Paringatan untuꞌ urakng nang kaya
5:1-6
5
Jaji ampeatn kitaꞌ urakng-urakng kaya, ngeaklah sakuat-kuatnya tagal kasingsaraatn nang nimpaꞌaꞌ kitaꞌ. 2 Kakayaatn kitaꞌ dah abis, pakeannyu dah dibobok makatn!a3 Amas man peraknyu dah bakarat man karatnya jaji saksi malawan kitaꞌ man makatnnaꞌ abis tubuhnyu lea api. Kitaꞌ dah ngomoꞌan harata kaꞌ ari-ari pangabisatn. 4 Kitaꞌ inaꞌ mayar upah urakng-urakng nang karaja kaꞌ uma kitaꞌ, ampeatn dangngaratn keluhan nya kaꞌ koa! Urakng-urakng nang ngumpulatn asil umanyu, ngampak mintaꞌ bantoꞌ man kampaknya kaꞌ koa dah sampe kaꞌ tarenyekng Allah nang maha kuasa.b 5 Kitaꞌ dah idup bamewah-mewah man nikmatiꞌ kasanangan dunia nian, kitaꞌ saolah-saolah dah ngamokiꞌ diriꞌ kitaꞌ lea laok nang maoꞌ disambaleh kaꞌ arinya. 6 Kitaꞌ dah ngadiliꞌ man munuh urakng nang inaꞌ basalah man ia kaꞌ koa inaꞌ ngalawan kitaꞌ.
Sabar kaꞌ dalapm kasingsaraatn
5:7-11
7 Tagal koa sabarlah page samadiꞌatnku, sampe Tuhan atakng! Teleꞌlah lemae sabarnya saurakng petani ngantiꞌatn sampe tanahnya mareꞌ asil nang baraga untuꞌnya. Man kasabaran ia ngantiꞌatn ujatn mosem gugur man ujatn mosem babunga. 8 Lea koa ugaꞌ kitaꞌ masing-masing sabar man kuatatnlah atinyu, tagal sabantar agiꞌ Tuhan atakng.
9 Page samadiꞌatn, amelah garungut-garungut man bapasalahiꞌ, biar kitaꞌ inaꞌ di Allah ukum. Ingat! Akim dah samak siap untuꞌ atakng. 10 Page samadiꞌatn, ingatlah nabi-nabi nang ngomong atas dama Allah. Ia kaꞌ koa sabar man tahan singsara. Jaji contolah ia kaꞌ koa. 11 Ia kaꞌ koa dinyabut karepoatn tagal ia kaꞌ koa batahan kaꞌ kasingsaraatn. Kitaꞌ dah nangngar tentang sidi sabarnya Ayub man kitaꞌ nauꞌan leamae Allah ahirnya marakatiꞌ ia. Tagal Allah sidi panuh kasih man baik ati. c
Tentang sumpah man doꞌa untuꞌ urakng sakit
5:12-20
12 Page samadiꞌatn, nang sidi panting biar kitaꞌ inaꞌ make sumpah takaꞌ kitaꞌ manjawat janji. Ame make dama saruga, aiꞌ tanah ato ahe pun untuꞌ muktiatn pakataatnnyu. Kadeꞌ Auꞌ, kataatnlah “Auꞌ” man kadeꞌ inaꞌ, kataatnlah “Inaꞌ”. Panjawatlah nian biar kitaꞌ inaꞌ diukum.d
13 Kadeꞌ ada kaꞌ antara kitaꞌ nang singsara, kiraꞌnya ia badoꞌa! Kadeꞌ ada nang karepoatn kiraꞌnya ia barenyah muji Allah! 14 Kadeꞌ ada kaꞌ antara kitaꞌ nang sakit arusnya ia nyaruꞌ pamimpin-pamimpin jamaat. Man aruslah pamimpin-pamimpin koa madoꞌaatn urakng nang sakit koa man nolesatn binyak atas dama Tuhan.e 15 Kadeꞌ doꞌanya koa disampeatn panuh kapucayaꞌatn, Tuhan nyambuhatnnaꞌ urakng nang sakit koa man ngamponiꞌ dosa-dosa nang dah nya manjawat. 16 Tagal koa aruslah sabaya kitaꞌ kajah ngakoꞌiꞌ dosa man kajah madoꞌaatn biar kitaꞌ samuh. Doꞌa urakng nang nurutiꞌ kamaoꞌan Allah, ngampuꞌ koasa nang ayaꞌ. 17 Nabi Elia talino biasa lea diriꞌ ugaꞌ. Tapi waꞌtu ia sidi-sidi badoꞌa biar ujatn ame turutn, ujatn pun inaꞌ turutn kaꞌ aiꞌ tanah salamaꞌ talu satangah tahutn. f
18 Lalu ia badoꞌa agiꞌ, langit nuruntatn ujatn man aiꞌ tanah pun ngaluaratn buahnya.g
19 Page samadiꞌatn, kadeꞌ ada kaꞌ antara kitaꞌ nang nyimpang dari kabanaran lalu ada nang manjawat ia babalik, 20 ingatlah hal nian baik-baik, sae jaꞌ nang manjawat urakng badosa babalik dari maraganya nang sasat, ia nyalamatatnnaꞌ jiwa urakng koa dari kamatiatn nang salama-lamanya man nutupiꞌ manyak dosa.h