Setia nunaꞌan Yesus biarpun singsara
2:1-13
2
Gara-gara masalah-masalah tadi, anakku Timotius, kiraꞌnya kao tarus dikuatatn lewat kabaikatn ati Allah nang luar biasa, nang diriꞌ namu kaꞌ dalapm Karistus Yesus. 2 Kao dah nangngar ajaranku kaꞌ adapatn urakng rami. Tagal koa, ajaratnlah samua koa kaꞌ urakng-urakng nang nyu mucayaꞌ, biar ia kaꞌ koa pun ngajaratnnya kaꞌ urakng lain. 3 Kao arus ikut singsara lea prajurit Karistus Yesus nang setia. 4 Saurakng parajurit nang tagah batugas, inaꞌ nyibukatnnaꞌ diriꞌnya man urusan-urusannya babaro, barang ia maoꞌ ngarepoatnnaꞌ ati komandannya. 5 Saurakng olahragawan inaꞌ jajiaꞌ juara kaꞌ dalapm pertandingan, kadeꞌ ia inaꞌ naatiꞌ paraturan-paraturan. 6 Saurakng patani nang karaja karas kaꞌ umanya aruslah nang pamulaꞌatn nikmatiꞌ asil usahanya. 7 Pikiriꞌlah ahe nang kungataatn tadi. Allah mantoꞌaꞌ kao ngarati samuanya koa.8 Ingat: Yesus Karistus, nang dah mulakng idup dari kamatiatn, nang dah dimaranakatn dari katurunan Daut, koalah nang kungesahatn dalapm Kabar Baikku. 9 Gara-gara ngesahatn Kabar Baik koalah aku singsara, malah sampe dingarante lea saurakng panjahat. Tapi pakataatn Allah inaꞌ baya dirante. 10 Koalah tagalnya aku sabar nanggong samuanya koa, untuꞌ kapantingan urakng-urakng pilihan Allah. Tujuanku biar ia kaꞌ koa pun namu kasalamatan nang dimareꞌ lewat Karistus Yesus man idup sama-sama man Allah salama-lamanya. 11 Banarlah pakataatn nian:
“Kadeꞌ diriꞌ dah mati man Karistus,
diriꞌ idupaꞌ man Ia ugaꞌ;
12 Kadeꞌ diriꞌ tatap sabar,
diriꞌ marentahaꞌ ugaꞌ barage man Ia;
kadeꞌ diriꞌ nyangkal Ia,
Ia ugaꞌ nyangkalaꞌ diriꞌ; a
13 kadeꞌ diriꞌ inaꞌ setia, Karistus tatap setia,
Jukut Ia inaꞌ baya batantangan man diriꞌ-Nya babaro.”
Nasehat untuꞌ ngadapiꞌ pangajar nang sasat
2:14-26
14 Aruslah kao ngingatiꞌ samua urakng kaꞌ jamaat-jamaat Epesus tentang samuanya nian. Kaꞌ adapatn Allah, nasehatiꞌlah ia kaꞌ koa biar ame batangkar tentang istilah-istilah. Koa inaꞌ ada gunanya, malahan kahe nyasatatn urakng-urakng nang nangngarnya. 15 Barusahalah sidi-sidi biar Allah ngakoꞌiꞌ kao amba nang pantas ngalayaniꞌ-Nya. Kao inaꞌ palalu marasa supeꞌ, tapi ngajaratn nang tapat ajaran nang banar dari Allah. 16 Jauhiꞌlah omong kosong man inaꞌ suci nang kahe manjawat urakng siaꞌ jahat. 17 Ajarannya kaꞌ koa bajangkit lea panyakit kangker nang ganas. Kaꞌ antara nya kaꞌ koa termasuk Himeneus man Piletus. 18 Ia kaꞌ koa ngajaratn kadeꞌ urakng mati dah mulakng idup. Ajaran koa sama sakali inaꞌ banar, nang tagah manjawat urakng-urakng inaꞌ agiꞌ pucayaꞌ kaꞌ Karistus. 19 Tapi dasar nang kuat nang di Tuhan manjawat inaꞌ baya digagar. Kaꞌ atas dasar nang kuat koa taconteng nian: “Allah nganal urakng-urakng nang di-Nya ngampuꞌ,” man “Urakng nang nyambah Allah, urakng koa arus ningalatn kajahatatn.” 20 Lea parumpamaan nian: Kaꞌ dalapm rumah nang ayaꞌ bukeꞌ kahe ada parabot nang dimanjawat dari amas ato perak, tapi ugaꞌ dari kayu man tanah. Alat-alat dari amas man perak dipake untuꞌ hal-hal nang panting, man alat-alat nang lainnya dipake untuꞌ hal-hal nang biasa. 21 Mpakoa ugaꞌ kitaꞌ, kadeꞌ saurakng nyuciatn diriꞌnya dari hal-hal nang jahat, ia jaji parabot rumah untuꞌ maksut nang panting. Ia dingudusatn, dipandang layak untuꞌ di tuannya pake man dinyiapatn untuꞌ tiap pakarajaatn nang baik.
22 Tagal koa jauhiꞌlah di nyu samua hal nang nimulatn hawa napsu man kainginan urakng mudaꞌ, barusahalah karas untuꞌ tarus idup banar, tatap pucayaꞌ kaꞌ Karistus, babuat kasih, man idup dame man samua urakng pucayaꞌ man ati nang murni. 23 Jauhiꞌlah paolekatn nang bodo. Kao nauꞌan kadeꞌ samuanya koa kahe nimulatn patangkaratn. 24 Agiꞌnya inaꞌ pantas saurakng amba Tuhan Yesus batangkar. Kao arus ramah kaꞌ samua urakng, mampu ngajar, sabar ngadapiꞌ masalah ato kasusahatn. 25 Kadeꞌ ada urakng nang ngalawan ajarannyu, didiklah urakng koa man lamah lamut. Barang diriꞌ ngalayaniꞌ man ngarapatn kadeꞌ Allah ngubahatnnaꞌ atinya kaꞌ koa biar batobat man narimaꞌ ajaran nang banar. 26 Tujuan diriꞌ, biar ia kaꞌ koa sadar agiꞌ man bisa lapas dari parangkap Ibalis. Barang bukeꞌ kabatolan urakng ngikutiꞌ ajaran sasat, ia kaꞌ koa kana tipu man kanaꞌ ikat di Ibalis biar nunaꞌan kamaoꞌannya.