Dosa tagal di jilah
3:1-12
3
Sodara-sodara, amelah manyak urakng kaꞌ antara kitaꞌ nang maoꞌ jaji pangajar umat Tuhan; tagal kitaꞌ nauꞌan kadeꞌ Allah ngadiliaꞌ pangajar-pangajar umat Allah man ukuran nang labih barat. 2 Tagal diriꞌ kaja manjawat kasalahatn. Sae jaꞌ nang inaꞌ suah bakata salah, ia urakng nang sidi baik nang baya nguasaiꞌ diriꞌ sapanuhnya. 3 Kadeꞌ diriꞌ masang tali kekang kaꞌ molot kuda biar ia nurutiꞌ kamaoꞌan diriꞌ, diriꞌ baya ngatur samua tubuh kuda koa. 4 Lekoa ugaꞌ kapal aiꞌ, biarpun kapal koa sidi ayaꞌ bajalatn man nyaru nang kuat tapi baya diatur man kamudi nang miah enek manurut kamaoꞌan pangamudinya. 5 Lea koa ugaꞌlah jilah, biarpun enek dari tubuh diriꞌ, ia dapat nyombongkatn diriꞌnya babaro tentang hal-hal nang ayaꞌ-ayaꞌ.Teleꞌlah, biarpun api koa enek tapi baya nunu udas nang miah luas. 6 Jilah sama man api. Kaꞌ dalapm tubuh diriꞌ, ia nang jaji sumber nang nyebaratn kajahatatn kaꞌ samua tubuh diriꞌ, ia nunu saluruh kaidupatn diriꞌ make jilah api nang atakng langsung mpat kaꞌ naraka. 7 Sigana janis laok sigaꞌ, burukng, laok nyolor, man ikatn baya dijinakatn, man udah pulaꞌ di talino jinakatn. 8 Tapi inaꞌ saurakng pun nang bakoasa nyinakatn jilah, jilah koa jahat man inaꞌ baya di koasaiꞌ; panuh racutn nang munuh. 9 Man jilah diriꞌ muji Allah, Apaꞌ diriꞌ; man jilah ugaꞌ diriꞌ ngutuk talino nang di Allah nampaꞌ sarupa gambar-Nya.a 10 Barati man molot nang sama diriꞌ muji Allah sakaligus ngutuk talino ugaꞌ. Sodara-sodaraku, amelah kitaꞌ lea koa! 11 Ahe keꞌ aiꞌ baraseh man aiꞌ kotor kaluas dari mata aiꞌ nang sama? 12 Sodara-sodara, baya keꞌ puhutn araꞌ mabuahatn jaitun man ada keꞌ puhutn anggur ngasilatn buah araꞌ? Lea koa ugaꞌ aiꞌ baraseh inaꞌ mungkin kaluar dari mata aiꞌ nang kotor.
Kabijaksanaan dari Allah
3:13-18
13 Kadeꞌ ada kaꞌ antara kitaꞌ nang marasa pane man bijaksana? Tojokatnlah koa lewat cara idup man kalakuan baik, nang dimanjawat man rendah ati. Kadeꞌ kitaꞌ bijak kitaꞌ ugaꞌ rendah ati. 14 Tapi kadeꞌ kaꞌ dalapm ati kitaꞌ masih rasa rusiꞌ, dandam man sikap malaluatn diriꞌ babaro, amelah kitaꞌ bapikir “Aku sidi bijaksana” tagal pikiran kitaꞌ koa sidi jelas kaliru! 15 Koa bukeꞌlah hikmat dari Allah tapi dari ajaran-ajaran talino, dari napsu talino, dari setan-setan. 16 Salamaꞌ kitaꞌ masih rusiꞌ ati man mikiriꞌ diriꞌ babaro, diꞌkoa adaaꞌ kakacauan man kitaꞌ bisa manjawat kajahatatn aheaꞌ maꞌan. 17 Tapi hikmat dari Allah suci, suka dame, paramah, panurut, panuh belas kasihatn man buah-buah nang baik, inaꞌ mihak man inaꞌ bapuraꞌ-puraꞌ. 18 Sidi di Allah barakatiꞌ urakng nang barusaha ngatangan dame. Buah kabanaran barasal dari banih kadamean nang dingamur di urakng nang manjawat perdamaian.