2 Timotius 1

SURAT PAULUS NANG KADUA UNTUꞌ

TIMOTIUS

Salam

1:1-2

1-2 Untuꞌ Timotius nang terkasih, nang dah ku nganggap lea anakku babaro barang kapucayaꞌatn diriꞌ nang sama kaꞌ Tuhan Yesus. Aku badoꞌa kiraꞌnya Allah, Apaꞌ diriꞌ, man Karistus Yesus, Tuhan diriꞌ, kaja nojokatn kabaikatn ati-Nya man mareꞌ untukng tuah man idup nang panuh dame kaꞌ kitaꞌ. Salam dari Paulus, rasul Karistus Yesus. Aku jaji rasul barang kamaoꞌan Allah. Ia maoꞌ biar aku ngesahatn janji tentang idup nang ada kaꞌ dalapm Karistus Yesus.

Ucapatn sukur man nasehat

1:3-18

3 Aku basukur kaꞌ Allah, nang kungalayaniꞌ man ati nang sabujurarus lea nang di eneꞌ moyangku manjawat. Kaꞌ dalapm doꞌaku siakng malam aku ngingat kao. 4 Aku ngingat aiꞌ matanyu waꞌtu diriꞌ bapisah, man aku sidi rehoꞌ diriꞌ baya batamu agiꞌ, biar atiku banar-banar repo. 5 Aku ugaꞌ ingat kao sidi-sidi pucayaꞌ kaꞌ Karistus, sama lea eneꞌnyu Lois man uweꞌnyu Eunike. Aku yakin kao pun ngampuꞌ kayakinan nang sama. 6 Tagal koalah aku ngingatiꞌ kao biar kaja magunaan bakat nang Allah mareꞌ kaꞌ kao. Kao dah narimaꞌ bakat koa waꞌtu aku ngangkat kokotku kaꞌ atasnyu nabisatn kao jaji palayan Allah. 7 Jukut Roh nang Allah mareꞌatn kaꞌ diriꞌ bukeꞌlah roh nang manjawat diriꞌ jaji panakut. Sabaliknya Roh Kudus koa manjawat diriꞌ jaji kuat, panuh man kasih, man idup taratur. 8 Jaji amelah tabeꞌ jaji ayukng sapalayananku, biarpun aku di minjara gara-gara ngalayaniꞌ Karistus. Sabaliknya kao man kakuatan dari Allah ikutlah singsara untuꞌ Kabar Baik koa. 9 Allah dah nyalamatatn man nyaruꞌ diriꞌ biar diriꞌ jaji umat-Nya nang kudus. Ia nyalamatatn man milih diriꞌ bukeꞌ badasar ahe nang dah diriꞌ manjawat, tapi man dasar rencana-Nya babaro man kasih-Nya. Allah nojokatn kabaikatn-Nya koa lewat Karistus Yesus kaꞌ diriꞌ, bahkan sanapeꞌ aiꞌ tanah nian ada. 10 Man ampeatn, Allah nojokatn kabaikatn-Nya koa kaꞌ diriꞌ man kaatangan Raja Panyalamat diriꞌ Karistus Yesus. Yesus dah ngalahatn kuasa kamatiatn man ngincakng idup nang salama-lamanya lewat Kabar Baik koa. 11 Untuꞌ nyampeatn Kabar Baik nianlah, Allah ngangkat aku jaji rasul man guru. 12 Koa tagalnya aku tagah ngalamiꞌ kasingsaraatn nian, tapi aku inaꞌ tabeꞌ, jukut aku sidi nauꞌan batol sae nang ku mucayaꞌiꞌ. Aku yakin banar kadeꞌ ahe nang dah Karistus mucayaꞌatn kaꞌ aku, Ia sanggup ugaꞌ nyaganya sampe kaꞌ ari pangabisatn dunia. 13 Ikutiꞌlah sidi-sidi ajaran banar nang dah kumareꞌatn kaꞌ kao. Man panjawatlah hal koa dalapm iman man kasih tagal ubungan nang kuat man Karistus Yesus. 14 Allah dah mucayaꞌatn kaꞌ diriꞌ ajaran nang banar nang sidi baraga. Jagalah koa man kakuatan Roh Kudus nang diapm kaꞌ dalapm diriꞌ.

15 Kao nauꞌan kadeꞌ samua urakng kaꞌ binua Asia dah ningalatn aku, termasuk ugaꞌ Pigelus man Hermogenes. 16 Tapi Onesiporus dah sangahe kali ngarepoatn atiku. Kiraꞌnya Tuhan Yesus nojokatn kabaikatn ati-Nya kaꞌ kaluarga Onesiporus. Biarpun aku kaꞌ dalapm pinjara, Onesiporus inaꞌ tabeꞌ kaꞌ keadaꞌanku koa. 17 Takaꞌ ia namus kaꞌ Roma, ia barusaha ngagoꞌiꞌ aku man lakaꞌ koa namuiꞌ aku. 18 Kiraꞌnya Tuhan Yesus nojokatn kabaikatn ati-Nya kaꞌ ia kaꞌ ari Tuhan Yesus ngadiliꞌ samua umat manunsia. Man kitaꞌ nauꞌan sidi manyak nang dah dinya manjawat untuꞌ mantoꞌ aku kaꞌ Epesus.