Kla Smas
7:1-24
7
Mde Tuhan wrana man Nuh wto: “Ntrik nse kma mabri ko, nen nadien nan nikan ni ei, nfe wet, nsmian om, wet ei ysmian ei, nan nikan kadio kat, mabe tet thot nen nmres deri nbot nhmes nahin na kadio hra yik fobi katak kom. 2 Ofo nlak adit yidien nan erwas skaheit-hat hra yiwas, ykohok dait,a yidla yikan mtalak ei yidien sisi ysmian ei. Yo mahin erwas skaheit-hat hra ykohok, yiwas dait,b nai yeit dait ei, ofo nlak tbouk wadlau mres wadien madli mres.
3 Ha, mabe klen yihri skaheit-hat ei, nlak yidla mtalak yidien sisi ysmian ei. Mde ke fo, ni kadio hra yron ei ykak ytinik dait ha, ykafe kein deri wet, basak sba yflie yrok oli yik fobi kom. 4 Amuk oli mtalak fo, tet tti kat kyen arit wais lis wse fobi ko, wain kawuak de amuk na lak yeigi man, tali na lak yeigi man. Bo tet tbawas kat ni yiron kadio kat hra tet tsiok yik fobi kei.”
5 Mde Nuh wsiok kadio kat ni hra Tuhan wbahe ei.
6 Nuh wase wale der 600, ofo kla smas whok wto watsi kat fobi kom.
7 Whok latiot fo, Nuh wadien wsmian om wadien wfe wet ei, yidien yfe wet ei ysmian ei, ytain ytrik yse kma mabri ra, yibe yehinti kat kla smas ou.c 8 Mde erwas ei yka, man hra ykohok dait, man hra ykohok ei, yidien fot klen, yidien fot man hra yara yswe yidien ykmat yik fobi kei, 9 yidla yidli ei yka fe tbouk lak yein yse Nuh wak, yloit yse kma mabri ra, mde le Nago wbahe wale man Nuh. 10 Kayi de amuk mtalak, ofo kla smas ou whok, wleliti fobi.
11 Mayi fe oko fo, Nuh wase wale der 600, mok lak, amuk yahar teit mtalak. Mtatol madien amuk oko fo, kla ysa kadio yfriorok, yhok wat-wat yehin fobi malale aiti. Nago wkoriohok yik ago, ofo kla smas ou wolio kat wahin ago wse fobi aiti.d 12 Ofo kyen arit din wafleu wriehe, wais kawuak, wase amuk na lak yeigi.
13 Mayi fe tali hra kla smas ou whok fo, Nuh wadien wsmian, wfe wet Sem, Ham, Yafet, ei ysmian ei, yloit kadio yse kma om mabri. 14 Ei yidien sisi erwas sikol-kal hra skaheit-hat kadio ei, yidien erwas man hra nai yror skaheit-hat kadio ei, yidien erwas skaheit-hat kadio hra yara yswe yidien ykmat ei, yidien klen warok skaheit-hat ei, yidien fot ni kadio hra yhri-hra ei. 15 Wadlau man ou wadien wfe dlim, wadlau man ou wadien wfe dlim, yehin ni kadio kat hra yron yhalie yik fobi katak, ei yka tbuok fe lak, ofo yorin yse Nuh wak kma mabri om. 16 Mde le Nago wrana krek wale man Nuh, erwas yidlai yidli mre yehin ni kadio hra yhalie yron ei yloit yse Nuh wak kma mabri kayi de mkahlia kat, ofo Tuhan wdanti hrede om mtodo kat, na wat mre ykothok dait.
17 Mde kaye ou wsror wflie kat fobi kayi de amuk na lak yeigi. Kla ou wflie wsia kma om, warin fali mklia kawuak de mse yik ago. Fobi om mkadlo kat mse kla wabri aiti. 18 Kaye ou wfle wflie sanini wsamsa karmiak kat, ofo wsia kma om marin marin, mklia mak kla wasa ago. 19 Kaye ou warin skayit wse ago, wflie kat fobi katak kadio, kayi de wflie wewer kat sfa kaslok yifle kadio hra yse yik walale ei yrotpok yse fobi. 20 Kla ou wfle warin wflie sfa ysa kadio ei kawuak de wewer kat sfa ysa ei hlos hate oli yse ago. Fobi om mkadlo kat mse kla wabri aiti. 21 Mde ni yrok hra yron ymli yik fobi katak ei ykak kadio kat – klen, ni ror fot, erwas tabra fot, man hra yara ykmat yse fobi aiti fot, yidien fot na tkoin marok – ei ykak kadio kat. 22 Ni kadio hra yik fobi bet angkei, hra yhalie yhok fe yta ei, ykak kadio kat. 23 Ni kadio hra yese yik fobi masa ei ytinik kadio kat – na tkoin ei, yidien fot erwas ei, yidien fot ni kadio hra yara yidien ykmat ei, yidien fot klen ei – ni kadio ekei ytinik kat yik fobi katak. Mahin Nuh ou wadien deri wfe nai ei ymres yiheit, yron yik kma mabri.
24 Yo, kaye ou wflie fobi katak kadio, waheit wsisir, wase amuk 150 (na mtalak yeigi whri na wna yahar), afe mok mahot, ofo fobi mkadlo kat sonat mse kla wabri aiti.