6
Ingatlah, tiap anggota jamaat nang jaji amba ulutn biar ia kaꞌ koa sapanuhnya kajah hormat kaꞌ tuannya biar urakng inaꞌ baya ngina dama Allah man pangajaran diriꞌ. 2a Amba-amba, nang tuannya urakng pucayaꞌ, inaꞌ mulih ia kaꞌ koa ngaremehan tuannya tagal ia kaꞌ koa sama-sama urakng pucayaꞌ. Malahan ia kaꞌ koa arus ngalayaniꞌ tuannya jauh labih baik agiꞌ, tagal tuan nang dingalayaniꞌ koa sama-sama urakng pucayaꞌ nang dingasihiꞌ.Pangajaran nang inaꞌ banar man kakayaan nang sabatolnya
6:2b-10
2b Jaji Timotius, kiraꞌnya kao tarus ngajar man nasehatiꞌ samua jamaat nang dinyu ngalayaniꞌ untuꞌ manjawat hal nian. 3 Sae jaꞌ nang ngajaratn ajaran nang lain daripada koa man inaꞌ satuju man ajaran nang banar dari ajaran Tuhan diriꞌ Yesus Karistus man ajaran agama diriꞌ, 4 ia urakng nang balagaꞌ nauꞌan padahal inaꞌ nauꞌan ahe-ahe. Panyakitnya suka badebat man batangkar tentang istilah-istilah sampe-sampe nimulatn rusiꞌ ati, papacahan, pitnahan, curiga nang inaꞌ baik, 5 man pasalisihatn nang inaꞌ abis-abisnya. Maraga pikiran urakng koa dah rusak man inaꞌ banar agiꞌ. Ia kaꞌ koa nyangka bisa jaji kaya tagal di ibadah. 6 Memang kaꞌ dalapm ibadah, kadeꞌ diriꞌ nyambah kaꞌ Tuhan man marasa puas kaꞌ ahe nang diriꞌ ngampuꞌ, koalah mareꞌ kauntungan nang ayaꞌ. 7 Tagal diriꞌ inaꞌ ngincakng ahe-ahe kaꞌ dalapm dunia nian man diriꞌpun inaꞌ incakng ahe-ahe kaluar dari dunia nian. 8 Asal ada pamakanan man pakean, cukuplah. 9 Tapi nang maoꞌ kaya, jantuꞌ kaꞌ dalapm pencobaan, kaꞌ dalapm oroꞌ man kaꞌ dalapm bamacam-macam napsu nang ampaꞌ man nang nyilakaatn, nang ningalampatn talino kaꞌ dalapm kaancuratn man kabinasaatn. 10 Tagal tamaꞌ kaꞌ duit koalah nang nimulatn bamacam-macam kajahatatn. Ada sabagian urakng nang ngunyar duit dah nyimpang dari iman man nyiksa diriꞌnya man bamacam-macam kasusahatn.
Pasatn panutup
6:11-21
11 Tapi kao nang di Allah ngampuꞌ, jauhiꞌlah samuanya koa. Unyarlah kaadilan, iduplah banar nurut kamaoꞌan Allah, tatap pucayaꞌ kaꞌ Karistus, giat dalapm iman man paramah. 12 Bajuanglah sidi-sidi untuꞌ idup lea urakng pucayaꞌ biar kao ngarabut adiah idup nang sabatolnya man idup nang salamanya. Tagal untuꞌ koalah Allah nyaruꞌ kao kaꞌ waꞌtu kao ngakoꞌ kadeꞌ kao pucayaꞌ kaꞌ Karistus kaꞌ adapatn saksi. 13 Man ampeatn, kaꞌ adapatn Allah nang mareꞌ idup kaꞌ sigana mahluk, man kaꞌ adapatn Yesus Karistus nang mareꞌ kasaksian nang banar kaꞌ Pontius Pilatus, aku mintaꞌ sidi-sidi kaꞌ kao:a 14 turutiꞌlah parentah nian, secara murni inaꞌ cacat sampe Tuhan diriꞌ Yesus Karistus atakng agiꞌ. 15 Kaꞌ waꞌtu kaatangan-Nya koa nang dah di Allah nantuatn kateleꞌatnnaꞌ: Allah nang sekoꞌ-sekoꞌnya man nang dipuji, Raja kaꞌ atas sigana raja man Tuhan kaꞌ atas sigana tuan. 16 Ia ihan nang inaꞌ bisa dinguasaiꞌ di kamatiatn, Ia idup kaꞌ dalapm saho nang inaꞌ baya disamakiꞌ di saepun. Inaꞌ ada saurakng pun nang suah neleꞌ-Nya ato baya nele-Nya. Untuꞌ Nyalah hormat man kuasa salama-lamanya! Amin.
17 Ingatiꞌ urakng-urakng kaya kaꞌ dunia nian biar ia kaꞌ koa ame sombong man ame baarap kaꞌ hal nang inaꞌ tantu lea kakayaatn, tapi baaraplah kaꞌ Allah nang dalapm kakayaatn-Nya mareꞌ kaꞌ diriꞌ sigana hal untuꞌ dinikmatiꞌ. 18 Mintaꞌlah kaꞌ ia kaꞌ koa untuꞌ nojokatn kabaikatn, untuꞌ manyak manjawat hal-hal nang edoꞌ, murah ati man suka mareꞌ. 19 Kadeꞌ ia kaꞌ koa manjawat hal-hal koa, ia kaꞌ koa ngomoꞌan harata nang jaji modal nang baik untuꞌ jaman nang atakngngaꞌ. Lekoalah, ia kaꞌ koa baya ngalamiꞌ kaidupatn nang sabatolnya man Allah. 20 Ahe nang dah dimucayaꞌatn kaꞌ kao, jagalah baik-baik, Timotius! Jauhiꞌlah omongan nang kosong nang inaꞌ banar man paolekatn-paolekatn tentang hal-hal nang kaliru nang disabut pangatahuan. 21 Tagal ada urakng-urakng nang ngataatn kadeꞌ ia kaꞌ koa ngampuꞌ pangatahuan koa, sampe nyimpang dari ajaran-ajaran pucayaꞌ nang di nya kaꞌ koa mucayaꞌiꞌ deꞌe.
Kiraꞌnya Tuhan nojokatn kabaikatn ati-Nya kaꞌ page samadiꞌatn samua.