Cara ngadapiꞌ page samadiꞌatn nang saiman
5:1-2
5
Amelah kao karas kaꞌ nanglaki nang labih tuha darinyu, tapi tagurlah ia kaꞌ koa saolah-olah ia kaꞌ koa apaꞌnyu. Nasehatiꞌlah nanglaki-nanglaki nang giꞌ mudaꞌ lea sodaranyu, 2 nangbini-nangbini nang dah tuha lea uweꞌnyu, man nangbini-nangbini nang giꞌ mudaꞌ lea adiꞌnyu man pikiran nang baraseh.Tentang janda
5:3-16
3 Hormatiꞌlah janda nang batol-batol janda, nang di maksut dian nang lakinya dah mati. 4 Tapi kadeꞌ saurakng janda nang giꞌ baranak baucuꞌ, aruslah anak, ucuꞌnya koa nang pamulaꞌatn balajar ngalayaniꞌ kaluarganya man malas budi urakng tuha ato eneꞌnya koa, tagal koalah nang ngarepoatn ati Allah. 5 Saurakng janda nang banar-banar janda, ia nang idup babaro, kahe baarap man bapintaꞌ kaꞌ Allah lewat doꞌa siakng malaman. 6 Tapi saurakng janda nang idupnya kahe ngarepoatn diriꞌnya babaro, ia sabatolnya dah mati takaꞌ giꞌ idup. 7 Sampeatnlah hal-hal nian ugaꞌ kaꞌ janda-janda koa biar ia kaꞌ koa idup inaꞌ dihina. 8 Tapi kadeꞌ ada saurakng nang inaꞌ mihara sodaranya, ahe agiꞌ saisiꞌ rumahnya, urakng koa nyangkal kapucayaꞌatnnya man labih buruk daripada urakng nang inaꞌ pucayaꞌ.
9 Nang masok etongan janda koa, kahelah nang baumur inaꞌ kurang dari anam puluh tahutn, nang kahe balaki sakali, 10 arus dikanal lea nangbini nang manjawat hal-hal nang edoꞌ, lea mihara kamudaꞌ-kamudaꞌnya, repo narimaꞌ tamu-tamu nang badiapm kaꞌ rumahnya, ngalayaniꞌ urakng-urakng pucayaꞌ, mantoꞌ urakng-urakng nang susah, man ngarajaatn sigana macam pakarajaatn nang baik. 11 Ame tamaꞌan kaꞌ dalapm daptar koa janda-janda nang giꞌ mudaꞌ. Barang takaꞌ hawa napsu nguasaiꞌ ia kaꞌ koa man maoꞌ balakiaꞌ agiꞌ, lalu ia kaꞌ koa ninggalatn palayanannya kaꞌ Karistus. 12 Kadeꞌ lea koa, ia kaꞌ koa basalah ngalanggar janji nang dimarentatn kaꞌ Karistus man ia kaꞌ koa ngatangannaꞌ ukuman kaꞌ diriꞌnya babaro. 13 Agiꞌnya ia kaꞌ koa muang-muang waꞌtu kaluar tamaꞌ rumah urakng. Man nang labih buruk agiꞌ, ia kaꞌ koa balajar majahat dama urakng lain man nyampuriꞌ urusan urakng man ngomongan hal-hal nang inaꞌ patut diomongan. 14 Koalah tagalnya aku maoꞌ biar janda-janda nang giꞌ mudaꞌ balaki agiꞌ, namu anak man ngurus rumah tangngaꞌnya, biar munsuh-munsuh diriꞌ inaꞌ namu alasan untuꞌ majahat dama diriꞌ. 15 Tagal basangahe janda dah sasat man nunaꞌan Ibalis. 16 Kadeꞌ saurakng nanglaki ato nangbini nang pucayaꞌ ngampuꞌ anggota kaluarga nang dah janda, kiraꞌnya ia mantoꞌ janda koa biar ia kaꞌ koa ame jaji beban kaꞌ jamaat. Man hal koa jamaat baya mantoꞌ ia kaꞌ koa nang batol-batol janda.
Tanggong jawap kanaꞌ pamimpin jamaat
5:3-16
17 Pamimpin jamaat nang nyalanan tugasnya nang baik, patut dihormatiꞌ dua kali lipat, tarutama ia kaꞌ koa nang rajitn bakotbah man ngajar. 18 Tagal kaꞌ dalapm Kitap Suci taconteng lea nian: “Ame nutup molot sapi nang tagah karaja ngirit gandum untuꞌ ngalapasatn begeꞌnya dari kulitnya. Biarlah sapi koa makatn sambil karaja.” Man dinyonteng ugaꞌ: “Urakng nang karaja patut narimaꞌ upahnya.”a 19 Kadeꞌ ada tuduhatn kaꞌ saurakng pamimpin jamaat, amelah langsung pucayaꞌ, kacoali tuduhatn koa didukung di dua ato talu saksi mata.b 20 Urakng nang babuat dosa, aruslah ditagur kaꞌ depan samua jamaat biar urakng lain pun jaji galiꞌ. 21 Kaꞌ adapatn Allah man Yesus Karistus man malaekat-malaekat nang di-Nya milih, aku mintaꞌ sidi kaꞌ kitaꞌ biar nurutiꞌ patunjuk nian. Panjawatlah samuanya koa untuꞌ tiap anggota jamaat tampa pilih kasih man tampa bapihak kaꞌ sae pun. 22 Ame kitaꞌ gopoh-gopoh ngangkat kokot kaꞌ atas saurakng untuꞌ nabisatnnya jaji palayan Allah. Kadeꞌ urakng lain badosa, amelah talibat kaꞌ dalapm dosa koa. Jagalah diriꞌnyu biar tatap baraseh man inaꞌ kotor.
23 Ame nyocok aiꞌ putih ihan, tapi campurlah ugaꞌ sabebet man anggur untuꞌ mantoꞌ parutnyu, tagal kao kaja sakit parut.