidien fot tolo kyen,
tali madien amuk,
– ni ekei ydain dait, yiheit yde lis kawuak.”