Ame barayukng man dunia
4:1-10
4
Dari mae asalnya samua pakalahiatn man patangkaratn kaꞌ antara kitaꞌ? Inaꞌ keꞌ atakngnya dari kamaoꞌan-kamaoꞌannyu nang tarus baparang kaꞌ dalapm tubuhnyu? 2 Kao sidi maoꞌ manyak hal tapi kao inaꞌ namunya lalu kao munuh; kao rusiꞌ ati, tapi kao inaꞌ namus kaꞌ tujuannyu lalu kao batangkar man bakalahi. Kao inaꞌ namu ahe-ahe tagal kao inaꞌ mintaꞌ kaꞌ Allah. 3 Ato kao badoꞌa ugaꞌ tapi kao inaꞌ namu ahe-ahe tagal kao salah badoꞌa, barang kao mintaꞌ hal koa, nyu abisatnnaꞌ untuꞌ muasatn kasanangannyu. 4 Kitaꞌ urakng nang inaꞌ setia! Nauꞌan keꞌ kitaꞌ kadeꞌ kitaꞌ barayukng man dunia nian, kitaꞌ jaji musuh Allah? Jaji saepun maoꞌ jaji ayukng dunia nian, ia nyajiatn diriꞌnya musuh Allah. 5 Kaꞌ dalapm Kitap Suci, diriꞌ dah maca kadeꞌ: “Allah sidi-sidi ngarinuatn roh nang di-Nya nampatatn kaꞌ dalapm diriꞌ.” Hal nian memang banar man kitaꞌ arus mucayaꞌiꞌnya. 6 Sabaliknya, Allah justru ngasihiꞌ diriꞌ man babaik ati kaꞌ diriꞌ labih manyak dari pada nang koa. Kaꞌ dalapm Kitap Suci diriꞌ dapat maca: “Allah manjawat rencana urakng sombong inaꞌ barasil, tapi Ia babuat baik man bamurah ati kaꞌ urakng nang inaꞌ sombong.” a7 Tagal koa taatlah kaꞌ Allah. Lawanlah Ibalis, jaji ia dariaꞌ mpat kaꞌ kao. 8 Samakiꞌlah Allah, Ia pun nyamakiaꞌ kitaꞌ. Barasehatnlah kokot kitaꞌ urakng badosa! Man barasehatn isiꞌ ati kitaꞌ nang bacabang ati! 9 Batobatlah sidi-sidi man ati nang miah nyasal man ngeak kasal. Daripada barepo-repo, labih baik tangisiꞌ keadaan rohaninyu. 10 Kiraꞌnya kitaꞌ ngarendahatn diriꞌ kaꞌ adapatn Allah, jaji Ia ningianaꞌ diriꞌnyu.
Ame ngomongan urakng nang inaꞌ-inaꞌ
4:11-12
11 Page samadiꞌatn, amelah kitaꞌ batuduh-tuduh man omongan nang inaꞌ-inaꞌ! Sae nang nuduh urakng lain man omongan nang inaꞌ-inaꞌ ato ngakimiꞌnya, ia ngina man nyalahatn parentah Allah koa. Kadeꞌ kitaꞌ nyalahatn ukum koa, kitaꞌ sabatolnya dah baiꞌ naatiꞌnya man nganggap diriꞌ kitaꞌ inaꞌ kaꞌ babah kuasanya, saolah-olah kitaꞌ koalah akim. 12 Kahe Allah ihan nang bakoasa mareꞌatn ukum man jaji akim kaꞌ talino. Kahe Allah lah nang bakuasa nyalamatatn idup man mati talino. Jaji sae keꞌ kitaꞌ sampe maoꞌ nyalahatn sabayaatn kitaꞌ talino?
Ame ngalupaatn Tuhan kaꞌ dalapm rancana
4:13-17
13 Mungkin ada kaꞌ antara kitaꞌ nang bakata: “Ari nian ato ampagi kami ampusaꞌ kaꞌ kota, badagakng kaꞌ naun salamaꞌ satahutn man kami pasti namu untukng ayaꞌ.” Dangngaratn nasehatku nian: b 14 ahe nang jaji kaꞌ idupnyu ampagi, kitaꞌ babaro pun inaꞌ nauꞌan! Kitaꞌ kahe lea asap nang sabantar ihan kateleꞌanan lalu lanyap. 15 Sabatolnya kao arus bakata: “Kadeꞌ Allah ngijinan kami idupaꞌ man manjawataꞌ nian ato naun.’’ 16 Tapi ampeatn kitaꞌ sombong man pangalok. Samua kasombongan koa salah.
17 Jaji kadeꞌ ada urakng nang nauꞌan lemae arus babuat baik tapi inaꞌ nya panjawat, ia badosa.