Ame bateleꞌ muha
2:1-13
2
Page samadiꞌatn, urakng nang pucayaꞌ kaꞌ Yesus Karistus panguasa diriꞌ nang mulia, diriꞌ inaꞌ mulih bateleꞌ muha. 2 Contonya, kadeꞌ ada dua urakng nang atakng kaꞌ dalapm pahauman kitaꞌ, nang saurakng kaya bapakean nang mewah bacincitn amas man saurakngnya agiꞌ kodo bapakean dah jahat, 3 lalu kitaꞌ menghormatiꞌ urakng kaya koa man bakata: ‘‘Duduk kaꞌ karusi nang edoꞌ nian!”, tapi kaꞌ urakng kodo koa kitaꞌ bakata: “Badirilah kaꞌ dinaun!” Ato, “Duduklah kaꞌ lante kaꞌ samak pahaku!” 4 Bukeꞌ keꞌ nian nojokatn kadeꞌ kitaꞌ dah nampatatn saurakng labih panting daripada nang lainnya? Kitaꞌ dah nampatatn diriꞌ kitaꞌ lea akim nang nilai badasaratn pikiran nang jahat.5 Sodara-sodaraku nang ku kasihiꞌ, dangngaratnlah! Allah milih urakng kodo kaꞌ dunia untuꞌ jaji urakng kaya kaꞌ dalapm iman. Ia milih ia kaꞌ koa untuꞌ jaji waris Karajaan Allah nang di nyanjiatn kaꞌ sae jaꞌ nang ngasihiꞌ-Nya. 6 Tapi kitaꞌ malah ngina urakng kodo. Agiꞌnya justru urakng kayalah nang gia nindas kitaꞌ. Ia kaꞌ koalah nang biasanya ngincakng kitaꞌ kaꞌ pangadilan untuꞌ ngarampas hak nang kitaꞌ ngampuꞌ. 7 Ia kaꞌ koalah nang majahat dama Yesus nang dah nyajiatn kitaꞌ di-Nya ngampuꞌ. 8 Tapi kadeꞌ kitaꞌ naatiꞌ parentah Allah nang utama nang taconteng kaꞌ dalapm Alkitap: “Kasihiꞌlah sabayaatnyu talino lea kao ngasihiꞌ diriꞌnyu babaro”, kitaꞌ babuat baik.a 9 Tapi kadeꞌ kitaꞌ dah nampatatn saurakng labih panting dari nang lain, kitaꞌ badosa. Kitaꞌ basalah ngalanggar ukum Allah. 10 Koalah tagalnya urakng nang ngikutiꞌ samua ukum Allah tapi ngalanggar soteꞌ parentah jaꞌ, ia dianggap basalah ngalanggar samua aturan nang ada dalapm ukum koa. 11 Allah bakata: “Ame babayaꞌ.” Allah nang sama ugaꞌ bakata: “Ame munuh.” Jaji kadeꞌ kitaꞌ inaꞌ babayaꞌ, tapi kitaꞌ munuh urakng, kitaꞌ basalah ngalanggar samua parentah ukum koa.b 12 Tagal koa, kiraꞌnya kitaꞌ ngomong man nyalatniꞌ idup lea urakng-urakng nang di Karistus adiliaꞌ nurut ukum kasih-Nya, ukum koa nang mareꞌ kabebasatn. 13 Tagal Allah inaꞌ nojokatn rasa kasihatn-Nya kaꞌ urakng-urakng nang inaꞌ nganal kasih. Tapi rasa kasihatn labih kuat daripada ukuman.
Kapucayaꞌatn man perbuatan
2:14-26
14 Sodara-sodara, ahe gunanya urakng bakata, aku urakng nang pucayaꞌ kaꞌ Allah, kadeꞌ ia inaꞌ dinojokatn man kalakuannya? Baya keꞌ kapucayaꞌatn nang lea koa nyalamatatnnya? 15 Kadeꞌ ada sodara-sodara nang kakurangan pakean man makanan saari-ari, 16 lalu kaꞌ antara kitaꞌ ada nang bakata: “Salamat jalatn boh, pake baju nang angat man makatnlah kanyang-kanyang!”, tapi ia inaꞌ mareꞌ ahe-ahe untuꞌ tubuh urakng koa, ahe keꞌ gunanya? 17 Lea koa ugaꞌ man iman, iman koa kadeꞌ inaꞌ disarataiꞌ kalakuan, iman koa mati.
18 Tapi mungkin ada urakng nang bakata: ‘‘Kaꞌ kao ada iman man kaꞌ aku ada kalakuan”. Aku nyahutiaꞌnya: “Tojokatnlah kaꞌ aku imannyu koa nang inaꞌ disarataiꞌ man kalakuan, man aku nojokatnnaꞌ kaꞌ kao kalakuan-kalakuanku nang badasaratn imanku.’’ 19 Kitaꞌ pucayaꞌ kadeꞌ Allah koa sekoꞌ? Koa baik! Tapi setan-setan pun ugaꞌ pucayaꞌ kaꞌ hal koa man ia kaꞌ koa basiragotatn. 20 Kitaꞌ talino nang sidi bodo! Ahe keꞌ kitaꞌ palalu bukti kadeꞌ iman inaꞌ baguna kadeꞌ inaꞌ disarataiꞌ man kalakuan? 21 Eneꞌ uyut diriꞌ Abraham pun, di Allah manaratn tagal kalakuan-kalakuannya, takaꞌ ia nyajiatn Isak anaknya, paremahan kaꞌ Allah kaꞌ atas papangokng batu.c 22 Kaꞌ dian jelaslah kadeꞌ iman man kalakuan arus karaja sama biar iman jaji langkap. 23 Lea koalah maksut Kitap Suci nang bakata: ‘‘Abraham pucayaꞌ kaꞌ Allah man Allah narimaꞌ ia lea urakng banar.” Koalah tagalnya Abraham jaji “ayukng Allah.”d 24 Jaji jelaslah ampeatn kadeꞌ talino di Allah manaratn tagal kalakuannya bukeꞌ kahe imannya. 25 Lea koa ugaꞌ Rahap palacur koa, dimanaratn tagal kalakuan-kalakuannya, takaꞌ ia nyosokatn urakng-urakng nang dinyuruh koa kaꞌ dalapm rumahnya, lalu mantoꞌ ia kaꞌ koa dari lewat maraga nang lain.e 26 Sama lea tubuh nang inaꞌ ada roh, tubuh koa mati, lekoa ugaꞌlah iman kadeꞌ inaꞌ disarataiꞌ man kalakuan iman koa mati.