Kaidupatn talino kaꞌ pangabisatn dunia
3:1-9
3
Ingatlah nian, kaꞌ ari-ari pangabisatn dunia adaaꞌ manyak kasusahatn. 2 Manyak urakng ngasihiaꞌ diriꞌnya babaro, tamaꞌ kaꞌ duit, sombong man suka muji diriꞌnya babaro; suka ngina urakng lain, inaꞌ naatiꞌ urakng tuha, baiꞌ batarimaꞌkasih, inaꞌ hormat kaꞌ Allah. 3 Ia kaꞌ koa inaꞌ ngasihiꞌ urakng lain, baiꞌ badame man suka majahat urakng lain; inaꞌ baya nguasaiꞌ diriꞌ, kejam, busak kaꞌ sigana nang edoꞌ. 4 Ia kaꞌ koa suka bakianat, lagaꞌ man inaꞌ bapikir panyakng. Ia kaꞌ koa labih suka kaꞌ kasanangan dunia daripada nurutiꞌ Allah. 5 Ia kaꞌ koa kateleꞌatnnya ngasiꞌ kaꞌ Allah, tapi sasidinya ia kaꞌ koa inaꞌ pucayaꞌ kaꞌ koasa Allah. Jauhiꞌlah urakng-urakng nang lea koa. 6 Barang kaꞌ antara nya kaꞌ koa ada guru-guru palsu nang dah namaꞌiꞌ rumah-rumah urakng lain man nipu nangbini-nangbini lamah nang marasa basalah barang panuh man dosa man dikoasai bamacam-macam hawa napsu. 7 Nangbini-nangbini koa biarpun gia maoꞌ diajar, tapi inaꞌ suah baya nganal kabanaran. 8 Sama lea Yanes man Yambres nantang Musa deꞌe, lekoa ugaꞌ guru-guru palsu koa nantang kabanaran. Pikiran nya kaꞌ koa dah rusak man iman nya inaꞌ tahan uji.a 9 Tapi guru-guru palsu koa inaꞌ namuaꞌ ahe-ahe. Jukut kabagaatn nya kaꞌ koa ditauꞌatnnaꞌ di samua urakng, lea nang dialamiꞌ Yanes man Yambres ugaꞌ.Iman batumuh dalapm panganiayaan man dalapm pembacaan Kitap Suci
3:10-17
10 Tapi kao dah nunaꞌan ajaranku, cara idupku, pikiranku, imanku, kasabaranku, kasihku, man kasungguhanku. 11 Kao dah neleꞌ aku dianiaya man aku singsara. Kao dah nauꞌan samua nang tajaji kaꞌ aku kaꞌ Antiokia, kaꞌ Ikonium, man kaꞌ Listra, man kao dah nauꞌan samua kasingsaraatnku! Tapi Tuhan dah nyalamatatn aku dari samuanya koa.b 12 Memang samua urakng nang maoꞌ sidi-sidi idup kaꞌ dalapm Karistus Yesus ngalamiaꞌ kasingsaraatn, 13 tapi urakng jahat nang bapuraꞌ-puraꞌ baik, siaꞌ lama siaꞌ jahataꞌ. Ia kaꞌ koa nipu urakng lain man urakng lain nipu ia kaꞌ koa ugaꞌ. 14 Tapi kiraꞌnya kao Timotius, tatap mampautiꞌ ajaran nang dah kungajaratn man nang di amba-amba Tuhan nang lain ngajaratn kaꞌ kao. Kao dah pucayaꞌ kaꞌ ajaran koa barang kao nauꞌan kadeꞌ kami nang ngajaratnnya koa pantas dipucayaꞌiꞌ. 15 Kao arus ingat kadeꞌ dari enek kao dah nganal Kitap Suci. Kitap Suci koa baya mareꞌ kao pangaratian untuꞌ namu kasalamatan lewat iman kaꞌ Karistus Yesus. 16 Samua isiꞌ Kitap Suci di Allah nyampeatn kaꞌ diriꞌ lewat Roh-Nya. Samua tulisan nang kaꞌ dalapmnya baguna untuꞌ ngajaratn ajaran nang banar kaꞌ urakng-urakng, nagur urakng nang babuat salah, mantoꞌ urakng maikiꞌ cara nang salah, man nojokatn cara idup nang banar kaꞌ ia kaꞌ koa. 17 Jaji lewat Kitap Suci, Allah mareꞌ kamampuan kaꞌ diriꞌ untuꞌ nyalanan tugas nang baik.