Na Tkoin Ei Ysgia Buon
6:1-8
6
Na tkoin sayen ei ykafe kein wet yidli yidlai yrok, kayi de ytakein ei ysanini ysamsa kat yik fobi ko. 2 Mde “Nago Wfe Wedla Ei” yhot fo “Na Tkoin Yfe Wedli Ei”a ymnel, mde ykesik ofo ysmian - man ou wlouk helwain deri mahin ou wak. 3 Mde Tuhan wrana wto: “Bo tet tawuam maheit kawuak dait mak na tkoin yibri, fe hra ei ykain satian ofo bo ei yeigi kayi. Tet taha ei yron lis karmiak - bo ei yese mharfe deri der 120 (na mtamre yeigi) ofo yeigi kayi, ha yewer dait der 120.”4 Na tkoin hra yese yik fobi sayen kat oko fo, (yidien fot fobi waifi hra kla smas wdain fo), nai ywit yto Na Hra Ybhait Eib [fe hra ysiok satian ofo yeigi omuok.] Na ekei yibe na sayen ytakein hra yono yibe “Nago Wfe Wedla Ei,” yeme yibe “Na Tkoin Yfe Wedli Ei.” Na ekei ykan ei yifle buon ytarmase, ytrein ysiok ni yrok yewer kat, ofo ykedi yririn yidien fobi kamuolo kat.c
5 Mahin Tuhan whot fo na tkoin yik fobi kei ysiok sanini ni hra ysgia karmiak kat ei. Ou whot ei ysablit ynok tmol deri ni hra ysgia, yyaka kawuak.d
6 Ofo Tuhan wmlawhei fe wsiok samhak na tkoin yik fobi. Ou whlein wto: “Hyee, na tkoin ei ysiok buon ni ysgia ysamsa kat, kayi de tabri mtra karmiak kat! 7 Yo, mto mde ke fo, tet tsin tto bo tbawas kat na tkoin yehinti kat fobi kom, na tkoin ekei yidien fot erwas, yidien fot ni hra yara yidien ykmat, yidien fot klen - ni kadio hra tet tsiok ei bo tet tsiok sgia kadio kat, fe hra tet tmlawhei wale fe tsiok samhak ei.” 8 Mahin, Tuhan wkashok fe deri Nuh, wmro fe ou, wkein fien ou wteit kefes wse wkmuon.
Nago Wsin Wto Wkaka Fien Nuh
6:9-22
9 Ojin trar Nuh wfe le mkom.
Nuh oko wabe na wabot. Na kadio hra yik fobi katak ei ysiok ni ysgia ha, ou wmres sok ma whmes, wsiok ni yibot. Ou wain wadien sawuan Nago, wnok tmol kawuak man ou.e 10 Nuh wkafe wet yidla tolik: Sem, Ham, yidien Yafet.
11 Madien hra oko fo, Nago wsmit fo na tkoin yik fobi katak ei ysgia karmiak kat. Fe hra nai ysiok ni yyaka, ni kadio ei ysgia karmiak kat. 12 Nago whot fo fobi kom msgia sros kat, fe hra na tkoin kadio kat ei yeisi deri yto ysiok ni ysgia lis ta-ta kawuak. 13 Mde Nago wrana man Nuh wto: “Bo tet tsiok sgia na tkoin ei ytinik kadio kat, fe hra fobi kom mhon madien ni hra ei ysiok yyaka ysgia ei. Bo tet talbir kayi na tkoin ei yidien ni kadio kat hra yik fobi om mdiris kat. 14 Mde ke fo, tet tbahe nen nsiok kma hahan mafle mrem man nen mahin wkoit towil. Mak mabri ra fo, nsiok sit, nkda biya yrok. Ofo nwien fien kyir om maka, nroit nwarak maisti kma kadio kat mahin tlein, mahin fot mabri ra, [se bo nai yhot oli dait wkoit mrem ha, yhot deri warak om]. 15 Nsiok kma om mde le peti hra mfle buon karmiak kat. Nhlos mlis mse koit hlos 75 (na tolik yeigi whri na wna yahar teit mahot), yo nhlos mkatak om hlos 12,5 (yahar teit lak matam), yo mlis mse ago nhlos 7,5 (mtalak matam).f 16 Nsiala madien wkoit fan yelin. Mdain fo nhahan titir mse ago, nalta maheit mklek ska na tofo tolik mahin kate ago, mabe deri msaklek mres maflem hra mkohli kat kma om mak kma masa ago. Ofo nsiok kmam mfe hrede om mak deri mklik. Ofo nsiok mak kma mabri ra mbat man mse aiti, mbat man mak bri oko, mbat kahlia mse ago - mbat tolik. 17 Fe hra basak sba fo, tet tkein kla smas wafleu waka, watsre kat ni kadio hra yhalie yron yehin tali wolo yse yik wolo - na tkoin yo, erwas yo, klen yo, ni kadio hra yhalie yron yik fobi katak ekei bo tet tbawas ysi ykak, ydiris kadio kat. 18 Bo tet tkaitti todo kadoin wan nen, ofo teren kaka nen nadien nsmian om, nfe wet yidien ysmian ei, nan nloit kadio kat nse kma ko mabri. 19 Ofo mahin ni warok skaheit-hat kadio kat hra yron yik fobi kei, bo ntrik fali tbouk fe lak man, lak man, wadlau wadien madlim, nlak yse kma mabri ra se bo yron sisi yidien nen, ykak dait. 20 Bo nlak tbouk fe lak yehin klen kadio, nlak tbouk lak yehin erwas kadio, nlak tbouk lak yehin ni kadio hra yara yse fobi aiti - yidla, yidli. Bo tet tbahe ni ekei yka, lak man, lak man, yloit kadio yse nan nik se bo nan nlak ei ykak dait. 21 Nlak fot ni eit heit-hat hra nai yidien ni ror yeit lokdi, yibe ni eit yin nen nadien nsmian nidien fot wet ei - yidien fot ni ror hra yrok ei. Ni eit ekei nlak hao yik kma mabri yin fot nan nidien fot ni ror ei.”
22 Mde Nuh wsiok ni kadio kat hra Nago wbahe man ou.g