SURAT
YAKOBUS
Salam
1:1
1
Salam dari Yakobus, amba Allah man Tuhan Yesus Karistus untuꞌ umat Allah nang tasabar kaꞌ saluruh dunia.Iman man kapanean
1:2-8
2 Page samadiꞌatn! Kadeꞌ kitaꞌ ngalamiꞌ bamacam-macam cobaan, kiraꞌnya kitaꞌ marasa repo. 3 Barang kitaꞌ nauꞌan, kadeꞌ kitaꞌ tatap pucayaꞌ kaꞌ Tuhan kaꞌ waꞌtu ngalamiꞌ cobaꞌan, kitaꞌ jaji sabar. 4 Jaji kao arus balajar untuꞌ basabar, asilnya pasti baik. Kao jajiaꞌ dewasa lea nang di Allah maoꞌiꞌ. 5 Kadeꞌ ada kaꞌ antara kitaꞌ nang inaꞌ nauꞌan leamae cara ngadapiꞌ kasusahatn, mintaꞌlah kaꞌ Allah, Allah mareꞌaꞌ kaꞌ ia kamampuatn untuꞌ ngadapiꞌ kasusahatn, tagal Allah mareꞌ man kasih Ia inaꞌ ngoleꞌatn. 6 Tapi takaꞌ kitaꞌ mintaꞌ kaꞌ Allah, kitaꞌ arus pucayaꞌ kaꞌ Ia, ame ragu-ragu tagal urakng nang atinya ragu-ragu sama lea galombang laut nang kea kaꞌ naun di nyaru ngincakng. 7 Urakng nang lea koa ame dikira namuaꞌ sigana hal dari Allah. 8 Jukut urakng nang mendua ati inaꞌaꞌ tanang idupnya.
Urakng kodo man Urakng kaya
1:9-11
9 Sodara-sodara, kadeꞌ kitaꞌ dianggap urakng biasa barepo-repolah tagal Allah ningian kitaꞌ. 10 Sabaliknya kadeꞌ kitaꞌ jaji urakng kaya arusnya kitaꞌ marasa repo kadeꞌ Allah ngarendahatn kitaꞌ tagal urakng kaya lea bunga rumput nang ganceh layuꞌ man gugur.a 11 Takaꞌ mata ari tarabit man angatnya nang kuat, rumput koa jaji layuꞌ sampe bunganya gugur man ilanglah kaedoꞌatnnya. Lea koalah nang jajiaꞌ kaꞌ tiap urakng kaya, ia kaꞌ koa mati takaꞌ tagah nyalanan kakayaannya.
Cobaan man godaan
1:12-18
12 Barepo-repolah urakng nang sabar kaꞌ waꞌtu ia ngalamiꞌ cobaan, takaꞌ ia dah barasil batahan kaꞌ cobaan koa, ia narimaꞌaꞌ upahnya, kaidupatn nang dah di Allah nyanjiatn kaꞌ urakng-urakng nang ngasihiꞌ-Nya. 13 Kadeꞌ saurakng di cobaiꞌ, amelah ia bakata: “Aku tagah di Allah nyobaiꞌ!” Tagal Allah inaꞌ baya di nang jahat cobaiꞌ, man Ia babaro inaꞌ nyobaiꞌ saepun. 14 Sabatolnya kainginan kitaꞌ babarolah nang manjawat kitaꞌ tagoda, tagal kitaꞌ miaratn diriꞌ kitaꞌ dinarik sampe kana oroꞌ di kamaoꞌan kitaꞌ nang jahat koa. 15 Kamaoꞌan jahat nang di kitaꞌ mihara kaꞌ dalapm ati kitaꞌ koa siaꞌ kuat man tarus kuat sampe kao inaꞌ mampu agiꞌ nahannya. Lalu kitaꞌ manjawat hal koa sampe-sampe maranakatn dosa; bajalatnnya waꞌtu, dosa koa pun ahirnya ngasilatn kamatiatn.
16 Sodara-sodara nang ku kasihiꞌ, amelah kaliru tentang hal nian! 17 Samua pamareꞌ nang baik man nang inaꞌ bakakurangan dari Allah, nang nampaꞌ sigana saho kaꞌ langit; Ialah Allah nang inaꞌ barubah, Ia kaja sama. 18 Allah dah naap kaputusan man dah manjawat diriꞌ narimaꞌ kaidupatn nang baharu malalui pakataatn-Nya nang banar. Ia babuat lea koa biar diriꞌ jaji tampaꞌatn-Nya nang pamulaꞌatn kaꞌ sigana tampaꞌatn-Nya.
Nangngar man babuat
1:19-27
19 Tagal koa sodara-sodara nang kukasihiꞌ, tiap urakng ingatlah nian: kiraꞌnya capat untuꞌ nangngar tapi inaꞌ capat untuꞌ bakata-kata, man ugaꞌ inaꞌ capat untuꞌ bera. 20 Urakng nang tagah bera inaꞌ baya manjawat nang baik, nang ngarepoatn ati Allah. 21 Tagal koa buaknglah samua kabiasaan kotor man samua kajahatatn. Tarimaꞌlah man rendah ati ajaran nang tatanam kaꞌ dalapm atinyu nang bakoasa nyalamatatn jiwanyu.
22 Tapi kiraꞌnya kitaꞌ jaji palaku Pirman man bukeꞌ kahe didangngar ihan; barang kadeꞌ inaꞌ lekoa kitaꞌ nipu diriꞌ kitaꞌ babaro. 23 Tagal kadeꞌ urakng kahe nangngaratn pakataatn Allah ihan tapi inaꞌ naatiꞌnya, ia ibarat urakng nang neleꞌ muhanya babaro kaꞌ caramin, 24 ia neleꞌ diriꞌnya lalu dari man lupa leamae sikap muhanya babaro. 25 Tapi sae nang naliti ukum nang langkap koa, nang ngampuꞌ kakuatatn untuꞌ mebasatn talino dari kamatiatn. Man ia tarus naatiꞌ parentah Allah koa, akibatnya Allah marakatiaꞌ ia kaꞌ sigana hal nang dinya manjawat.
26 Kadeꞌ ada urakng nang marasa diriꞌnya urakng nang ngasiꞌ baagama, tapi ia inaꞌ nyaga jilahnya, ia nipu diriꞌnya babaro; inaꞌ baguna ibadahnya. 27 Ibadah nang murni man inaꞌ bacacat kaꞌ adapatn Allah, Apaꞌ diriꞌ, mantoꞌ umang piatu man janda-janda kaꞌ dalapm kasusahatn nya kaꞌ koa, ugaꞌ nyaga diriꞌ babaro biar ame dirusak di dunia nian.